A po partizohen shërbimet sekrete!  

Nga LSDM thonë se Hristovski nuk ka certifikatë “sekret shtetëror” dhe kërkesë për një certifikatë të tillë e ka paraqitur vetëm pasi është emëruar drejtor i Agjencisë për Siguri Kombëtare me direktivë partiake. Ndërkaq, nga partia në pushtet, VMRO-DPMNE, thonë se Qeveria e udhëhequr prej tyre është e vendosur që ta kthejë besimin e qytetarëve në institucionet

Drejtori i sapoemëruar i Agjencisë për Siguri Kombëtare, Bojan Hristovski, ende është shkaktar i përplasjeve mes opozitares LSDM dhe partisë në pushtet VMRO-DPMNE. Nga LSDM thonë se Hristovski nuk ka certifikatë “sekret shtetëror” dhe kërkesë për një certifikatë të tillë e ka paraqitur vetëm pasi është emëruar drejtor i Agjencisë për Siguri Kombëtare me direktivë partiake.

“ASK si shërbim sigurie ka shumë informacione të klasifikuara të nivelit më të lartë, ndaj të cilave drejtori aktual nuk ka të drejtë të ketë njohuri deri sa të marrë certifikatën. Kjo konfirmon të gjitha dyshimet nëse Hristovski i plotëson kushtet ligjore për të qenë në një pozitë kaq të lartë. Mbetet e hapur pyetja nëse Hristovski ka certifikatë për njohjen e gjuhës angleze sepse ka dorëzuar vërtetim nga një shkollë në Plovdiv-Bullgari, dhe nuk ka fare qendër testimi TOEFL në Plovdiv. Po ashtu, është e hapur edhe pyetja nëse Hristovski ka 5 vjet përvojë në pozita udhëheqëse në përputhje me kërkesat ligjore?. Biografisë së tij të publikuar i mungojnë datat e sakta për përvojën e tij menaxheriale në ASK në periudhën 2012-2017. VMRO-DPMNE partizon brutalisht institucionet dhe me emërimin e drejtorit të ASK-së çon në shkatërrimin e plotë të strukturave të sigurisë. LSDM kërkon tërheqjen e Hristovskit dhe emërimin e drejtorit të ri të ANB-së në përputhje me të gjitha rregulloret dhe normat ligjore”, thuhet në njoftimin e LSDM-së.

Nga partia në pushtet, VMRO-DPMNE, thonë se Qeveria e udhëhequr prej tyre është e vendosur që ta kthejë besimin e qytetarëve në institucionet. VMRO-DPMNE akuzoi LSDM-në se kuadro partiake ishin vendosur në krye të institucioneve derisa ishin në pushtet.

“LSDM është e njohur në popull si simbol i gënjeshtrës, manipulimeve dhe partizimit të shtetit dhe institucioneve të sistemit. LSD-ja tregoi dhe dëshmoi se është simbol i keqpërdorimit të resurseve shtetërore për qëllime private dhe partiake dhe i ktheu institucionet. të sistemit në selinë e partisë nuk i kurseu as disa nga institucionet më kyçe, të cilat janë shtyllat e sigurisë së shtetit, përfshirë edhe Agjencinë e Sigurisë Kombëtare (ASK). Dimovski ka qenë funksionar shumëvjeçar i partisë dhe i organeve më të larta të LSD-së, përfshirë edhe Bordin e tyre Ekzekutiv, këtë e vërtetojnë edhe me fotografi që e tregojnë bukur, qartë dhe saktë në mesin e anëtarëve të tjerë të LSD-së. Nga fotografitë e bashkangjitura shihet se Dimovski përveç në kryesinë qendrore ka qenë edhe anëtar i Këshillit Diplomatik të tyre. Angazhimet partiake të Viktor Dimovskit nuk mbarojnë me kaq, ai ka marrë pjesë edhe në krijimin e politikave të LSD-së, duke marrë pjesë në manifestime publike dhe debate partiake në selinë e tyre partiake. Ju kujtojmë edhe partizimin e DSK-së kur SDS-ja emëroi Mile Zeçeviqin për drejtor, i cili dikur ishte zyrtar i lartë partiak, i cili më vonë u bë sekretar i përgjithshëm”, thuhet në komunikatën e VMRO-DPMNE-së.

Ndërkaq, nga BDI kanë akuzuar se gjatë kësaj periudhe po ndodh presioni i vazhdueshëm tek të punësuarit për të nënshkruar deklaratat që vullnetarisht lëshojnë vendet e punës dhe kryesisht në pozicionet udhëheqëse, e gjithë kjo më qëllim që të mos vazhdohet me procedura administrative dhe gjyqësore. “Ky hov i mbrapsht që ka marrë kjo qeveri monoetnike, nuk kursen asnjë institucion, qofshin edhe ato ku me standarde dhe rregulla si vendore po ashtu edhe ndërkombëtare kërkohet të udhëhiqen nga kuadro apolitik dhe shumë professional. Se është kështu, dëshmon edhe përzgjedhja e fundit që e bëri Qeveria, me emërimin në krye të ASK, kuadrin e VMRO-DPMNE-së, Bojan Hristovski, i cili në shkurt të vitit2023 ishte emëruar kryetar i komitetit të VMRO-DPMNE në qytetit e Shkupit. Kjo përzgjedhje, ka hapur shumë dilema, ku me të drejtë mund edhe të dyshojmë se intenca është institucionet e sigurisë të kthehen në çerdhe partiake”, thonë nga BDI dhe shtojnë se situata aspak nuk ndryshon edhe në mbrojtje. Edhe atje degradohen kuadrot shqiptare, siç ishte rasti kur presidentja Siljanovska emëroi për shef të shtatmadhërisë një kuadro që nuk plotëson kushtet e duhura për të qenë në këtë pozitë.

Ndryshe, Bojan Hristovski u emërua drejtor i ri i Agjencisë së Sigurisë Kombëtare në një mbledhje të qeverisë javën e kaluar. Hristovski zëvendësoi në karrigen e drejtorit në ASK drejtorin e mëparshëm Zharko Millosevski, i cili u shkarkua. Hristovski vjen në pozitën e re nga Ministria e Punëve të Brendshme dhe si kuadër i VMRO-DPMNE-së, pas zgjedhjeve lokale të vitit 2021, për një periudhë të shkurtër menaxhoi “Parkingun e Qytetit”. Hristovski deri vonë ishte edhe kryetar i Komitetit të qytetit të VMRO-DPMNE-së për Shkupin, por në Qeveri thonë se Hristovski u largua nga partia në vitin 2023. (koha.mk)

The post A po partizohen shërbimet sekrete!   appeared first on Flaka, në çdo lajm... .