Uashingtoni: Irani po dorëzohet ekonomikisht, marrëveshja po vjen

Negociatorët amerikanë dhe iranianë kanë arritur përparim në bisedimet e sotme dhe janë afruar drejt një marrëveshjeje kornizë për përfundimin e luftës, kanë deklaruar dy zyrtarë amerikanë, sipas portalit amerikan Axios.

Dy palët kundërshtare, me ndërmjetësimin e Pakistanit, Egjiptit dhe Turqisë, po përpiqen të mbyllin dallimet e mbetura dhe të arrijnë një marrëveshje para se të skadojë armëpushimi më 21 prill. Një delegacion pakistanez i kryesuar nga komandanti i ushtrisë, feldmarshali Asim Munir, ka mbërritur sot në Teheran për bisedime me përfaqësues iranianë.

Zyrtarë amerikanë dhe burime të njohura me ndërmjetësimin paralajmërojnë se marrëveshja nuk është e garantuar për shkak të dallimeve të mëdha mes palëve.

“Le të presim dhe të shohim nëse mund të arrihet marrëveshje. Shpresojmë dhe po përpiqemi të inkurajojmë të dy palët,” tha një zyrtar pakistanez.

Ekipi negociator i presidentit amerikan Donald Trump ka vazhduar sot bisedat telefonike dhe shkëmbimin e propozimeve me iranianët dhe ndërmjetësit.

“Po flasin në telefon dhe po ndërmjetësojnë bisedimet me të gjitha vendet dhe po afrohen drejt marrëveshjes,” tha një zyrtar amerikan.

Një tjetër konfirmoi se sot është bërë përparim.

“Ne duam të arrijmë marrëveshje. Dhe pjesë të qeverisë së tyre duan marrëveshje. Tani sfida është të bindet e gjithë qeveria e tyre,” tha një tjetër zyrtar amerikan.

Një raund i ri bisedimesh ballë për ballë mund të zhvillohet në ditët në vijim, para skadimit të armëpushimit, por data ende nuk është përcaktuar.

Sipas zyrtarëve amerikanë, bllokada detare e vendosur nga Trump dhe kriza ekonomike në rritje po shtojnë presionin mbi Iranin për të pranuar marrëveshjen.

“Irani nuk ka para. Janë të falimentuar. Ne e dimë këtë, dhe ata e dinë që ne e dimë këtë,” tha një zyrtar amerikan.(INA)