Platforma e organizatave të OJQ-ve për antikorrupsion kërkon hetim gjithëpërfshirës, të plotë, të paanshëm dhe jopartiak të rastit Koçani

Platforma e organizatave të shoqërisë civile për luftë kundër korrupsionit kërkon hetim gjithëpërfshirës, të plotë, të paanshëm dhe jopartiak të rastit Koçani. Ata shtojnë se zjarri në Koçan është vetëm i fundit nga një seri ngjarjesh që tregojnë se korrupsioni vret. “Për fat të keq, pas rastit në Llaskarc, rastit të “Besa Trans”, zjarri në spitalin modular në Tetovë, duhej të ndodhte edhe zjarri në “diskotekën” në Koçan në mënyrë që të kujtohej përsëri se korrupsioni sistematik prej dekadash merr jetë”, thonë nga kjo Platformë, transmeton Portalb.mk.

“Platforma ndjek nga afër procedurat në rastin e zjarrit në Koçan dhe sugjeron se më e pakta që duhet të sigurohet tani është një hetim gjithëpërfshirës, i plotë, i paanshëm dhe mbipartiak. Kërkojmë që hetimi të kryhet në mënyrë të përgjegjshme dhe transparente dhe për të, të raportojnë ata që janë ligjërisht kompetentë për ta bërë këtë”, thonë nga kjo Platformë.

Ata shtojnë, se në këtë pikë. përgjegjësia është thelbësore dhe askush nuk duhet të përjashtohet prej saj, pavarësisht nëse apo cilës parti i përkasin, cilës përkatësi fetare apo etnike, dhe pavarësisht nëse janë ish-funksionarë apo funksionarë aktualë. Derisa të krijojmë një sistem në të cilin njerëzit e duhur me integritet janë në pozicionet e duhura, shtojnë ata, nuk duhet të heqim dorë.

“Në ekzistencën e deritanishme prej një dekade të platformës së organizatave të shoqërisë civile për luftë kundër korrupsionit vazhdimisht reagojmë dhe kërkojmë ndryshime në segmente të ndryshme të sistemit, të cilat nëse do të ishin pranuar, do të kishin parandaluar pikërisht ngjarje të tilla. Nevojiten ndryshime sistematike që do të demonstrojnë se ekziston një vullnet dhe angazhim i vërtetë për një luftë pa kompromis kundër korrupsionit nga të gjithë palët e interesuara, dhe veçanërisht ato kompetente. Për fat të keq, praktika ka treguar vazhdimisht se dëshira për pasurim personal ka qenë gjithmonë mbi dëshirën për të krijuar një sistem në të cilin rregullat dhe procedurat do të respektohen në mënyrë të barabartë nga të gjithë, në të gjitha nivelet e shoqërisë”, thonë nga Platforma.

Duke marrë parasysh shpalljen e ditëve të zisë, Platforma shtoi se do të përmbahet nga komentet e mëtejshme për rastin konkret për momentin, por njoftuan se gjatë javës së ardhshme do të organizojnë një konferencë për shtyp në të cilën do të shpallin kërkesat tyre specifike që presim të zbatohen nga autoritetet kompetente dhe këtë do ta vëzhgojnë në mënyrë që të fillojë një luftë kolektive pa kompromis kundër korrupsionit.

Në zjarrin që ndodhi më 16 mars në një lokal nate në Koçani, kanë humbur jetën 59 persona, ndërsa kishte 196 të lënduar që trajtohen brenda dhe jashtë vendit. Varrimi i tyre është kryer sot (20 mars).

• LEXO: Familjarë, miq e bashkëqytetarë iu dhanë lamtumirën e fundit të vdekurve nga zjarri në Koçan
• LEXO: Tragjedi në Koçan: 59 të vdekur dhe mbi 150 të lënduar nga zjarri në një diskotekë, viktimat janë të rinj
• LEXO: Nga gjitha tragjeditë që tronditën RMV-në, zjarri në Koçan është i treti për nga numri i viktimave (Infografik)