Jean-Claude Van Damme përfshihet në një skandal, dyshohet se kreu marrëdhënie intime me pesë gra rumune për të cilat ishte në dijeni se ishin të trafikuara

Jean-Claude Van Damme është akuzuar për marrëdhënie seksuale me disa gra rumune, duke qenë në dijeni se ato ishin viktima të trafikimit.

Sipas raportimit të Antena 3 CNN të mërkurën, një kallëzim penal është dorëzuar pranë Drejtorisë për Hetimin e Krimit të Organizuar dhe Terorrizmit (DIICOT) në Rumani, duke e akuzuar aktorin dhe kampionin e arteve marciale, 64 vjeç, për përfshirje në marrëdhënie seksuale me pesë gra të trafikuara nga një grup kriminal, i cili dyshohet se drejtohet nga biznesmeni rumun dhe pronari i një agjencie modelingu, Morel Bolea.

Sipas Antena 3 CNN, këto gra dyshohet se iu “prezantuan si dhuratë” dhe aktet e pretenduara kanë ndodhur në Kanë, gjatë një eventi të organizuar prej tij. Megjithatë, periudha kohore e ngjarjeve të supozuara nuk është përcaktuar.

Avokati Adrian Cuculis, përfaqësues i njërës prej viktimave të pretenduara, deklaroi për mediat se gratë ndodheshin në një gjendje të cenueshme, me dyshimin se ishin shfrytëzuar në kuptimin e nenit 182 të Kodit Penal.

“Në një moment në Kanë, gjatë një eventi të organizuar nga Jean-Claude Van Damme, disa shtetas rumunë, të cilët aktualisht janë nën hetim për krijimin e një grupi kriminal dhe për veprimtari të paligjshme të shfrytëzimit të grave, dyshohet se i kanë ofruar aktorit pesë gra rumune – modele në Rumani – për të pasur marrëdhënie seksuale me to,” tha Cuculis, sipas një përkthimi në anglisht.

“Dëshmitë e dëshmitarëve tregojnë qartë se Jean-Claude Van Damme ishte i vetëdijshëm se këto persona po shfrytëzoheshin”, shtoi avokati.