Arrestimi i Veliajt, reagon BE: SPAK duhet të ushtrojë funksionin pa presione dhe ndërhyrje politike

Bashkimi Europian ka reaguar ditën e sotme në lidhje me arrestimin e kryetarit të Bashkisë së Tiranës, Erion Veliaj dhe debatit që po zhvillohet ditët e fundit për këtë ngjarje politike.

Përmes një reagimi zyrtar, BE thotë se SPAK duhet të ushtrojë funksionin pa presione dhe ndërhyrje politike, pasi kjo është thelbësor për shtetin e së drejtës.

Reagimi i plotë:

“Po ndjekim nga afër zhvillimet e fundit në lidhje me hetimin ndaj Kryetarit të Bashkisë së Tiranës. Megjithatë, BE-ja nuk komenton mbi procedurat gjyqësore në vazhdim.

Reforma në sektorin e drejtësisë dhe forcimi i shtetit të së drejtës në Shqipëri janë elementë kyç në procesin e anëtarësimit në Bashkimin Evropian.

BE-ja mbetet e përkushtuar maksimalisht për të mbështetur përpjekjet e Shqipërisë në ndjekjen e këtyre reformave dhe për ta ndihmuar vendin të konsolidojë efikasitetin, pavarësinë, llogaridhënien dhe profesionalizmin e institucioneve të saj, si dhe përputhshmërinë e tyre me standardet e BE-së, si në sektorin e zbatimit të ligjit ashtu edhe në atë të drejtësisë.

Roli specifik i Strukturës së Posaçme kundër Korrupsionit dhe Krimit të Organizuar (SPAK) dhe pavarësia e saj në hetimin, ndjekjen penale dhe gjykimin e rasteve komplekse të korrupsionit, pa asnjë përpjekje për ndërhyrje politike apo presion të padrejtë, janë me rëndësi thelbësore për konsolidimin e shtetit të së drejtës në Shqipëri.”