“Shqip ose protestë!” – Studentët paralajmërojnë shpërthim në Shkup më 6 prill

Pakënaqësia e grumbulluar prej muajsh mes studentëve shqiptarë po shndërrohet në një mobilizim të hapur publik, duke rrezikuar të kulmojë në një nga përplasjet më të forta për të drejtat gjuhësore në arsimin e lartë në vend. Ajo që nisi si kërkesë institucionale për zhvillimin e provimit të Jurisprudencës në gjuhën shqipe, tashmë ka marrë përmasa të një lëvizjeje qytetare më të gjerë.

Për studentët, kjo çështje nuk është më procedurale, por një betejë për dinjitet dhe barazi. Refuzimi i deritanishëm për mbajtjen e provimit në gjuhën amtare perceptohet si diskriminim, duke krijuar pengesa të panevojshme për avancimin profesional dhe duke rritur ndjenjën e padrejtësisë.

Në këtë klimë tensioni, studentët kanë paralajmëruar protestë për më 6 prill në Shkup, duke synuar të testojnë reagimin institucional ndaj kërkesave të tyre. Me sloganin “Gjuha shqipe thërret – zëri yt është fuqia jonë”, ata bëjnë thirrje për mobilizim të gjerë qytetar.

“Që nga vera 2024 jemi duke pritur epilog… Gjuha shqipe dhe e drejta jonë nuk mund të mbahen peng nga vullneti dhe interpretimi i ministrave”, deklaroi një nga nismëtarët, Mevlan Ademi, duke ftuar qytetarët që t’i bashkohen protestës më 6 prill, në ora 12:30, para Urës së Gurit në Shkup.

Ndërkohë, studentët kanë nisur një aksion simbolik në disa qytete si Shkup, Tetovë, Kumanovë, Gostivar dhe Kërçovë, duke vendosur afishe me mesazhe si “Shqip kemi mësuar – provimin shqip do japim”, në shenjë pakënaqësie ndaj refuzimit institucional.

Çështja ka hapur përplasje edhe në skenën politike. Nga njëra anë, Bashkimi Demokratik për Integrim (BDI) këmbëngul se Ligji për Përdorimin e Gjuhëve është i mjaftueshëm dhe nuk kërkon ndryshime shtesë, duke e cilësuar çdo iniciativë tjetër si të panevojshme dhe në kundërshtim me rendin juridik.

Në anën tjetër, VLEN premton zgjidhje përmes ndërhyrjeve ligjore, duke akuzuar BDI-në për probleme të trashëguara në këtë fushë.

Edhe Avokati i Popullit i Republikës së Maqedonisë së Veriut ka mbështetur kërkesën e studentëve, duke rekomanduar ndryshime ligjore për të mundësuar zhvillimin e provimeve në gjuhën shqipe, në përputhje me parimin kushtetues të barazisë.

Në të njëjtën linjë, Inspektorati për Përdorimin e Gjuhëve ka konstatuar shkelje dhe i ka tërhequr vërejtje Ministrisë së Drejtësisë për moszbatim të detyrimeve ligjore. Megjithatë, Ministria ka kundërshtuar këtë vendim dhe ka paraqitur ankesë, duke lënë të hapur përplasjen institucionale.

Ndërsa afati i protestës afrohet, situata mbetet e tensionuar dhe pritet të tregojë nëse institucionet do të reflektojnë apo nëse kjo çështje do të thellojë edhe më tej debatet mbi barazinë gjuhësore në vend. Gazeta Flaka

The post “Shqip ose protestë!” – Studentët paralajmërojnë shpërthim në Shkup më 6 prill appeared first on Flaka, në çdo lajm... .