Mexhiti: Është fatkeqësi që një parti e dalë nga UÇK-ja t’i shërbejë Gruevskit dhe Mijallkovit

Zëvendëskryeministri i parë i Maqedonisë së Veriut, Izet Mexhiti, ka kritikuar ashpër drejtimin politik të BDI-së, duke e cilësuar si të pafalshme lidhjen e saj me figura të së kaluarës si Nikolla Gruevski dhe Sasho Mijallkov.

Në një intervistë për emisionin “Samo Intervju” në Kanal 5, Mexhiti kujtoi edhe premtimin e Ali Ahmetit për t’u tërhequr nga politika pas anëtarësimit të vendit në NATO.

“Ai paralajmëroi që në vitin 2015 se do të largohej nga politika dhe se do t’ia linte rinisë procesin e anëtarësimit në BE. Ai ishte momenti i duhur për t’u tërhequr dhe për t’u vlerësuar si nga ata që e kanë dashur, ashtu edhe nga ata që e kanë kundërshtuar. Një tërheqje e tillë do të krijonte një standard të ri në politikë. Por, dikush e hamendësoi dhe ai vazhdoi të merret me politikë, duke konsumuar gjithnjë e më shumë veten,” tha Mexhiti.