Sot do të varroset kosovarja që vdiq tragjikisht në Tetovë

Të premten e 7 nëntorit varroset Daorsa Spahija, 25-vjeçarja nga Gjakova që vdiq në Tetovë të Maqedonisë së Veriut.

Këtë e kanë bërë të ditur familjaret e së ndjerës, derisa njoftuan se varrimi do të bëhet në varrezat e qytetit të Gjakovës me fillim nga ora 14:00.

25-vjeçarja ishte studente e nivelit master në Tetovë.

Prokuroria Themelore në Tetovë ka njoftuar se janë intensifikuar hetimet dhe do të ndërmerren të gjitha masat deri në zbardhjen e plotë të rastit, ku shtuan se të dhënat e para nuk japin indikacione për vepër penale.

Nga ana tjetër, gazetarja Liridona Vejseli ka thënë se viktima kishte pasur vazhdimisht presion fizik dhe psikik nga i dashuri i saj.

Ministria e Brendshme e Maqedonisë së Veriut dje ka dhënë informacione të reja lidhur me rastin e 24-vjeçares nga Gjakova që vdiq mbrëmë në Tetovë.

Për Klankosova.tv nga kjo ministri pohuan se trupi i të ndjerës është dorëzuar për obduksion.

“Me datë 05.11.2025, në orën 18:40, në SPB Tetovë është raportuar se para një ndërtese në rr. “121” në Tetovë ishte vërejtur trupi i pajetë i një personi femër. Një mjek i Ndihmës urgjente mjekësore ka konstatuar vdekjen, ndërsa pas ndërmarrjes së masave është vërtetuar se bëhet fjalë për një studente 24-vjeçare me iniciale S.D. nga Kosova”.

“Ndërsa, pas kryerjes së hetimit nga prokurori publik dhe grupi hetimor i SPB Tetovë, është konstatuar se bëhet fjalë për vetëvrasje. Me urdhër të prokurorit publik, trupi i të ndjerës është dorëzuar për obduksion”, ka thënë kjo ministri.

Gjatë ditës dje gazetarja nga Maqedonia e Veriut, Liridona Vejseli, ka pohuar se vajza kishte presion të vazhdueshëm fizik dhe psikik nga i dashuri i saj.