Tragjedia në Koçan, pesë pacientë janë liruar sot, dy janë kthyer nga Lituania dhe Suedia, katër në gjendje kritike
Nga gjithsej 21 pacientë të shtruar në Shkup pas aksidentit në Koçan, pesë janë liruar sot. Katër pacientë janë në gjendje kritike, dhe dy janë përkeqësuar sërish. Ende ka pacientë të intubuar në gjendje të rëndë, por jo në rrezik për jetën. Lajmin e ka bërë të ditur ministri i Shëndetësisë Arben Taravari, në konferencën […]
Nga gjithsej 21 pacientë të shtruar në Shkup pas aksidentit në Koçan, pesë janë liruar sot. Katër pacientë janë në gjendje kritike, dhe dy janë përkeqësuar sërish. Ende ka pacientë të intubuar në gjendje të rëndë, por jo në rrezik për jetën. Lajmin e ka bërë të ditur ministri i Shëndetësisë Arben Taravari, në konferencën e sotme për media, transmeton Portalb.mk.
Ai informoi se janë 89 pacientë jashtë vendit, por dy po kthehen nga Lituania dhe Suedia. Ata fillimisht do të shtrohen dhe do të kontrollohen në spitalet vendase nga ku janë evakuuar, sipas protokollit do të mbahen për 24 orë dhe më pas do të lirohen në shtëpi.
Për nesër nuk ka njoftim për kthimin e pacientëve të tjerë nga jashtë, por të hënën, siç theksoi Taravari, me siguri do të kthehen pesë persona.
“Nga të shtruarit, gjashtë janë në Qendrën Klinike, gjashtë në Spitalin e Qytetit dhe pesë në Spitalin e Përgjithshëm “8 Shtatori”, ndërsa katër në klinika private. Sot pesë pacientë janë në gjendje më të mirë dhe po lëshohen për në shtëpi, me çka mbeten edhe 16”, theksoi Taravari.
Në zjarrin që ndodhi më 16 mars në një lokal nate në Koçani, kanë humbur jetën 59 persona, ndërsa kishte 196 të lënduar që trajtohen brenda dhe jashtë vendit.
Sipas hetimeve të deritanishme nga institucionet, diskoteka ka punuar me një sërë shkeljesh të mëdha: nuk kishte rrjet hidranti dhe mjaftueshëm aparate PP, përdoreshin materiale piroteknike në mënyrë të paligjshme, nuk kishte as leje pune të ligjshme dhe nuk ishte lidhur asnjë kontratë me shkrim mes organizatorit dhe grupit interpretues.
