Zhurmë për parkingun në Qendrën Klinike: Taravari dhe Mickoski kontradiktor, LSDM me akuza
Ministri i Shëndetësisë Taravari sqaron opinionin për zhvillimet me parkingun e Qendrës Klinike. Ai thotë se nëse nuk plotësohen kushtet, kompania shqiptare nuk do të fitojë tenderin. Ditë më parë Taravari dhe Mickoski kanë dalë me qëndrime diametralisht të kundërta, ndërkohë LSDM thotë se kjo sipas tyre bën që të ketë reagime më të buta […]
Ministri i Shëndetësisë Taravari sqaron opinionin për zhvillimet me parkingun e Qendrës Klinike. Ai thotë se nëse nuk plotësohen kushtet, kompania shqiptare nuk do të fitojë tenderin. Ditë më parë Taravari dhe Mickoski kanë dalë me qëndrime diametralisht të kundërta, ndërkohë LSDM thotë se kjo sipas tyre bën që të ketë reagime më të buta në publik për shkak të marrëveshjes me kompaninë shqiptare, transmeton Portalb.mk.
“Deklaratat e ministrit të Shëndetësisë Taravari dhe kryeministrit Mickovski për parkingun në Qendrën Klinike janë padyshim kontradiktore dhe shihet se ato lënë hapësirë për reagime më të buta publike për shkak të marrëveshjes me kompaninë shqiptare. Së pari, si ka mundësi që Taravari të pretendojë se kontrata do të jetë 7.8 vjet dhe me arsyetimin se më pas nuk do të jetë Qendër Klinike? E kemi një deklaratë edhe nga kryeministri Hristijan Mickoski, i cili tha se nuk do të ketë Qendër të re Klinike. A po përpiqet Taravari të zvogëlojë dëmin me këtë, pra të zbusë reagimet e publikut, siç thashë edhe më parë, dhe sigurisht me synimin që kjo marrëveshje të çohet deri në fund?”, tha Bogdanka Kuzeska nga LSDM.
Mickovski, sipas tyre në anën tjetër, qëllimisht lë hapësirë për nënshkrimin e kontratës kur thotë: “Ne e kemi parasysh specifikacionin e tenderit dhe vetëkuptohet se nuk do të zgjidhet një kompani që nuk ka as besueshmëri, as kredibilitet, as karakteristika teknike dhe e gjithë kjo përfundon këtu”.
“A do të thotë kjo që nëse kompania ka besueshmëri të mirë, duhet të nënshkruhet kjo kontratë skandaloze? Pse atëherë Mickoski nuk e refuzoi menjëherë? Është një marrëveshje sipas së cilës 99% e fitimeve shkojnë për kompaninë shqiptare, dhe 1% për shtetin. Prandaj kërkojmë publikimin e menjëhershëm të thirrjes nga Ministria e Shëndetësisë, publikimin e menjëhershëm të studimit të fizibilitetit për të cilin është shpallur tenderi. Edhe Mickoski edhe Taravari i detyrohen publikut”, tha Kuzeska.
Më 7 mars, Taravari tha se marrëveshja ende nuk është nënshkruar, se duhet të kalojë edhe disa filtra të tjerë, por nëse ka reagim të madh publik, ose Qeveria nuk e miraton, atëherë nuk do të nënshkruhet. Nëse nënshkruhet, Taravari beson se garazhet në kate duhet të ndërtohen brenda 6 muajve deri në një vit.
“Më duhet të them se kontrata nuk është 20 vjeçare, por kusht në kontratë është që kompania fituese e tenderit të menaxhojë parkingun derisa të jetë qendra klinike. Nuk besoj se Qendra Klinike do të qëndrojë atje më shumë se 7-8, ndoshta edhe 10 vjet. Prandaj nuk ka pasur interesim nga kompanitë, nëse do të kishte qenë për një periudhë më të gjatë do të kishte aplikuar më shumë”, tha Taravari sot”, duke iu përgjigjur gazetarëve një ngjarje për promovimin e një kati të rinovuar të Klinikës Infektive.
Në pyetjen e gazetarëve për çmimin, ministri tha se beson se 50 denarë është çmim i mirë.
“Unë nuk mendoj se është një çmim shumë i lartë. Parkimi në ‘Ramstor’ kushton 60 denarë, ndërsa në ‘Nova Makedonija’ kushton 40 denarë. Në Shkup ka vende ku parkimi kushton 100, 150 denarë në orë”, tha ministri, për të cilën gazetarët reaguan duke thënë se pacientët nuk shkojnë në Klinikë për shëtitje.
LEXO: Do të rritet nga 30 në 50 denarë çmimi i parkingut në Qendrën Klinike Shkup
Nga ana tjetër, kryeministri Hristijna Mickoski tha se Qeveria nuk ka marrë vendim të tillë dhe nuk e di se nga vijnë ato informacione. Mickoski tregoi se gjatë përzgjedhjes do të merret parasysh kredibiliteti dhe besueshmëria e kompanisë.
“Dhe çfarë do të kemi parasysh? Ne kemi parasysh specifikacionin e tenderit dhe sigurisht që nuk do të zgjidhet një kompani që nuk ka asnjë kredibilitet, pa besueshmëri, as karakteristika teknike dhe këtu përfundon gjithçka. Jini të sigurt. Unë e kuptoj që duhet sensacion, sulm ndaj Qeverisë, por kjo qeveri funksionon ndryshe nga parimi i mëparshëm, pra vendimet që merr kjo Qeveri janë ekskluzivisht në interes të qytetarëve dhe nuk do të jetë ndryshe. Pra, të jeni të sigurt se çdo vendim i marrë nga kjo qeveri është ekskluzivisht në interes të qytetarëve”, tha Mickoski gjatë vizitës së sotme në vendbanimin Draçevë në komunën e Kisella Vodës.
Sipas tij, këto informacione janë fabrikuar për të sulmuar qeverinë dhe punën e saj.
“Nëse po kërkojmë një mënyrë për të sulmuar qeverinë për diçka që nuk ka ndodhur, atëherë edhe ne mund t’i krijojmë gjërat. Por unë po ju them se qeveria nuk ka marrë një vendim të tillë”, theksoi kryeministri.
Gjoka Construction ka vite që fiton tenderë të mëdhenj në Shqipëri. Një prej tyre është ndërtimi i autostradës që duhet të lidhë Dibrën me Tiranën. Krahas ndërtimit, familja Gjoka ka kompani që lidhen me biznesin e energjetikës.
Ministri Taravari fillimisht e shpalli idenë e zgjidhjes së problemit të parkimit përmes partneritetit publik-privat korrikun e kaluar dhe qeveria vendosi në seancën e 20 gushtit të vitit 2024 të formojë një komision që do të shqyrtonte ofertat. Baza për dhënien me koncesion të parkingut të Klinikës është studimi i fizibilitetit i cili fillimisht është zhvilluar në kohën e ministrisë së Nikolla Todorovit dhe më pas është ndryshuar disa herë.
Qeveria fillimisht premtoi ndërtimin e një qendre të re klinike, por së fundmi vendosi ta lërë në pritje idenë dhe të investojë në rritjen e kapaciteteve të spitalit 8 Shtatori.
