KFOR me stërvitje të përbashkëta me EULEX’in, Policinë e Kosovës dhe FSK-në, Ulutas thotë se do të nxisë koordinim

Më 20 dhe 21 nëntor 2025, misioni i udhëhequr nga NATO, KFOR, misioni i Sundimit të Ligjit i Bashkimit Europian (EULEX) dhe Policia e Kosovës do të zhvillojnë një stërvitje të përbashkët në Kampin Vrella, të quajtur “Shpata e Artë 2025”.

KFOR tha se edhe Forca e Sigurisë së Kosovës (FSK) gjithashtu do të marrë pjesë, “në përputhje me mandatin e saj origjinal të mbrojtjes civile”.

““Shpata e Artë 2025” do të përfshijë një numër të madh personeli, automjetesh dhe burimesh që do të veprojnë në zonën e stërvitjes, në afërsi të saj dhe përgjatë rrugëve kryesore të komunikimit. Ushtrimi do të testojë zbatimin e aftësive të menaxhimit të krizave, aftësive dhe procedurave në një numër skenarësh kompleksë sigurie, duke përfshirë ato që përfshijnë trajtimin dhe asgjësimin e sigurt të pajisjeve shpërthyese dhe materialeve të rrezikshme”, tha KFOR në një komunikatë për media.

Komandanti i KFOR-it, Özkan Ulutaş, tha se ky ushtrim i përbashkët simbolizon “angazhimin tonë të fortë për të nxitur bashkëpunimin dhe koordinimin e ndërsjellë në dobi të të gjithë atyre që jetojnë në Kosovë”.