Mickoski në Uashington për t’i forcuar pozitat ndaj Bullgarisë dhe për mos t’i plotësuar kushtet e vëna nga BE-ja

Kryeministri i Maqedonisë së Veriut, Hristijan Mickoski ka gjetur terren të ri për të adresuar kritika ndaj Bashkimit Evropian. Në vizitën e tij të fundit në Uashington nga Këshilli i Atlantikut kryeministri nënvizoi se Maqedonia e Veriut ka bërë mjaft lëshime deri më tani në rrugëtimin e saj eurointegrues. Njohësit e marrëdhënieve ndërkombëtare vizitat e shpeshta të Mickoskit në SHBA dhe retoriken e tij, ku haptazi kushtëzon BE-në, e shohin si tendencë të kryeministrit për të shfrytëzuar raportet e ftohta në mes BE-së dhe SHBA-së, shkruan Portalb.mk.

Mickoski po “blen” kohë

Njohësi i marrëdhënieve ndërkombëtare, Denko Maleski për Portalb.mk tha se SHBA e mbështetë rrugëtimin e Maqedonisë së Veriut drejt BE-së, por, sipas tij, SHBA nuk do të ketë ndonjë angazhim të posaçëm në këtë drejtim.

“Marrëdhëniet mes Shteteve të Bashkuara dhe Evropës po ftohen, veçanërisht në fushën e sigurisë. SHBA po tërhiqet, në çfarë mase dhe si do ta shohim së shpejti. Prandaj, ndikimi i Amerikës në Evropë do të ndryshojë, kjo është e logjikshme. Tani, sepse vetë Unioni po shndërrohet në diçka jo stabile. A do ta mbështesë SHBA-ja vendin tonë drejt integrimit evropian, mendoj se po – sigurisht. Por, nuk shoh asnjë mundësi për ndonjë angazhim të posaçëm.

Në kontekstin e një politike të jashtme “transaksionare”, Tramp do të pyesë se çfarë fiton dhe çfarë humbet vendi i tij nëse përmbush dëshirat e vërteta të qeverisë së re në Maqedoni: anulimin e marrëveshjeve ndërkombëtare që nuk kanë mbështetjen e shumicës së maqedonasve, të nënshkruara nga paraardhësit e tyre. Për shkak të padrejtësive të bëra ndaj nesh, ai do të prishë marrëdhëniet me Greqinë, Bullgarinë dhe Shqipërinë. Si mendoni, si do të përcaktohet një njeri që vlerëson gjithçka nga këndvështrimi i interesave të Amerikës dhe jo nga parimet e së drejtës ndërkombëtare? A nuk mjafton përvoja e Ukrainës për të kuptuar se çfarë është politika ndërkombëtare?”, tha për Portalb.mk profesori Maleski.

Selim Ibraimi, njohës i marrëdhënieve ndërkombëtare kujton se qysh në verë kryeministri Mickoski me lobin maqedonas, ndërtuan një marrëdhënie të re me zyrtarë të Trampit për t’i forcuar pozitat ndaj Bullgarisë dhe njëkohësisht për mos t’i plotësuar kushtet e vëna nga BE-ja.

“Dhe ,kjo që po ndodh tani me Mickoskin dhe retorikën e tij të ashpër kundër BE-së në Uashington DC, që e ka këtë qëllim, që administrata e Trampit të mbajë anë dhe MV të blejë kohë. Kjo është një kohë e përshtatshme për të gjithë partitë e djathta dhe të gjithë qeveritë që të vijnë në SHBA të takohen me zyrtarë të Trampit për të shpëtuar nga BE. Se sa sukses do të kenë, mbetet të shihet. Bullgaria është e vendosur, ajo gjithashtu ka një ndikim në qarqet në DC, andaj problemi Shkup-Sofje mund të mbetet i hapur duke kalkuluar gjithnjë për kohë më të mira. Se a do të vijnë kohë më të mira për MV kjo nuk dihet”, tha për Portalb.mk analisti Ibraimi.

Miskoski: Jemi në të njëjtën situatë si para 20 vitesh, por në ndërkohë kemi ndërruar flamurin, monedhën, emrin dhe gjithçka

Kujtojmë se, në vizitën e fundit në SHBA, kryeministri Hristijan Mickoski në fjalimin e tij në Këshillin Atlantik ka theksuar “vijat e kuqe” në raport me kërkesat e Bashkimit Evropian ndaj Maqedonisë së Veriut. Ai ripërsëriti qëndrimin e tij, tashmë, të njohur se kërkesa e re në adresë të Maqedonisë së Veriut për ndryshimet kushtetuese nuk garanton siguri në rrugën drejt BE-së.

“Frustrimet mes qytetarëve të vendit tim janë jashtëzakonisht të mëdha. Dëshmoj se në një kohë kur ishim në opozitë në 2018-ën, shumë njerëz nga e gjithë bota, zyrtarë të lartë të BE-së, kryeministra nga shumë vende të fuqishme të NATO-s, presidentë, anëtarë të Komisionit Evropian, na vizituan dhe thanë, thjesht ndryshoni emrin, këtë herë do të bëheni menjëherë anëtar i NATO-s, do të filloni negociatat me BE-në dhe do t’i përfundoni brenda një periudhe 4-5 vjeçare dhe do të bëheni pjesë e BE-së. Ato 4-5 vite kanë kaluar para 2 vitesh dhe ne jemi në të njëjtën situatë si para 20 vitesh, por në ndërkohë kemi ndërruar flamurin, monedhën, emrin dhe gjithçka”, theksoi Mickoski.

Pas ardhjes nga Uashingtoni, Mickoski u ballafaqua me pyetjen se vallë gjatë vizitës në SHBA ka marrë mbështetje lidhur me rrugëtimin eurointegrues të vendit.

“Marrim ne nga të gjitha palët mbështetje konkrete, askush nuk ka thënë na falni por nuk ju mbështesim në eurointegrimet. Të gjithë i kuptojnë argumentet tona, të gjithë mbrapa perdeve na i shtrëngojnë duart dhe na thonë, kjo është e vërteta, mjaft me standarde të dyfishta, është e nevojshme të shkoni përpara, por për fat të keq, ja ka disa vende, më saktë një vend anëtare në BE, që tenton të na kthejë mbrapa në mesjetë, në vend që të punojmë në shekullin 21. Më pengon që 20 vite nuk mund të lëvizim asnjë milimetër, jo sepse nuk jam i mirë, por sepse dikush duhet të zgjidh çështje të shekullit 10, 11 tani në shekullin 21“, tha kryeministri Mickoski.

Me ardhjen e VMRO-DPMNE-së në pushtet ka ndryshuar edhe retorika ndaj BE-së. Tani nuk flitet për kushtin që duhet të përmbush Maqedonia e Veriut në lidhje me ndryshimin e Kushtetutës, por kryefjala e ekzekutivit është se Evropa duhet të jetë parimore dhe të mos veprojë me standarde të dyfishta. Insistimi i VMRO-DPMNE-së, dhe kushti i saj për garanci në rrugëtimin drejt BE-së, e pastaj ndryshimet kushtetuese shkon në kundërshtim me kushtin e BE-së për negociatat.

BE-ja e prerë: Fillimisht kushtetuta, pastaj negociatat 

Kujtojmë se Maqedonia e Veriut duhet t’i bëjë ndryshimet kushtetuese për të ecur përpara në rrugën eurointegruese. Ato nënkuptojnë shtimin e bullgarëve dhe etnive tjera në Kushtetutë.

Kjo vjen si rezultat i asaj që Maqedonia e Veriut pas 17 vitesh me 19 korrik të vitit 2022 filloi bisedimet qasëse me BE-në me mbajtjen e konferencës së parë ndërqeveritare, pas miratimit të propozimit francez të cilin Maqedonia e Veriut e miratoi më 16 korrik 2022.

Propozimi atë kohë u votua në parlament pa pjesëmarrjen e opozitës së atëhershme e cila tani është në pushtet.

Ndryshimi i Kushtetutës kërkon shumicë prej dy të tretash. Negociatat me BE-në nuk do të fillojnë derisa të bëhen ndryshimet kushtetuese.

• LEXO: Mickoski nga Uashingtoni: Fillimisht negociatat, pastaj ndryshimet kushtetuese
• Lexo: Mickoski nga Uashingtoni: Evropa duhet të jetë parimore në vend që të ketë standarde të dyfishta
• LEXO: RMV: Të dhëna dëshpëruese për eurointegrimet, vetëm 20 përqind e qytetarëve janë pro ndryshimeve kushtetuese
• LEXO: Radev e përsëriti qëndrimin e Bullgarisë: Nuk ka negociata pa përfshirë bullgarët në Kushtetutë