Bullgaria propozoi që një marrëveshje ndërqeveritare të specifikojë të gjitha aspektet e ndërtimit të hekurudhës me RMV-në
Ministria Bullgare e Transportit propozoi nënshkrimin e një marrëveshjeje ndërqeveritare që do të specifikojë të gjitha aspektet e ndërtimit të hekurudhës ndërmjet Republikës së Bullgarisë dhe Republikës së Maqedonisë së Veriut. Propozimi për këtë zgjidhje, sipas Ministrisë bullgare të Transportit, është që në Maqedoninë e Veriut ka një numër të madh deklaratash spekulative të politikanëve […]
Ministria Bullgare e Transportit propozoi nënshkrimin e një marrëveshjeje ndërqeveritare që do të specifikojë të gjitha aspektet e ndërtimit të hekurudhës ndërmjet Republikës së Bullgarisë dhe Republikës së Maqedonisë së Veriut. Propozimi për këtë zgjidhje, sipas Ministrisë bullgare të Transportit, është që në Maqedoninë e Veriut ka një numër të madh deklaratash spekulative të politikanëve të qeverisë maqedonase pikërisht për këtë temë, transmeton Portalb.mk.
“Negociatat për ndërtimin e hekurudhës janë bërë paravan mesazhesh politike dhe përpjekje për zgjidhjen e çështjeve të brendshme politike të fqinjëve tanë, të cilat nuk kanë të bëjnë fare me interesin e të dy vendeve për realizimin e projektit”, tha ministria e Bullgarisë.
Prandaj, ata konsiderojnë se përdorimi i terminologjisë së futbollit nga autoritetet maqedonase është ofendues për përfaqësuesit bullgarë, të cilët e konsiderojnë atë një formë të pazakontë komunikimi mes dy vendeve fqinje.
“Të dy vendet duhet të fillojnë të punojnë për nënshkrimin e një marrëveshjeje të qartë dhe të mundshme ndërqeveritare për të zgjidhur çështjet teknike, financiare, ligjore dhe organizative në lidhje me përgatitjen, ndërtimin dhe funksionimin e hekurudhës ndërkufitare në përputhje me legjislacionin evropian” , thuhet në njoftimin e Ministrisë Bullgare të Transportit.
Me këtë, autoritetet bullgare presin që të ndërpritet tendenca e RMV-së për sqarime shtesë dhe ndryshime të marrëveshjeve tashmë të arritura.
“Qëllimi është të drejtohen përpjekjet në hapa konkretë dhe të qartë drejt realizimit të projektit”, thotë ministria.
Ata theksojnë se pas takimit teknik të 31 tetorit 2024 në Sofje, ende nuk është arritur marrëveshje për procesverbalin e bisedimeve, por se pavarësisht kësaj, akuzat ndaj institucioneve bullgare nuk pushojnë.
“Nga ana bullgare, ne kemi deklaruar vazhdimisht se kostot dhe problemet e ndërtimit të hekurudhës nga Kriva Pallanka deri në kufirin me Republikën e Bullgarisë janë përgjegjësi e plotë e RMV-së dhe nuk mund të jenë objekt i marrëveshjes ndërmjet dy palëve. Republika e Bullgarisë ka treguar qartë kushtet dhe detyrimet e saj për ndërtimin e linjës së Korridorit 8 në territorin e saj”, thuhet në deklaratë.
Ministria bullgare propozon nënshkrimin e marrëveshjes me të cilën palët do të pranojnë si qëllim të përbashkët ndërtimin e një tuneli hekurudhor ndërkufitar ndërmjet Republikës së Bullgarisë dhe Republikës së Maqedonisë së Veriut në zonën kufitare të linjës hekurudhore.
“Përfshirë zbatimin e një prokurimi publik për ndërtimin dhe mbikëqyrjen e ndërtimit të tunelit nga njëra nga palët kontraktuese dhe përpjekjet për të siguruar ndihmë granti për ndërtimin e tunelit, pasi objekti i ndërtuar duhet të përmbushë kërkesat e BE-së dhe NATO-s për këtë lloj infrastrukture”, thonë nga kjo ministri.
Brenda një periudhe të shkurtër kohore nga data e nënshkrimit të kësaj marrëveshjeje, sipas propozimit të Ministrisë bullgare, është planifikuar të përgatitet një plan paraprak për përgatitjen dhe ndërtimin e tunelit dhe t’i paraqitet Komisionit Evropian dhe institucioneve bankare evropiane të financuara.
“Marrëveshja do të parashikojë krijimin e një Komiteti të Përbashkët për të koordinuar të gjitha aktivitetet dhe zgjidhjen e çështjeve që lidhen me ndërtimin, funksionimin dhe mirëmbajtjen e lokacionit, bazuar në vendimet përkatëse të të dyja palëve”, thuhet në deklaratë.
Ndryshe, ndërtimi i hekurudhës për Bullgarinë në periudhën e kaluar u vu në pikëpyetje pasi zëvendëskryeministri dhe ministri i transportit të vendit, Aleksandar Nikolloski, kundërshtoi haptazi vazhdimin e ndërtimit të seksionit të tretë (Kriva Palanka – Deve Bair), duke akuzuar Bullgarinë se nuk ka një projekt për Korridorin 8.
Deklaratat e tij, përveç Sofjes, morën reagime edhe nga i dërguari special gjerman për Ballkanin Perëndimor, Manuel Saracin, i cili shprehu shqetësimin se qeveria e re në vend ka humbur interesin për zbatimin e projektit dhe se në vend të këtij korridori, prioritet i jepet Korridorit 10 në Shkup që lidh Austrinë, Slloveninë, Kroacinë, Serbinë, Maqedoninë e Veriut dhe Greqinë.
Por, kryeministri Hristijan Mickoski më 7 tetor në konferencën e përbashkët për shtyp me kolegun e tij serb Millosh Vuçeviq, i cili ishte për vizitë zyrtare në vend, tha se Korridori 8 mbetet prioritet i Qeverisë së Maqedonisë.
