Uji në Shkup është i sigurt për t’u pirë

Qytetarët e Shkupit konsumojnë ujë plotësisht të sigurt, si nga aspekti teknik ashtu edhe ai mikrobiologjik, njoftoi këtë mëngjes Sektori për Kontroll Sanitar pranë NP “Ujësjellësi dhe Kanalizimi” – Shkup.

Matjet më të fundit laboratorike, të kryera gjatë javës së kaluar në dhjetëra pika matëse në të gjithë kryeqytetin, konfirmojnë se të gjithë parametrat janë brenda kufijve të lejuar.

Nga ndërmarrja publike bëjnë të ditur se raporti javor për cilësinë e ujit të pijshëm publikohet rregullisht, me qëllim garantimin e transparencës së plotë ndaj qytetarëve.

Mostrat janë marrë në një numër të madh lokacionesh gjatë javës së punës, për të kryer analiza të detajuara të përbërjes fiziko-kimike dhe mikrobiologjike të ujit.

Sipas të dhënave të publikuara nga ndërmarrja, gjatë periudhës 20–24 korrik, Sektori për Kontroll Sanitar ka marrë 195 mostra për analiza fiziko-kimike dhe 195 mostra për analiza mikrobiologjike të ujit të pijshëm nga 45 pika matëse në territorin e Qytetit të Shkupit.

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.