Tom Cruise dhe Ana De Armas ndezin thashetheme për romancë me një dalje tjetër së bashku

Tom Cruise dhe Ana De Armas janë parë për herë të dytë së bashku javën e kaluar, duke mbërritur në Heliportin Battersea pas një dite në Longcross Studios.

Ky takim vjen pas darkës së tyre të përfolur në Ditën e Shën Valentinit, duke shtuar spekulimet për një lidhje mes tyre.

Ylli 62-vjeçar i Hollywood-it u shfaq i buzëqeshur dhe i relaksuar, ndërsa ecte pranë aktores 36-vjeçare, e cila kishte zgjedhur një veshje elegante dhe të thjeshtë, shkruan DailyMail.

Të dy u panë duke biseduar me stafin dhe duke përshëndetur sigurinë, duke dhënë përshtypjen e një raporti të afërt.

Pak kohë më parë, Ana dhe Tom ishin fotografuar në Londër gjatë një darke në Soho, ku u rrethuan nga fansat dhe morën kohë për t’u ndalur e bërë fotografi me ta.

Ana u shfaq me një stil elegant dhe minimal, ndërsa Tom mbante një kostum të thjeshtë, por të kuruar.

Ky takim i fundit vjen mes spekulimeve për jetën sentimentale të të dy aktorëve. Ana është parë më parë në një moment romantik në Madrid me Manuel Anido Cuesta, duke lënë të kuptohet se ka përfunduar lidhjen me Paul Boukadakis.

Nga ana tjetër, Tom ka pasur një jetë dashurie mjaft të përfolur dhe është martuar tri herë më parë.

Në një intervistë të fundit, Ana e përmendi Tom Cruise si një frymëzim për përkushtimin e tij ndaj punës, duke theksuar se e kupton plotësisht përse ai i kryen vetë skenat e rrezikshme.

Romanca mes dy aktorëve mbetet ende në nivel thashethemesh, por daljet e tyre të shpeshta së bashku vetëm sa e shtojnë kuriozitetin e fansave.