Enti Shtetëror i Revizionit ka konstatuar një sërë parregullsish serioze në funksionimin e shoqërisë “Drejtoria e Llotarisë – Mozzart” SHPK Shkup, e themeluar me pronësi të përzier mes Lotarisë Shtetërore të Maqedonisë së Veriut dhe kompanisë serbe Mozzart.

Raporti përfundimtar i revizionit për vitin 2024 është veçanërisht kritik: revizorët kanë dhënë mendim të pafavorshëm si për pasqyrat financiare, ashtu edhe për pajtueshmërinë e veprimtarisë me ligjet dhe rregulloret në fuqi.

Gjetjet përfshijnë mospërputhje në kontratat e themelimit, mungesë të evidencës për kontributet financiare të ortakut privat, shpenzime të konsiderueshme marketingu pa dokumentacion të mjaftueshëm, probleme në procedurën e përzgjedhjes së platformës online, si dhe pagesa më të larta se kufijtë e përcaktuar për anëtarët e Këshillit Mbikëqyrës.

Nuk bëhet fjalë vetëm për mangësi administrative. Sipas revizionit, këto parregullsi ndikojnë drejtpërdrejt në besueshmërinë e pasqyrave financiare dhe në transparencën e përdorimit të mjeteve të kompanisë, ku shumicën e kapitalit e zotëron një ndërmarrje shtetërore.

1. Humbja prej 24,1 milionë denarësh dhe shpenzimet që tejkalojnë të ardhurat

Pasqyrat financiare për vitin 2024 tregojnë se kompania ka realizuar të ardhura prej 57,971 milionë denarësh, ndërsa shpenzimet operative kanë arritur në 82,263 milionë denarë.

Kjo ka rezultuar me humbje prej 24,162 milionë denarësh, apo rreth 393 mijë euro.

Pasqyra financiare për vitin 2024

Të ardhura

57,97 mln

denarë

Shpenzime operative

82,26 mln

denarë

Humbje vjetore

24,16 mln

denarë

Shpenzime për shërbime

58,65 mln

denarë

Burimi: Bilanci i suksesit, raporti i Entit Shtetëror të Revizionit, faqja 26.

Një nga elementet që bie në sy është se vetëm shpenzimet për shërbime kanë arritur në 58,646 milionë denarë, pra janë më të larta se të ardhurat e përgjithshme të kompanisë.

Kjo strukturë e shpenzimeve ngre pikëpyetje për efikasitetin ekonomik të ndërmarrjes, veçanërisht duke pasur parasysh se bëhet fjalë për një kompani me kapital të përzier, ku 51 për qind e pjesëmarrjes në themelim i takon Lotarisë Shtetërore.

2. Marketingu: 27,2 milionë denarë, me dokumentacion të mangët për miliona

Një nga gjetjet më të rëndësishme lidhet me shpenzimet për reklamim, propagandë, promovim dhe panaire.

Gjatë vitit 2024, kompania ka regjistruar 27,220 milionë denarë, apo rreth 442 mijë euro, për këto kategori shpenzimesh.

Sipas revizorëve, kjo shumë përfaqësonte 33 për qind të shpenzimeve të përgjithshme të kompanisë dhe 47 për qind të të ardhurave të realizuara nga veprimtaria për të cilën kishte fituar të drejtën e ushtrimit.

Por problemi kryesor nuk është vetëm madhësia e shpenzimeve.

Revizioni ka konstatuar parregullsi në vlerë prej 16,770 milionë denarësh, që përbëjnë 62 për qind të të gjitha shpenzimeve të marketingut.

Ndër problemet e evidentuara janë:

• Faturat e dorëzuara nuk ishin të arkivuara dhe të vulosura sipas kërkesave ligjore.
• Për shërbime në vlerë prej 8,307 milionë denarësh, faturat përmbanin përshkrime të përgjithshme, pa informacione të mjaftueshme për të përcaktuar se çfarë shërbimi ishte kryer konkretisht.
• Nuk ishin dorëzuar raporte për realizimin e shërbimeve, të nënshkruara nga personat e autorizuar të të dyja palëve kontraktuese.
• Në kontratat për reklamimin në televizion dhe radio nuk ishte rregulluar mënyra e monitorimit të realizimit të planeve mediatike.
• Porositë për shërbime ishin bërë nga persona që nuk ishin të punësuar në kompani.

Në praktikë, kjo do të thotë se revizorët nuk kanë pasur dokumentacion të mjaftueshëm për të verifikuar plotësisht se për çfarë shërbimesh janë paguar miliona denarë dhe nëse ato janë realizuar në përputhje me kontratat.

Revizioni nuk konstaton automatikisht se këto para janë keqpërdorur, por thekson se mungesa e dokumentacionit të besueshëm nuk mundëson konfirmimin e përdorimit të ligjshëm të mjeteve.

3. Kontrata 15-vjeçare për platformën online dhe dyshimet për kufizim të konkurrencës

Një tjetër kapitull me rëndësi të veçantë është përzgjedhja e kompanisë që do të siguronte softuerin dhe platformën online për lojërat e fatit.

Në shkurt 2024 është shpallur thirrje publike për sigurimin e platformës dhe përmbajtjeve të lojërave online. Në këtë procedurë është paraqitur vetëm një ofertë, nga një ofertues i huaj, me të cilin më pas është lidhur kontratë me kohëzgjatje prej 15 vjetësh.

Revizioni ka konstatuar një varg mangësish në këtë procedurë.

Së pari, kompania, sipas revizorëve, duhej ta kishte zbatuar Ligjin për Prokurime Publike, duke pasur parasysh se Lotaria Shtetërore zotëronte 51 për qind të kapitalit dhe kishte ndikim dominues në vendimmarrje.

Megjithatë, procedura ishte zhvilluar sipas një rregulloreje të brendshme dhe jo sipas procedurave të përcaktuara me ligjin për prokurime publike.

Problemet e tjera përfshijnë:

• Thirrja publike ishte publikuar në dy gazeta ditore vendore, pa u publikuar në një gazetë zyrtare ndërkombëtare.
• Për marrjen e dokumentacionit të tenderit kërkohej pagesa prej 2.000 eurosh, pa një bazë të përcaktuar në rregulloren e brendshme.
• Nuk ishin përcaktuar specifikime minimale teknike dhe funksionale për platformën.
• Nuk ishin përcaktuar kritere të qarta për vlerësimin e cilësisë së sistemit.
• Kohëzgjatja 15-vjeçare krijonte rrezik të vjetërsimit teknologjik dhe kufizimit të mundësisë për zgjidhje të reja.

Një element tjetër i rëndësishëm është modeli i pagesës.

Sipas dokumentacionit të tenderit, kompensimi për platformën ishte përcaktuar në 40 për qind të diferencës ndërmjet shumës së përgjithshme të parave të paguara nga lojtarët dhe shumës së përgjithshme të fitimeve të realizuara gjatë muajit.

Revizorët vlerësojnë se kriteret e përcaktuara për përzgjedhjen nuk u mundësonin operatorëve ekonomikë të konkurronin për kushte më të favorshme ekonomike.

Gjithashtu, komisioni i procedurës kishte marrë vendim për kompensime prej 120 mijë denarësh për kryetarin dhe 100 mijë denarësh për anëtarët, të cilët ishin të punësuar në Lotarinë Shtetërore. Revizioni kërkon kthimin e këtyre mjeteve, pasi kompensimet nuk ishin të parashikuara në rregulloren përkatëse.

4. Mospërputhje prej 1,4 milionë eurosh në kontributin e ortakut privat

Një nga gjetjet më të rëndësishme për strukturën pronësore dhe financiare të kompanisë lidhet me dy kontratat e themelimit.

Shoqëria është themeluar më 5 janar 2024, me pjesëmarrje të përzier:

• Lotaria Shtetërore – 51 për qind.
• Mozzart Beograd – 49 për qind.

Sipas kontratës për investim të përbashkët, vlera e përgjithshme e investimit ishte 4,431,572 euro. Pjesa e Lotarisë Shtetërore ishte 2,260,102 euro në formë jomonetare, përkatësisht e drejta për organizimin e lojërave të fatit në internet, ndërsa Mozzart duhej të kontribuonte me 2,171,470 euro.

Kontrata parashikonte që kontributi i Mozzartit të paguhej në tri këste:

• 771.470 euro në vitin e parë;
• 700.000 euro në vitin e dytë;
• 700.000 euro në vitin e tretë.

Por kontrata për themelimin e shoqërisë përcaktonte një kontribut prej vetëm 771.470 eurosh, shumë e cila ishte paguar në tërësi.

Kështu, revizorët kanë konstatuar një mospërputhje prej 1,4 milionë eurosh ndërmjet dy kontratave.

Për më tepër, kompania nuk kishte regjistruar në kontabilitet kërkesat për dy këstet e mbetura, në vlerë të përgjithshme prej 1,4 milionë eurosh.

Revizioni vlerëson se kjo gjendje nuk është në përputhje me standardet e kontabilitetit dhe se ndikon në paraqitjen reale të kërkesave dhe gjendjes financiare të kompanisë.

Këtu qëndron një çështje thelbësore: si është përcaktuar realisht kontributi financiar i ortakut privat dhe pse dy dokumentet themelore të themelimit nuk përputhen për një shumë kaq të madhe?

Revizorët kërkojnë harmonizimin e kontratave, evidentimin e kërkesave dhe mbrojtjen e kapitalit shtetëror.

5. Drejtuesi i kompanisë nuk i plotësonte kushtet ligjore

Revizioni ka konstatuar edhe problem në emërimin e drejtuesit të kompanisë.

Sipas raportit, për menaxher ishte zgjedhur personi që nuk e plotësonte kushtin e përcaktuar në nenin 231-a të Ligjit për Shoqëritë Tregtare, përkatësisht nuk ishte shtetas i Maqedonisë së Veriut.

Bëhet fjalë për menaxherin Dušan Simović, i cili sipas raportit e ushtronte këtë funksion që nga 5 janari 2024.

Revizorët kanë kërkuar që organet kompetente të ndërmarrin masa për emërimin e drejtuesit në përputhje me dispozitat ligjore.

Një tjetër gjetje lidhet me angazhimin e katër personave përmes kontratave autoriale, për të cilët janë regjistruar shpenzime prej 1,253 milionë denarësh.

Sipas revizionit, këta persona ishin angazhuar për periudha nga katër muaj, pa pëlqimin paraprak të Ministrisë së Financave.

Problemi, sipas dokumentacionit të shqyrtuar, është se personat nuk kishin prodhuar punime të pavarura dhe origjinale profesionale, siç parashikonin kontratat autoriale, por kishin kryer detyra të rregullta operative, të cilat ishin paraparë edhe në sistematizimin e vendeve të punës.

Revizorët kanë konstatuar gjithashtu se faturat dhe raportet e punës nuk ishin të arkivuara në mënyrë të rregullt.

6. Anëtarëve të Këshillit Mbikëqyrës u janë paguar 1,421 milionë denarë më shumë

Një tjetër kapitull problematik lidhet me pagesat për kryetarin dhe anëtarët e Këshillit Mbikëqyrës.

Sipas vendimit të ortakëve, kryetari i Këshillit Mbikëqyrës kishte të drejtë në kompensim mujor neto prej 55.000 denarësh, ndërsa anëtarët nga 50.000 denarë.

Por revizioni ka krahasuar këto pagesa me udhëzimet e përcaktuara në pikën 202 të procesverbalit të Qeverisë të 30 korrikut 2021, ku parashiheshin kompensime deri në 12.000 denarë për kryetarin dhe 10.000 denarë për anëtarët.

Sipas llogaritjeve të revizorëve, për vitin 2024 janë paguar 1,421 milionë denarë më shumë se shumat e përcaktuara në këtë dokument të Qeverisë.

Në total, për shtatë muaj, për kompensimet e Këshillit Mbikëqyrës janë evidentuar 1,785 milionë denarë neto, ndërsa gjatë vitit janë mbajtur vetëm tri mbledhje.

Për më tepër, revizorëve nuk u është prezantuar rregullorja e punës së Këshillit Mbikëqyrës dhe as dokumentacioni që do të dëshmonte se ky organ kishte shqyrtuar pasqyrat financiare dhe raportin vjetor të kompanisë.

Revizioni ka konstatuar gjithashtu se Këshilli Mbikëqyrës nuk funksiononte në përbërjen e plotë të paraparë me aktin e themelimit.

Rekomandimi i revizorëve është i qartë: të ndërmerren masa për kthimin e mjeteve të paguara mbi shumat e përcaktuara në dokumentin qeveritar dhe të sigurohet funksionimi i rregullt i organit mbikëqyrës.

7. Kompania me vetëm një të punësuar, por me 16 vende pune të sistematizuara

Një nga konstatimet që nxjerr në pah dobësitë organizative të kompanisë lidhet me funksionimin e saj të brendshëm.

Edhe pse në rregulloren për sistematizimin e vendeve të punës ishin paraparë 16 pozita, përkatësisht 20 ekzekutues, kompania gjatë periudhës së shqyrtuar funksiononte me vetëm një të punësuar, i cili njëkohësisht ishte edhe menaxher.

Revizioni thekson se kompania nuk kishte miratuar procedura të shkruara për aktivitetet kryesore strategjike dhe operative.

Gjithashtu, nuk kishte ndarje të qartë të kompetencave dhe përgjegjësive, ndërsa mungonin kontrollet paraprake dhe ato pas realizimit të transaksioneve, të njohura si kontrolle ex-ante dhe ex-post.

Kjo gjendje, sipas revizorëve, krijon rrezik për gabime, mashtrime, mosrespektim të legjislacionit dhe pamundësi për zbulimin në kohë të parregullsive.

Për më tepër, kompania kishte kërkuar nga Ministria e Financave plotësimin e vendeve të punës, por nuk kishte marrë përgjigje për kërkesën.

8. E drejta e lojërave online me vlerë 2,26 milionë euro në rrezik zhvlerësimi

Një nga çështjet më të rëndësishme për të ardhmen financiare të kompanisë është vlera e së drejtës për organizimin e lojërave të fatit në internet.

Kjo e drejtë, e dhënë si kontribut jomonetar nga Lotaria Shtetërore, është vlerësuar në 2,260,102 euro, përkatësisht 139,007 milionë denarë.

Por situata ndryshoi pas interpretimit autentik të Ligjit për Lojërat e Fatit, të publikuar më 13 gusht 2024.

Pas vendimeve të Qeverisë për nisjen e procedurës së ndërprerjes së shoqërive që organizonin lojëra elektronike dhe online, Lotaria Shtetërore në dhjetor 2024 kishte paraqitur padi në Gjykatën Themelore Civile në Shkup për ndërprerjen e kompanisë.

Ndërkohë, menaxheri kishte marrë vendim për ndërprerjen e përkohshme të organizimit të lojërave në platformën mozzartbetonline.mk.

Për revizorët, këto rrethana përbëjnë tregues të qartë se e drejta për organizimin e lojërave online mund të ketë humbur vlerën ekonomike.

Arsyetimi është se kompania kishte ndërprerë veprimtarinë për të cilën e kishte fituar këtë të drejtë, aseti nuk përdorej më dhe nuk gjeneronte të hyra, ndërsa ekzistonte procedurë formale për ndërprerjen e shoqërisë.

Për këtë arsye, revizioni ka theksuar nevojën për vlerësimin e zhvlerësimit të këtij aseti sipas standardit ndërkombëtar të kontabilitetit MRS 36.

Kjo është veçanërisht e rëndësishme sepse bëhet fjalë për një kontribut të Lotarisë Shtetërore, pra për një aset me vlerë mbi 2,2 milionë euro, i cili ishte pjesë e investimit fillestar të shtetit në këtë partneritet.

9. Edhe Ministria e Financave kritikohet për mungesë të akteve nënligjore

Raporti nuk i kufizon konstatimet vetëm te kompania. Revizorët kanë identifikuar mangësi edhe në nivel institucional.

Ministria e Financave, ndonëse kishte pasur obligim ligjor për miratimin e akteve nënligjore brenda gjashtë muajve nga hyrja në fuqi e ligjit përkatës, nuk i kishte miratuar ato.

Mungonin, ndër të tjera:

• Formulari i përcaktuar për aplikim për licencë.
• Standardet minimale teknike për pajisjet dhe funksionalitetin e softuerit.
• Lista e personave juridikë të autorizuar për kontrollimin dhe certifikimin e platformave.
• Procedurat dhe protokollet e detyrueshme për sistemin e kontrollit.
• Rregullat e detajuara për verifikimin e identitetit, moshës dhe vendbanimit të lojtarëve.
• Kushtet teknike për hapësirat ku vendosen pajisjet dhe infrastruktura e platformave.

Kjo mungesë e rregullimit të detajuar krijonte pasiguri në zbatimin e ligjit dhe në kontrollin e veprimtarisë së lojërave të fatit në internet.

Revizioni ka ngritur edhe çështjen e organizimit ilegal të lojërave të fatit online në vend.

Në këtë drejtim përmenden aktivitetet e institucioneve për kufizimin e transaksioneve elektronike drejt operatorëve pa licencë, përmes mekanizmave të identifikimit dhe bllokimit të pagesave me kodin MCC 7995.

10. Edhe prokurimet publike me parregullsi të shumta

Problemet nuk përfundojnë te kontrata e platformës online.

Gjatë vitit 2024, kompania kishte marrë përsipër obligime për prokurime në vlerë prej 21,347 milionë denarësh, ndërsa revizioni kishte përfshirë pesë procedura që mbulonin 93 për qind të obligimeve përkatëse.

Në 75 për qind të shpalljeve për prokurime publike ishte paraqitur vetëm një ofertë e pranueshme.

Ndër parregullsitë e tjera, revizorët kanë evidentuar:

• Obligime prej 10,728 milionë denarësh për reklamim në hapësira të jashtme dhe shërbime agjencish për reklama televizive e radiofonike, pa procedurë të prokurimit publik.
• Pesë procedura me vlerë 46,783 milionë denarësh, në vendimet e të cilave mungonte arsyetimi për nevojën e prokurimit.
• Tri procedura për shërbime marketingu në vlerë 29,863 milionë denarësh, ku sipas revizionit, objekti kryesor i prokurimit duhej të klasifikohej si furnizim me mallra dhe jo si shërbim.
• Kritere joproporcionale për përzgjedhjen e operatorëve, përfshirë kushtin që kompanitë të kishin së paku dhjetë vjet përvojë në veprimtarinë përkatëse.
• Mungesë të kontratave individuale për furnizimet konkrete, ndonëse ishin lidhur marrëveshje kornizë.
• Mospublikim në afat të njoftimeve për realizimin e kontratave në sistemin elektronik të prokurimeve publike.

Sipas revizionit, këto praktika kanë ndikuar në kufizimin e konkurrencës, transparencës dhe përdorimin racional të mjeteve.

11. Një tjetër mospërputhje në strukturën pronësore

Raporti përmban edhe një konstatim që kërkon sqarim të veçantë.

Ndërsa kontrata e themelimit parashikonte pjesëmarrje prej 51 për qind për Lotarinë Shtetërore dhe 49 për qind për Mozzartin, revizorët kanë konstatuar se në gjendjen aktuale të regjistrit, raporti i pjesëmarrjes figuron 75 për qind për Lotarinë Shtetërore dhe 25 për qind për Mozzartin.

Raporti e evidenton këtë mospërputhje, ndërsa në të njëjtën kohë konstaton dallimet në vlerën e kontributit financiar të ortakut privat.

Kjo është një çështje që meriton sqarim publik nga të dy ortakët, veçanërisht për mënyrën se si janë përcaktuar pjesëmarrjet në kapital dhe si janë harmonizuar detyrimet financiare të kontratës së investimit të përbashkët me dokumentet e regjistrimit.

12. Çfarë përgjigje ka dhënë kompania?

Raporti përfundimtar përfshin edhe vërejtjet e menaxherit të kompanisë, Dušan Simović, ndaj draft-raportit të revizionit.

Enti Shtetëror i Revizionit ka shqyrtuar kundërshtimet dhe ka konstatuar se një pjesë e tyre përmbanin shpjegime për arsyet e gjendjeve të evidentuara dhe për masat që pretendohej se ishin ndërmarrë.

Megjithatë, pjesa më e madhe e vërejtjeve nuk është pranuar, për shkak të mungesës së provave shtesë që do të mund të ndryshonin konstatimet e revizorëve. Një vërejtje është pranuar pjesërisht.

Pra, gjetjet kryesore kanë mbetur pjesë e raportit përfundimtar.

Një detaj tjetër me rëndësi është se revizioni ka shqyrtuar vitin 2024, ndërsa thekson se nuk kishte kryer revizion të kësaj kompanie për vitet paraprake. Kontrolli është realizuar nga 14 prilli 2025 deri më 6 mars 2026, me ndërprerje.

Përfundim: Një partneritet me kapital shtetëror, por me shumë pikëpyetje për menaxhimin

Raporti i Entit Shtetëror të Revizionit për “Lotaria Shtetërore – Mozzart” nxjerr në pah probleme që prekin pothuajse të gjitha segmentet e funksionimit të kompanisë: financat, prokurimet, marketingun, menaxhimin, kontrollin e brendshëm dhe bazën ligjore të veprimtarisë.

Tri çështje janë veçanërisht të rëndësishme për interesin publik.

E para, mospërputhja prej 1,4 milionë eurosh në kontributin e paraparë të ortakut privat dhe mungesa e evidentimit të kërkesave për këto mjete.

E dyta, 16,77 milionë denarë shpenzime marketingu me parregullsi dokumentare, ku për miliona denarë nuk mund të konfirmohej konkretisht shërbimi i faturuar.

E treta, investimi shtetëror prej 2,26 milionë eurosh në të drejtën për organizimin e lojërave online, për të cilën revizorët kanë evidentuar rrezik zhvlerësimi pas ndërprerjes së veprimtarisë.

Përtej këtyre gjetjeve, kompania ka përfunduar vitin me humbje prej 24,16 milionë denarësh, ndërsa organet drejtuese nuk kishin vendosur për mbulimin e saj.

Më shqetësues është fakti se revizioni ka konstatuar mungesë të procedurave të shkruara, ndarje të pamjaftueshme të përgjegjësive dhe kontrolle të brendshme joefektive.

Në fund, pyetja kryesore nuk është vetëm sa para ka humbur kompania gjatë vitit 2024, por kush mban përgjegjësi për mënyrën se si është menaxhuar një shoqëri ku shteti ka investuar kapital dhe ka marrë pjesën më të madhe të pronësisë?

Kjo kërkon përgjigje nga Lotaria Shtetërore, menaxhmenti i kompanisë, Këshilli Mbikëqyrës dhe institucionet përgjegjëse për mbikëqyrjen e kapitalit shtetëror.

Burimi: Enti Shtetëror i Revizionit – Raporti përfundimtar për revizionin e pasqyrave financiare dhe revizionin e pajtueshmërisë për vitin 2024, datë 14 gusht 2026.

13. Revizioni i dorëzon Prokurorisë lëndët për pesë kompanitë e lojërave të fatit

Përgjegjësi e mundshme ligjore

Përveç konstatimeve financiare dhe administrative, çështja ka marrë edhe dimension juridik. Enti Shtetëror i Revizionit ka dorëzuar lëndë në Prokurorinë Publike për parregullsitë e konstatuara në pesë shoqëritë që organizojnë lojëra të fatit, përfshirë edhe “Lotaria Shtetërore – Mozzart”.

Kontrolli ka përfshirë këto pesë kompani:

1. Lotaria Shtetërore – Mozzart SHPK Shkup.
2. Lotaria Shtetërore – 77 Bits SHPK Manastir.
3. Lotaria Shtetërore – Vezuv SHPK Shkup.
4. Nova Video-Lotaria Shtetërore – Novo VLT SHPK Shkup.
5. Video-Lotaria Shtetërore – Casinos Austria SHPK Shkup.

Të pesë shoqëritë kanë marrë opinion të pafavorshëm nga revizioni për pasqyrat financiare të vitit 2024 dhe pajtueshmërinë e veprimtarisë me legjislacionin.

Dorëzimi i lëndëve në Prokurori nënkupton se gjetjet e revizorëve kalojnë për shqyrtim nga organet e ndjekjes, të cilat duhet të vlerësojnë nëse ekzistojnë elemente për veprime të mëtejshme ligjore.

Kjo e bën edhe më të rëndësishme zbardhjen e mënyrës së menaxhimit të këtyre kompanive, veçanërisht duke pasur parasysh se në të gjitha ato Lotaria Shtetërore ka pjesëmarrje prej 51 për qind në kapitalin themeltar.

Theksohet se dorëzimi i lëndëve në Prokurori nuk përbën dëshmi të fajësisë penale. Përgjegjësia eventuale e personave të përfshirë mund të përcaktohet vetëm përmes procedurave ligjore.

Shënim redaksional: Gjetjet e mësipërme paraqesin konstatimet e revizorëve. Ato nuk përbëjnë vetvetiu vendim gjyqësor për keqpërdorim ose përgjegjësi penale. Gazeta Flaka

Dokumenti zyrtar

The post Humbje prej 24 milionë denarësh dhe parregullsi milionëshe – revizioni godet Mozzartin appeared first on Flaka, në çdo lajm... .

Burimi i lajmit: flaka.com.mk
Shënim: Ky material është përpunuar për qëllime informimi nga Portali lajme.mk.