SHBA dhe Irani pa marrëveshje pas bisedimeve 21 orëshe në Pakistan, Zëvendëspresidenti Vance jep “lajmin e keq”

Zëvendëspresidenti i Shteteve të Bashkuara, JD Vance, deklaroi se SHBA-ja nuk ka arritur një marrëveshje për t’i dhënë fund luftës me Iranin, pas një takimi maratonë në Islamabad, të Pakistanit, ku zyrtarët amerikanë dhe iranianë u takuan ballë për ballë për herë të parë pas 47 vitesh.

“Lajmi i keq është se nuk kemi arritur një marrëveshje, dhe mendoj se kjo është më shumë lajm i keq për Iranin sesa për Shtetet e Bashkuara të Amerikës,” tha Vance gjatë një konference për media të dielën herët.

Ai shtoi se delegacioni amerikan po kthehet në SHBA pa një marrëveshje, por ka bërë të qarta vijat e kuqe dhe çështjet për të cilat është i gatshëm të bëjë kompromis, si dhe ato për të cilat nuk do të lëshojë pe.

Bisedimet u zhvilluan me ndërmjetësimin e kryeministrit të Pakistanit, Shehbaz Sharif. Delegacioni amerikan u drejtua nga Vance, ndërsa ai iranian nga kryetari i parlamentit Mohammad B. Ghalibaf. Këto ishin negociatat e para direkte midis dy vendeve që nga sulmet e SHBA-së dhe Izraelit ndaj Iranit në fund të shkurtit.

Pjesë e delegacionit amerikan ishin edhe i dërguari special Steve Witkoff dhe dhëndri i ish-presidentit Donald Trump, Jared Kushner. Nga pala iraniane ishte i pranishëm edhe ministri i Jashtëm Seyed Abbas Araghchi.

Ndërkohë, presidenti Donald Trump deklaroi në rrjetet sociale se SHBA-ja po “pastron” Ngushticën e Hormuzit, një rrugë kyçe për tregtinë globale të naftës, e cila është bërë një pikë e rëndësishme tensioni gjatë negociatave për armëpushim.

Sipas raportimeve, të paktën 13 ushtarë amerikanë janë vrarë në konfliktin që nisi në fund të shkurtit, ndërsa qindra të tjerë janë plagosur. Nga ana tjetër, një zyrtar i lartë iranian i shëndetësisë ka deklaruar se mbi 3,000 persona kanë humbur jetën në Iran.

Autoritetet iraniane kërkojnë që SHBA-ja të konfirmojë se armëpushimi përfshin edhe Libanin, ku aleati i Iranit, Hezbollah, po përballet me bombardime të rënda nga Izraeli. Gjithashtu, Teherani kërkon zhbllokimin e aseteve të ngrira nga sanksionet.

Këto negociata konsiderohen një hap i rëndësishëm drejt përfundimit të konfliktit që filloi më 28 shkurt, kur SHBA-ja dhe Izraeli ndërmorën sulme të koordinuara ndaj Iranit, me synimin për të shkatërruar programet bërthamore dhe të raketave balistike të vendit.