Hajdari: Doja të isha model për futbollistët e rinj në Kosovë

Futbollisti i Kombëtares së Kosovës Albian Hajdari, ka folur sërish për vendimin e tij për t’iu bashkuar Kosovës. Në një intervistë për “blue Sport”, mbrojtësi i Hoffenheimit theksoi se zgjedhja nuk ka qenë e lehtë dhe është marrë pas konsultimeve me familjen dhe miqtë.

22 vjeçari, i cili këtë verë kaloi te TSG Hoffenheim dhe u vendos shpejt si titullar i rregullt, përshkroi fillimin e tij në Bundesligë si “Jashtëzakonisht emocionuese, emocionuese dhe frymëzuese”. Ai shtoi se e vlerëson shumë mundësinë për të luajtur kundër talenteve më të mira evropiane, ndërsa pranoi se nga Zvicra i mungojnë disa gjëra: “Më mungon dielli në Ticino dhe paqja dhe qetësia e shëtitjeve pranë liqenit. Por padyshim jo autostradat në Zvicër.”

Zgjedhja për të luajtur me Kosovën ka shkaktuar reagime të shumta në Zvicër, por Hajdari thotë se e kupton interesimin. Ai shpjegon se vendimi ka qenë i menduar gjatë: “Doja të isha një model për futbollistët e rinj në Kosovë, të udhëheqja me shembull dhe të mbroja vlera të caktuara me përkushtimin tim të plotë”. Ai mohoi gjithashtu se garancia për një vend titullari ka ndikuar në vendimin e tij: “Absolutisht asnjë ndikim, nuk ishte një temë në procesin e vendimmarrjes”./Kosovapress