Tre pacientë të lënduar në Koçan sot kthehen nga Suedia dhe Greqia
Ministria e Shëndetësisë informoi se tre pacientë të lënduar nga zjarri në Koçan po kthehen sot në vend, prej të cilëve dy ishin të shtruar në Greqi dhe një në Suedi, transmeton Portalb.mk. Sipas protokolleve, ata do të mbahen nën vëzhgim për 24 orë. Në Serbi mbeten të shtruar 23 pacientë, në Bullgari 14, në […]
Ministria e Shëndetësisë informoi se tre pacientë të lënduar nga zjarri në Koçan po kthehen sot në vend, prej të cilëve dy ishin të shtruar në Greqi dhe një në Suedi, transmeton Portalb.mk.
Sipas protokolleve, ata do të mbahen nën vëzhgim për 24 orë.
Në Serbi mbeten të shtruar 23 pacientë, në Bullgari 14, në Turqi 10, në Greqi 8, në Slloveni 4, ndërsa në Hungari, Kroaci, Spanjë, Austri dhe Lituani nga 3 pacientë. Në Itali dhe Poloni është shtruar nga një pacient.
Në Shkup, në Klinikën e Toksikologjisë, dje u shtrua një pacient pas kthimit nga Polonia, i cili sot do të lirohet për trajtim në shtëpi.
Në Klinikën e Kirurgjisë Plastike mbeten dy pacientë, ndërsa në Klinikën Kirurgjike “Shën Naum i Ohrit” gjenden 6 pacientë.
Në Spitalin e Përgjithshëm “8 Shtatori” janë të shtruar 5 pacientë, nga të cilët njëri pritet të lirohet sot për trajtim shtëpiak.
Në Klinikën e Pulmologjisë ndodhen dy pacientë, ndërsa në spitalin privat “Sistina” janë të shtruar tre pacientë.
“Ministria e Shëndetësisë po ndjek me kujdes gjendjen e pacientëve të lënduar dhe mbetet në komunikim të vazhdueshëm me ekipet mjekësore brenda dhe jashtë vendit, e përkushtuar për të siguruar kujdesin më të mirë të mundshëm për të prekurit nga tragjedia në Koçan”, thanë nga Ministria e Shëndetësisë.
Në zjarrin që ndodhi më 16 mars në diskotekën “Pulse” në Koçan, kanë humbur jetën 59 persona, ndërsa kishte 196 të lënduar që trajtohen brenda dhe jashtë vendit.
Sipas hetimeve të deritanishme nga institucionet, diskoteka ka punuar me një sërë shkeljesh të mëdha: nuk kishte rrjet hidranti dhe mjaftueshëm aparate PP, përdoreshin materiale piroteknike në mënyrë të paligjshme, nuk kishte as leje pune të ligjshme dhe nuk ishte lidhur asnjë kontratë me shkrim mes organizatorit dhe grupit interpretues.
Prokuroria në Koçan dhe Prokuroria për Ndjekjen e Krimit të Organizuar dhe Korrupsionit kanë identifikuar si të dyshuar gjithsej 34 persona dhe tre kompani për krime të rënda kundër sigurisë publike. Ndërkaq, Ministria e Punëve të Brendshme ka ngritur kallëzime penale kundër tyre, në mesin e tyre ka ish-funksionarë shtetërorë. Në paraburgim janë 24 persona.
