Pse tetë ministra të drejtësisë shqiptarë nuk e hapën çështjen e provimit në gjuhën shqipe?

Çështja e dhënies së provimit të jurisprudencës në gjuhën shqipe është riaktualizuar sërish në opinion, duke hapur një debat se pse kjo temë nuk është zgjidhur në dekadat e fundit, edhe pse pjesë e qeverive kanë qenë ministra të shumtë të drejtësisë nga komuniteti etnik shqiptar, shkruan portali Bulevar.

Në 27 vitet e fundit, gjithsej tetë ministra të drejtësisë kanë qenë shqiptarë, të propozuar nga parti të ndryshme politike. Megjithatë, përkundër pjesëmarrjes së tyre në pushtetin ekzekutiv, çështja e futjes së gjuhës shqipe gjatë dhënies së provimit të jurisprudencës mbetet e hapur.

Me përjashtim të Xhevdet Nasufit, i cili ushtroi funksionin në periudhën para nënshkrimit të Marrëveshjes së Ohrit, ministrat e tjerë kanë pasur mundësinë ta nisin këtë çështje në kuadër të mandateve të tyre. Ndër ta janë Ixhet Memeti, Ismail Dardhishta, Blerim Bexheti, Adnan Jashari, Valdet Xhaferi, Bilen Salihu dhe Krenar Lloga.

Nga ana tjetër, sipas deklaratave të presidentes Gordana Siljanovska-Davkova, kërkesa për dhënien e provimit të jurisprudencës ekskluzivisht në gjuhën shqipe është në kundërshtim me dispozitat kushtetuese dhe me parimet e përcaktuara me Marrëveshjen e Ohrit, e cila është pjesë përbërëse e rendit juridik të shtetit.

Kjo çështje vazhdon të jetë pjesë e debateve politike dhe juridike, pa një zgjidhje konkrete, ndërsa palët e ndryshme paraqesin qëndrime të kundërta rreth kushtetutshmërisë dhe nevojës për një ndryshim të tillë./Bulevar