RMV, ende i hapur konkursi për çmimin shtetëror “Nënë Tereza”

Qytetarët e Maqedonisë së Veriut do të mund të aplikojnë për Çmimin Shtetëror “Nënë Tereza” deri më 30 prill, transmeton Portalb.mk.

“Çmimi Shtetëror u jepet individëve, grupeve të krijuesve, ekipeve, institucioneve, kompanive dhe shoqatave të qytetarëve nga vendi”, sqarojnë nga Ministria e Kulturës dhe Turizmit, duke shtuar se Konkursi është i hapur edhe për shtetas, grupe dhe institucione të huaja.

Ky çmim i jepet kandidatëve që kanë arritje në fushën e humanizmit dhe solidaritetit njerëzor.

“Çmimi shtetëror “Nënë Tereza” njeh arritjet në fushën e humanizmit dhe solidaritetit njerëzor dhe për nxitjen dhe avancimin e mirëkuptimit të ndërsjellë dhe zhvillimit të bashkëpunimit si ndërmjet popujve ashtu edhe ndërmjet pjesëtarëve të komuniteteve, kulturave dhe feve të ndryshme”, sqarojnë nga Ministria në lidhje me Konkursin.

Ky çmim më së shumti dy herë mund të jepet brenda një viti. Dokumentet dhe fletëparaqitja duhet të dërgohen në Ministri.

“Shuma në para e çmimit shtetëror “Nënë Tereza” është pesë (5) rroga mujore mesatare në Republikën e Maqedonisë së Veriut të paguara në tre muajt e fundit të vitit aktual”, sqaroi Ministria.