Zelensky: Rusia planifikon t’i bllokojë ujin Ukrainës

Presidenti ukrainas, Volodymyr Zelensky, ka deklaruar se Rusia po përgatit një operacion kundër sistemeve të furnizimit me ujë të Ukrainës në muajt e ardhshëm, duke theksuar nevojën për të forcuar mbrojtjen e infrastrukturës kritike dhe të mbrojtjes ajrore.

Sipas Ukrinform, kreu i shtetit ukrainas bëri thirrje koordinimi kombëtar, pas sulmeve të fundit ruse.

“Ne e dimë që rusët po përgatitin një operacion kundër sistemeve të furnizimit me ujë në muajt e ardhshëm. Çdo komunitet duhet të marrë seriozisht dhe me përgjegjësi të plotë mbrojtjen e këtyre objekteve”, ka thënë Zelensky.

“Vëmendje e veçantë i është kushtuar rajonit të Chernihivit, ku gjatë gjithë ditës vazhdoi rikthimi i energjisë elektrike. Po ashtu, udhëzova zyrtarët e qeverisë dhe ekipin e Zyrës së Presidentit të punojnë me ushtrinë tonë për çështjet e mbrojtjes ajrore, veçanërisht për mbrojtjen nga dronët në rajonet perëndimore të Ukrainës”, ka shtuar ai.

Sipas Zelensky-t, duhet të vendosen shtresa shtesë mbrojtjeje, që është një detyrë e qartë për autoritetet.