Meloni do të “shkri” marrëdhëniet mes Shkupit dhe Sofjes? Mickoski: Lëvizje priten pas Vitit të Ri

Pritet që kryeministrja italiane, Giorgia Meloni, të përfshihet në afrimin e qëndrimeve mes Maqedonisë së Veriut dhe Bullgarisë, shkruajnë burime diplomatike në Shkup për portalin në gjuhën shqipe Lideri.mk. Sipas tyre, përfshirja direkte e Melonit do të jepte një impuls pozitiv në gjetjen e një baze të përbashkët për tejkalimin e mosmarrëveshjeve që po e bllokojnë nisjen e negociatave të anëtarësimit të vendit në Bashkimin Evropian.

“Meloni është figurë ideale për afrimin e pozicioneve të Maqedonisë dhe Bullgarisë. Ajo është një figurë e fuqishme në BE, por edhe një nga aleatët kryesorë të SHBA-së në Evropë për momentin”, theksuan këto burime për Lideri.mk, duke sqaruar se nuk bëhet fjalë për një ndërmjetësim klasik mes dy palëve, por për një angazhim që synon avancimin e çështjeve të hapura.

Këtë informacion deri diku indirekt e konfirmoi edhe kryeministri Hristijan Mickoski gjatë një takimi me gazetarët të premten.

“Pres zhvillime pozitive me Bullgarinë në fillim të vitit të ardhshëm. Kemi biseduar edhe me kryeministrin e një prej tri vendeve më të mëdha të BE-së”, deklaroi Mickoski. Edhe pse nuk e përmendi emrin e vendit, është e qartë se Italia konsiderohet si fuqia e tretë evropiane pas Gjermanisë dhe Francës. Flaka

The post Meloni do të “shkri” marrëdhëniet mes Shkupit dhe Sofjes? Mickoski: Lëvizje priten pas Vitit të Ri appeared first on Flaka, në çdo lajm... .