Pas shumë zvarritjeve u lëshua në përdorim çerdhja “Rilindja”, hapja zyrtare pritet të bëhet në fund të janarit

Pas shumë premtimeve dhe zvarritjeve të procedurave, sot u hapën dyert e çerdhes së re “Rilindja” në Tetovë për vogëlushët, shkruan Portalb.mk. 

Edhe pse ndërtimi ka përfunduar që në vitin 2023, zvarritja e procedurave nga institucionet ka mbajtur peng hapjen e kësaj çerdheje.

Edhe pse u lëshua në përdorim, hapja zyrtare siç informuan nga Komuna e Tetovës për Portalb.mk pritet të bëhet pas 20 janarit.

“Me ministrin e Politikës Sociale, Demografisë dhe Rinisë, Fatmir Limani dhe drejtoreshën, Fatlinda Jaja lëshuam në përdorim çerdhen “Rilindja” në Tetovë. Me hapjen e kësaj çerdheje, lista e fëmijeve që janë në pritje për t’u regjistruar do të ulet”, tha Bilall Kasami, kryetar i Komunës së Tetovës.

Ministri i Politikës Sociale, Demografisë dhe Rinisë Fatmir Limani, së bashku me kryetarin e Komunës së Tetovës sot vizituan objektin e ri “Rilindja” pranë Institucionit Publik “Mlladost” me qëllim të inspektimit të aktiviteteve.

“Gjatë vizitës u konstatua se kopshti ka përfunduar plotësisht”, thanë nga Ministria e Politikës Sociale. 

Për këtë çerdhe tani më është siguruar punësimi për 29 persona. 

Hapja e çerdhes do mundësojë hyrjen e 165 fëmijëve nga 0 deri në moshën 6 vjeç në procesin parashkollor. 

Objekti i “Rilindja” ka sipërfaqe prej 1644 metra katrorë në parcelën prej 6852 metra katrorë. 

Ky objekt është bashkë-financuar nga Bashkimi Evropian nëpërmjet Instrumentit të Asistencës së Para-Aderimit (IPA). 

Çerdhja “Rilindja” premtohet prej vitit 2019, kurse u ndërtua në prill të vitit 2023. Portalb.mk i ka dokumentuar të gjitha zvarritjet.

• LEXO: Çerdhja e re në Tetovë ende e mbyllur, premtohet nga viti 2019, hapja nuk u bë në tetor
• LEXO: Çerdhja e re në Tetovë pritet të hapet në tetor, por jo me kapacitet të plotë
•  LEXO: Çerdhja “Rilindja” në Tetovë e mori “aminin” e ministrisë, pritet miratimi i punësimeve
• LEXO: Këshilli Komunal e miratoi fillimin me punë të çerdhes së re “Rilindja” në Tetovë, por hapja pritet të vonohet
• LEXO: Çerdhja e re në Tetovë do të quhet “Rilindja”, por hapja do të vonojë
• LEXO: Pas shumë zvarritjesh, Komuna e Tetovës e ka marrë në pronësi çerdhen në oborrin e shkollës “Kirili dhe Metodij”
• LEXO: Ministria e Financave në konflikt me “Euroconsult” për çerdhen e Tetovës, 300 fëmijë presin për regjistrim
• LEXO: Tetovë, çerdhja në oborrin e shkollës “Kirili dhe Metodij” ende jofunksionale, ndërmarrjes mbikëqyrëse “nuk i lejohet të japë deklaratë”