Trumpi “merr pushtetin” para koheTrumpi “merr pushtetin” para kohe

Qëkur fitoi zgjedhjet e muajit të kaluar, Trumpi ka qenë shumë më i zëshëm se presidenti në largim Joe Bideni. Do të ishte shumë e lehtë të ngatërrohej me presidentin aktual. Ai ka marrë kontrollin mbi politikën e jashtme të së ardhmes, u ka prirë liderëve botërorë gjatë një udhëtimi në Paris, teksa titanët e teknologjisë janë dyndur për t’u takuar me të.

Donald Trumpi është duke kaluar kohën më të mirë të jetës së tij.

“Në këtë mandat, të gjithë duan të jenë miqtë e mi”, ka thënë presidenti i zgjedhur amerikan në resortin e tij Mar-a-Lago të hënën, duke shijuar vërshimin e nderimit nga liderët e huaj, shefat ekzekutivë të kompanive të mëdha dhe të tjerë, teksa po përgatitet për mandatin e tij të dytë.

Qëkur i fitoi zgjedhjet e muajit të kaluar, Trumpi ka qenë shumë më i zëshëm se Joe Biden dhe do të ishte shumë e lehtë të ngatërrohej me presidentin aktual. Ai ka marrë kontrollin mbi politikën e jashtme të së ardhmes, u ka prirë liderëve botërorë gjatë një udhëtimi në Paris, teksa titanët e teknologjisë janë dyndur për t’u takuar me të.

Ai tashmë e ka fuqinë. E vetmja gjë që mungon është autoriteti kushtetues i dhënë nga betimi që ai do ta bëjë më 20 janar.

“Në mandatin e parë, të gjithë po më luftonin”, ka thënë Trumpi në konferencën e tij për shtyp.
“Dallimi më i madh është se njerëzit duan të kalojnë mirë me mua këtë herë”, ka shtuar ai.

Pyetja është se sa do të zgjasin kohët e mira kur Trumpi të dalë nga “flluska e tij” pas fitores, dhe të rikthehet te një komb i ndarë, i rrethuar me probleme dhe te një botë e rrezikshme, ku ai nuk pëlqehet shumë.

Por tani për tani, Trumpi mund të ëndërrojë.

“Kjo do të jetë periudha më emocionuese dhe e suksesshme e reformave dhe e rilindjes në të gjithë historinë amerikane, ndoshta edhe të historisë globale. Epoka e Artë e Amerikës, e quaj këtë. Ka filluar”, ka thënë ai.

Trumpi asnjëherë nuk është dukur aq i qetë apo i gëzuar kur ishte i ngarkuar me pushtetin e presidentit. Dhe është e sigurt që sapo të kthehet në tavolinën e Zyrës Ovale, barra e tij do të jenë shumë më e rëndë sesa tani.

Ai po jeton më të mirën e të gjitha kohërave, duke shijuar edhe më tej emocionet e fitores dhe ndjenjën e shfajësimit ndaj hakmarrjes për atë që ai e sheh humbje si pasojë e mashtrimit në zgjedhjet e vitit 2020. Ai nuk fitoi katër vjet më parë, por këtë vit fitoi votën popullore dhe Kolegjin Zgjedhor.

Deri më tani, duket se shumica e amerikanëve e miratojnë. Një sondazh i CNN/SSRS i publikuar javën e kaluar zbuloi se 54% e të anketuarve presin që Trumpi të bëjë një punë të mirë me kthimin e tij në Shtëpinë e Bardhë, dhe 55% miratojnë mënyrën se si ai po e trajton tranzicionin e tij deri më tani. Ky është një territor marramendës për politikanin më polarizues të kohëve moderne.

Shansi unik i Trumpit

Trumpi po përjeton një shans që vetëm një president në histori, Grover Cleveland, e ka njohur: të fillojë mandatin e tij të dytë nga e para. Si presidenti i dytë në historinë e SHBA-së që fiton një mandat jo të njëpasnjëshëm, ai mund të marrë mësim nga gabimet e presidencës së tij të parë dhe të fillojë përsëri me një ekip dhe plan të ri. Një arsye pse shumica e mandateve të dyta janë të vështira është se presidentët në detyrë nuk mund t’u shpëtojnë kurrë pasojave të vendimeve, dramave dhe skandaleve të tyre të mandatit të parë.

Megjithatë, Trumpi ka pasur katër vjet jashtë pushtetit për të identifikuar një ekip që do të kënaqte impulset e tij të egra më shumë se gjeneralët, të brendshmit e Uashingtonit dhe republikanët themeltarë të cilët u përpoqën ta kufizonin atë në lëvizjen e parë.

Përveç humbjes së Matt Gaetz, zgjedhja e parë e tij për prokuror të Përgjithshëm, gjërat vështirë se mund të kishin shkuar më mirë deri më tani. Njeriu më i pasur në botë, Elon Musk, është shoku i tij i ri. Shumica e zgjedhjeve të tij provokuese të kabinetit pritet të konfirmohen nga senatorët e butë republikanë. Drejtuesit e industrisë së teknologjisë, ndërkohë, po nxitojnë ta takojnë atë në vilën e tij Mar-a-Lago në Florida dhe të mbushin arkat e llogarisë së tij inauguruese.

Kjo është një nga shumë shenjat se ndonëse Trumpi do të jetë një njeri me pak pushtet e me mandat të kufizuar, pushteti i tij në fillim të presidencës së dytë do të jetë i shtrirë dhe potencialisht i pakontrolluar për shkak se republikanët mbajnë monopolin në Kongres dhe për shkak të një vendimi të Gjykatës së Lartë që u dha presidentëve një masë të konsiderueshme imuniteti për veprimet zyrtare në detyrë. (Përjashtuar vendimin e gjykatësit të Manhatanit, i cili kryesoi trupin gjykues që mori vendimin për dënimin e Trumpit në rastin e njohur për “paratë për heshtje”, i cili vendosi se ai nuk kishte të drejtë për imunitet presidencial në këtë çështje. Megjithatë, prokurorët kanë pranuar se ai nuk do të dënohet gjatë kohës që është në detyrë).

Shfaqja aktuale e Trumpit mund të shpjegohet gjithashtu duke e krahasuar atë me mandatin e tij të parë. Në fillim të vitit 2017, ai ishte tashmë i fiksuar në pretendimet se fitorja e tij ishte njollosur nga ndërhyrja ruse në zgjedhje. Por në nëntor të këtij viti Trumpi nuk fitoi vetëm presidencën. Rimarrja e pushtetit presidencial i jep atij autoritetin për të shlyer një sërë çështjesh ligjore aktive kundër tij që kërcënuan karrierën e tij politike dhe lirinë e tij.

Priten vendime të vështira

Pavarësisht të gjithave, largimi i Trumpit nga realiteti nuk do të zgjasë përgjithmonë.

Sapo të marrë detyrën, çdo vendim që ai merr do të ketë një kundër-reagim që rrezikon të ndikojë në kapitalin e tij politik dhe të ringjallë skepticizmin publik për një president që historikisht ka qenë një figurë shumë përçarëse.

Nëse Trumpi dështon të përmbushë në mënyrë efektive premtimet e fushatës së tij për të ulur çmimet, për të krijuar prosperitet historik dhe për të marrë kontrollin e kufirit, ai shumë shpejt mund të shohë që vlerësimet për të kanë rënë.

Tashmë janë shfaqur shenja shqetësuese për mbështetësit e Trumpit. Ai i ka thënë revistës “Time” në një intervistë të botuar javën e kaluar se ndonëse do të donte të ulte koston e produkteve ushqimore “është e vështirë t’i ulësh ato pasi të rriten”.

“E dini, është shumë e vështirë”, është shprehur ai.

Ndërkohë të hënën, Trumpi ka paralajmëruar se pas zotimit për t’i dhënë fund luftës në Ukrainë brenda 24 orëve nëse zgjidhet president, realiteti mund të jetë shumë më i vështirë.

“Mendoj se Lindja e Mesme do të jetë në një pozicion të mirë. Mendoj se në fakt më e vështirë do të jetë situata Rusi-Ukrainë”, ka deklaruar Trumpi.

Komenti i Trumpit nuk pasqyron vetëm një nënvlerësim pothuajse komik të rreziqeve që fshihen në Lindjen e Mesme por edhe mungesën e ndikimit mbi mikun e tij, presidentin Vladimir Putin, në kohën kur fusha e betejës është në favor të Rusisë.

Dhe teksa mosrespektimi i premtimeve të tij mund ta dëmtojë Trumpin, ai mund të dëmtohet edhe më shumë nëse në të vërtetë i përmbush premtimet për të tronditur Washingtonin, vendin dhe botën, pasi valët pasuese të përçarjes mund të shkaktojnë goditje sociale dhe ekonomike.

Për shembull, operacioni i planifikuar i dëbimit masiv i Trumpit shumë lehtë mund të rezultojë i papëlqyer nëse amerikanët janë dëshmitarë të skenave të mjerimit njerëzor, nëse familjet e emigrantëve ndahen, ose nëse zbatimi ngadalëson prodhimin bujqësor që do të thotë se blerësit nuk mund të marrin frutat dhe perimet e tyre të preferuara.

Kërcënimet tarifore të Trumpit kundër Kanadasë, Meksikës dhe kombeve të tjera mund ta bëjë atë që të përballet me emigrantët dhe të kërkojë një marrëveshje më të mirë për punëtorët.

Premtimi i Trumpit për t’i falur sapo të vijë në pushtet mbështetësit e burgosur për sulmin e 6 janarit 2021 nga turma në Kapitolin e SHBA-së mund të rezultojë gjithashtu të jetë shumë jopopullor.

Dhe e gjithë kjo nuk merr parasysh luftën fraksionale brenda ekipit të Trumpit dhe shpërthimet e tij të temperamentit që ndoqën mandatin e tij të parë dhe kufizuan efektivitetin e tij si komandant i përgjithshëm. Duket e pamundur, siç spekuloi presidenti i zgjedhur në konferencën e tij për shtyp në Florida, që “personaliteti im ka ndryshuar”.

Por Trumpi gjithashtu duhet ta bëjë kombin për vete në kohë krize. Nëse votuesit e moderuar fillojnë të kuptojnë se ai është i prirë për të ndëshkuar armiqtë politikë ose për të ndjekur një agjendë personale, apeli që e ndihmoi atë të fitonte zgjedhjet mund të zhduket.

Edhe gjatë konferencës për shtyp të Trumpit të hënën, u vërejt që krizat dhe vendimet e rënda që ai i përmendte gjatë fushatës zgjedhore filluan të materializohen.

Një reporter ngriti çështjen e përshpejtimit të pasurimit të uraniumit nga Irani. Kjo mund të paraqesë, në një moment të ardhshëm, një president i cili është i vendosur të shmangë luftërat e reja, ose të jetë komandanti i përgjithshëm që lejon Republikën Islamike të ketë një bombë bërthamore.

“Është një pyetje e mrekullueshme. Pse duhet ta them atë?”, ishte përgjigja e Trumpit.

Presidenti i zgjedhur disa herë ka përsëritur paralajmërimin e tij se lufta në Ukrainë duhet të përfundojë. Por ai nuk ka treguar asnjë shenjë se ka ndonjë ide, teksa ka vajtuar dëmet e tmerrshme të shkaktuara në qytetet e Ukrainës, si dhe trazirat në Lindjen e Mesme të shkaktuara nga sulmet e Hamasit ndaj Izraelit më 7 tetor 2023.

“Çfarë turpi. Nuk duhej të kishte ndodhur kurrë. Nuk do të kishte ndodhur kurrë. Nëse do të isha president, ajo luftë nuk do të kishte ndodhur kurrë”, ka thënë Trumpi.

Një anë më e keqe e Trumpit, e cila nxit frikën midis kundërshtarëve se ai do të përpiqet të shtypë demokracinë dhe lirinë politike, është shfaqur gjithashtu.

Konferenca e gjatë për shtyp e presidentit të zgjedhur ishte e mbushur me gënjeshtra, teori konspirative dhe fakte haptazi të rreme si kurrë më parë.

Trumpi ka thënë se po planifikon të padisë gazetën “Des Moines Register” lidhur me sondazhin e saj përfundimtar të votuesve të Iowa-s që tregoi se ai nuk ishte para Kamala Harrisit, për të cilin ai pretendoi se ishte një rast i ndërhyrjes në zgjedhje.

Ai ka thënë se do të marrë gjithashtu masa kundër “60 Minutes” të CBS-së për shkak të pakënaqësisë së tij për mënyrën se si u prezantua një intervistë me Harrisin.

Nëse një president mund të ndikojë në një organizate mediatike për rezultatet e votimit ose zgjedhjet e saj editoriale, të drejtat themelore të konsideruara prej kohësh si të mirëqena do të sulmohen në një mandat të dytë.

Megjithatë, tani për tani, Trumpi është kryesisht i fiksuar te fitorja e tij dhe adhurimi që po nxit. Ai ka thënë se mbi 100 liderë botërorë e kanë thirrur për ta uruar “jo vetëm për zgjedhjet, por madhështinë e zgjedhjeve dhe shtrirjen e fitores”.

“Kam folur me zyrtarë të mbi 100 vendeve. Nuk do ta besoni se sa shtete janë”, ka thënë Trump.

The post Trumpi “merr pushtetin” para koheTrumpi “merr pushtetin” para kohe appeared first on InfoShqip.com.