Siljanovska-Davkova i kërkoi Kostës zgjidhje që do të parandalonte kërkesa dhe kushte të reja në integrimin evropian
Presidentja Gordana Siljanovska-Davkova, në takim me Presidentin e Këshillit të Bashkimit Evropian, Antonio Kosta, theksoi se Maqedonia e Veriut në procesin e integrimit evropian nuk duhet të jetë dëm kolateral i vetos dhe bilateralizimit të procesit. Siç thuhet në një deklaratë nga kabineti i Presidentes, Siljanovska-Davkova theksoi se vendi është i përqendruar në zbatimin e […]
Presidentja Gordana Siljanovska-Davkova, në takim me Presidentin e Këshillit të Bashkimit Evropian, Antonio Kosta, theksoi se Maqedonia e Veriut në procesin e integrimit evropian nuk duhet të jetë dëm kolateral i vetos dhe bilateralizimit të procesit. Siç thuhet në një deklaratë nga kabineti i Presidentes, Siljanovska-Davkova theksoi se vendi është i përqendruar në zbatimin e agjendës së reformave për të arritur standardet evropiane, duke theksuar se Kriteret e Kopenhagës janë dhe duhet të mbeten kushtet e vetme për anëtarësim në Bashkimin Evropian, transmeton Portalb.mk.
Siljanovska-Davkova theksoi se keqkuptimet dhe mosmarrëveshjet bullgaro-maqedonase mund të zgjidhen vetëm me vullnet të mirë, mirëkuptim të ndërsjellë dhe respekt.
Ajo shtoi se negociatat mbi historinë, kulturën dhe gjuhën nuk janë në frymën e së drejtës ndërkombëtare dhe evropiane dhe përfaqësojnë një mohim të vlerave dhe parimeve evropiane të përcaktuara në dokumentet kushtetuese të BE-së, të cilat garantojnë identitetin kombëtar dhe kulturor, si dhe integritetin dhe dinjitetin e qytetarëve.
Duke paralajmëruar se precedenti maqedonas mund të ketë një efekt domino dhe të rrezikojë politikën e zgjerimit të BE-së, Siljanovska-Davkova i kërkoi Këshillit Evropian të propozojë një zgjidhje për të parandaluar kërkesat dhe kushtet e reja që do të zhvendosnin vëmendjen nga reformat në çështjet e identitetit.
Ajo gjithashtu vuri në dukje ndryshimet e shumta kushtetuese në tre dekadat e fundit, shumica e të cilave janë iniciuar nga jashtë, të cilat relativizojnë rëndësinë e Kushtetutës si akti më i lartë juridik, nga njëra anë, dhe kontratën më të gjerë dhe më të rëndësishme shoqërore të qytetarëve, nga ana tjetër.
Siljanovska-Davkova kujtoi gjithashtu praktikën e shtimit të amendamenteve të reja në çdo amendament kushtetues, miratimi i të cilave është kusht për mbështetjen e amendamenteve fillestare.
Presidenti i Këshillit Evropian, Kosta, siç thuhet në deklaratë, shprehu mirëkuptim për ndjenjat kombëtare dhe situatën në të cilën ndodhet vendi dhe shprehu pikëpamjen se nuk pret kushte shtesë politike në rrugën e Maqedonisë drejt BE-së. Ai vlerësoi se momenti i interesit të shtuar të BE-së për zgjerim duhet të shfrytëzohet për të siguruar siguri dhe mbrojtje më të madhe, përveç evropianizimit të rajonit, duke vlerësuar përpjekjet e vendit gjatë dy dekadave të fundit.
Presidenti i Këshillit Evropian, Antonio Kosta, i cili dje ishte në një vizitë njëditore në vend, para takimit me Siljanovska-Davkovën ishte në Qeveri ku u takua me kryeministrin Hristijan Mickoski.
Në këtë takim ai tha se zgjerimi është qëllim i përbashkët dhe ky është investimi më i mirë gjeostrategjik në paqe dhe siguri, duke përsëritur atë që përfaqësues të tjerë ndërkombëtarë na kanë thënë deri më tani, që është se vendi i Maqedonisë së Veriut është në Bashkimin Evropian.
“Maqedonia e Veriut ka bërë shumë punë, ju duhet të qëndroni në rrugën e integrimit evropian. E dini, procesi i pranimit është më shumë një maratonë, e di që kjo rrugë mund të jetë e vështirë, mund të jetë frustruese, por të gjitha vendet e mëparshme kandidate e kanë arritur qëllimin dhe sigurisht që ju do të bëni të njëjtën gjë. E inkurajoj kryeministrin të vazhdojë përpjekjet e tij në këtë drejtim, ne jemi në dispozicionin tuaj, reformat në fushën e sundimit të ligjit dhe lufta kundër korrupsionit janë thelbësore”, tha presidenti i Këshillit Evropian.
Kreu i Këshillit Evropian deklaroi qartë se ka detyrime që duhen përmbushur në mënyrë që të bëhet përparim në procesin e pranimit të vendit tonë. “Ajo që u ra dakord në vitin 2022 duhet të përmbushet”, tha Koshta, duke aluduar në detyrimin për ndryshime kushtetuese që bullgarët duhet të futen në Kushtetutën e vendit.
