Taravari: Për herë të parë në historinë e Maqedonisë arrestohet dikush që djeg flamurin shqiptar!

Kryetari i Aleancës për Shqiptarët, Arben Taravari, në një prononcim për gazetën LAJM, tha se nuk është në rregull të digjen flamujt e asnjë shteti.

Ai tha se Qeveria është e vendosur që të ndëshkojë të gjithë ata që shkelin ligjet, pa dallim etnie dhe shtoi se për herë të parë në Maqedoni, arrestohet një person që djeg flamurin shqiptar.

“Situatë jo e këndshme nga të dyja palët. Ka një thënie popullore shqiptare që thotë “çdo fis e ka nga një pis”. Kështu që, djegia e flamurit të një etnie, shteti apo kombi nuk është në rregull. Por, edhe qeveria përcolli porosi të qarta për të dyja anët, u morën në bisedë edhe shqiptarë edhe maqedonas. Në Prilep, për herë të parë në historinë e Maqedonisë ndodh që dikush që e ka djeg flamurin shqiptar që të burgoset, të merren masa. Edhe nga ana shqiptare, pra ata që e kanë djeg flamurin shtetëror janë privuar nga liria disa përsona. Kjo është porosia e qartë se, të gjithë duhet t’i respektojmë flamujt e njëri-tjetrit, ta respektojmë njëri-tjetrin, t’i respektojmë ligjet. Çdo kush që bie pre e provokimeve të atyre që janë në zor sepse janë para përgjegjësisë, shumë shpejtë i thirr drejtësia, nuk duhet të jenë pre e provokimeve të tyre. Kështu që i lus të gjithë qytetarët, pavarësisht përkatësisë etnike le ta respektojnë njëri-tjetrin dhe le t’i respektojmë ligjet sepse qeveria do ju përgjigjet njësoj të gjitha palëve”, tha Taravari.