“Tetova do park” me kërkesë deri te këshilltarët e Komunës së Tetovës rreth planit urbanistik te Monopolli

Nisma joqeveritare në Tetovë “Duam Park” ka kërkuar nga këshilltarët e Komunës së Tetovës të anulojnë vendimin e marrë rreth planit urbanistik te “Monopoli”, transmeton Portalb.mk.

“Duke ndarë shqetësimin, revoltën dhe zhgënjimin e qytetarëve të të gjitha moshave dhe etnive, ju drejtohemi me KËRKESË për pezullimin e menjëhershëm të Vendimit për ndryshimin e Planit të Përgjithshëm Urbanistik dhe Planit Detal Urbanistik për Monopolin, vendim i miratuar nga ju më 04.10.2024”, kërkuan nga “Duam Park”.

Ata përmes ndryshimit të planit planifikojnë një qytet më të gjelbër dhe human, duke theksuar se “nuk duhet të lejohet ndryshimi i pjesshëm i PPU-së në interes të mafisë urbane dhe kapitalit privat”.

“Për të vendosur në rendin e ditës pikën e pezullimit të këtij vendimi tuajin të gabuar, kërkohet vullneti dhe ndërgjegjja e të paktën një këshilltari nga të gjithë tridhjetë e një”, deklaruan nga “Duam Park”, duke kërkuan që të dëgjohen kërkesat e tyre .

Ka qenë në dorë të udhëheqësisë aktuale të komunës së Tetovës që të vendosë nëse tek ish-Monopolli do të ndërtohen banesa ose jo, kryetari i komunës Bilall Kasami nuk është tërësisht i sinqertë kur thotë se gjithçka është ‘gatuar’ më herët. Ai gjithashtu ka pasur mundësi të pezullojë Planin Detal Urbanistik e përgatitur në kohën e Teuta Arifit ose të privatizojë tokën shtetërore pas ri-destinimit në zonë për banim kolektiv. Kujtojmë që hulumtimi i Portalb-it zbuloi se investitorit drita e gjelbër për ndërtim të banesave në një procedurë jotransparente i ishte dhënë nga shumica aktuale e Këshillit Komunal, e përbërë nga VLEN-VMRO. Aktivistët kritikojnë.

Portalb-i bisedoi edhe me pronarin aktual të ish-Monopollit, ai e konfirmoi se aty pritet të ndërtohen katër objekte për banim ndërsa theksoi se gjithë hapësirën e ish-Monopollit e ka blerë nga ‘Tetovo Tabak’ për afër gjashtë milionë euro. Ai e ka blerë dhe tokën përreth me çmim më të lirë katër ditë para se Këshilli Komunal të ndryshojë destinimin nga zonë industriale në zonë për banim kolektiv.

• LEXO: Rasti i Monopollit: Ka qenë në dorë të Kasamit të vendosë nëse aty do të ndërtohen banesa, apo jo
• LEXO: ‘Tragjedi urbane’: Tetova mbeti e betonizuar dhe pa park, Komuna nuk ka zgjeruar hapsirat e gjelbra
• LEXO: Hulumtim: Çfarë pritet të ndërtohet tek ish-Monopolli i Tetovës, a e shiti Kasami për pak para pronën publike?
• LEXO: ASh-Sela: Kasami manipuloi procesin e shitjes së parcelës së ish-Monopolit, dëmtoi buxhetin e Tetovës me 2.1 milionë euro