RMV, për shkak të një serveri të prishur, publiku prej pesë vitesh nuk ka qasje në hartën e ndotësve
Informacioni më i fundit në faqen e Regjistrit të Lirimit dhe Transferimit të Ndotësve, i cili përmbante hartën e ndotësve nga objektet industriale, është i vitit 2019. Ueb-faqja https://ripz.moepp.gov.mk/, përmes së cilës publiku duhej të kishte qasje në informacione lidhur me ndotësit dhe mbrojtjen nga ndotja e mjedisit nga industria, është mbi pesë vjet e […]
Informacioni më i fundit në faqen e Regjistrit të Lirimit dhe Transferimit të Ndotësve, i cili përmbante hartën e ndotësve nga objektet industriale, është i vitit 2019. Ueb-faqja https://ripz.moepp.gov.mk/, përmes së cilës publiku duhej të kishte qasje në informacione lidhur me ndotësit dhe mbrojtjen nga ndotja e mjedisit nga industria, është mbi pesë vjet e vjetërsuar, ndërsa momentalisht nuk mund të hapen dhe shikohen as të dhënat që ishin aktuale nga 2016 deri në 2019. Të dhënat e vjetruara të Regjistrit të Ndotësve u regjistruan edhe në Raportin në hije të kapitullit 27, me të cilin sektori civil analizon situatën me harmonizimin dhe zbatimin e legjislacionit të mjedisit jetësor me atë evropian, raporton Meta.mk, transmeton Portalb.mk.
Arsyeja e mosfunksionimit të regjistrit, sipas Ministrisë së Mjedisit, institucioni përgjegjës për ngritjen dhe mirëmbajtjen e tij, është serveri i prishur. Për tejkalimin e kësaj situate, ministria thotë se po punohet që regjistri të bëhet pjesë e Sistemit Kombëtar të Informacionit Mjedisor, i cili është në përfundim e sipër, por nuk saktësojnë se përse është lejuar publiku të mbetet pa njohuri mbi të dhënat. për një periudhë kaq të gjatë.
“Arsyeja e mungesës së informacionit më të fundit në ueb-faqen e Regjistrit të Lirimit dhe Transferimit të Ndotësve është një problem teknik, pasi serveri ku ndodhej ueb-faqja ndaloi funksionimin, duke çuar në qasje të kufizuar në të dhëna. Si rezultat, shumica e faqeve dhe funksionalitetit të ueb-faqes, duke përfshirë hartën e ndotësve dhe raportet nga vitet e mëparshme, nuk janë aktualisht të disponueshme për t’u parë. Ministria po punon për rivendosjen e këtyre funksioneve dhe rikthimin e qasjes në të dhëna nëpërmjet krijimit të Sistemit kombëtar të informacionit për mjedisin jetësor, pjesë përbërëse e të cilit është regjistri. Aktualisht sistemi është në fazën përfundimtare të korrigjimit, pas së cilës pritet të jetë plotësisht funksional”, thekson Ministria.
Regjistri i lirimit dhe transferimit të ndotësve u lançua në nëntor 2016 me qëllim që të krijohet një bazë të dhënash gjithëpërfshirëse e emetimeve të mbi 90 ndotësve në ajër, ujë dhe tokë, si dhe të krijohet transferimi i ndotësve jashtë vendit. Bëhet fjalë për metale të rënda, pesticide, substanca inorganike dhe organike, gazra serë dhe substanca organike të klorur që emetohen nga objektet industriale nga disa sektorë si energjia, industria e metaleve dhe minierave, industria kimike, administrimi i mbetjeve dhe ujërave të zeza, prodhimi dhe përpunimi i letrës dhe drurit, blegtoria intensive dhe prodhimi i peshkut, si dhe prodhimet shtazore dhe hortikulturore nga sektori i ushqimit dhe pijeve. Faqja duhet të përmbajë gjithashtu të dhëna se ku dhe në çfarë sasie u lëshuan kimikatet e dëmshme, si dhe kush i lëshoi ato dhe kur.
Sigurimi i të dhënave të disponueshme dhe të përditësuara publikisht është detyrim i vendit, i cili është nënshkrues i Konventës së Aarhus-it. Regjistri u shpall si një mjet që nga njëra anë do të identifikojë ndotjen, dhe nga ana tjetër do të japë udhëzime se si dhe ku duhet vepruar për të reduktuar shkarkimin dhe transferimin e substancave ndotëse dhe mbrojtjen më të madhe të mjedisit.
Kujtojmë se kontrollet inspektuese të industrisë dhe kantiereve të ndërtimit, regjim i veçantë qarkullimi për mjetet e rënda të mallrave, reduktimi i përdorimit të automjeteve zyrtare të administratës dhe lirimi nga detyrimet e punës të grupeve të ndjeshme dhe grave shtatzëna, janë pjesë e masave afatshkurtra që qeveria dhe Ministria e Mjedisit kanë përfshirë në Planin e ri të veprimit për uljen e ndotjes së ajrit. Për këto masa është miratuar urdhri që të zbatohet në rastet kur ndotja do të kalojë kufijtë e alarmit.
