RMV, nesër përfundon detyrimi për pajisje dimërore në automjete

Nesër, 15 mars, përfundon detyrimi për posedim të detyrueshëm të pajisjeve dimërore, pa marrë parasysh gjendjen momentale të motit, informon Lidhja Auto Moto e Maqedonisë (LAMM), transmeton Portalb.mk.

Obligimi ligjor për posedim të detyrueshëm të pajisjeve dimërore në automjete ka filluar më 15 nëntor të vitit të kaluar, dhe zgjat deri më 15 mars të këtij viti.

Periudha e mbajtjes së detyrueshme të pajisjeve dimërore fillon në pajtim me dispozitat e përcaktuara në Rregulloren për pajisjen e detyrueshme të automjeteve, biçikletave dhe rimorkiove për pjesëmarrje të sigurt në komunikacionin rrugor dhe traktorët për kryerjen e sigurt të punimeve bujqësore ose pyjore.