Dalin detaje për shkakun e vde*kjes së Ambasadores Kaidanow, NYT shkruan edhe për letrën e Biden drejtuar vëllait të saj -përmendet Kosova

Gazeta The New York Times ka shkruar rreth vdekjes së Tina Kaidanow, e cila ishte ambasadorja e parë e SHBA-së në Kosovë pas shpalljes së pavarësisë në vitin 2008.

Vdekja e saj në media u raportua më 16 tetor, ndërsa NYT shkruan se Kaidanow vdiq më 14 tetor në Uashington, në moshën 59 vjeçare.

Shkaku i vdekjes së saj është arresti kardiak, kështu u shpreh vëllai i saj, Eric Kaidanow.

Ajo ishte shtruar në Spitalin e Universitetit Georgetown për tre javë ndërsa mjekët po përpiqeshin të gjenin burimin e gjakderdhjes së brendshme, tha vëllai i saj, transmeton Gazeta Express.

Gjatë tre dekadave, Kaidanow mbajti një numër detyrash në shërbimin e jashtëm dhe politikën e jashtme, duke përfshirë drejtimin e byrove të kundër-terrorizmit dhe çështjeve politike të Departamentit të Shtetit dhe shërbyer si zëvendës ambasadore në Kabul, Afganistan.

Një fokus i madh i punës së Kaidanow kishte qenë në Ballkan, duke adresuar konfliktet dhe ndërlikimet e shkaktuara nga shpërbërja e Jugosllavisë, shkruan NYT.

“Ajo filloi karrierën e saj si oficere konsullore në Beograd në vitin 1995, punoi në Sarajevë që nga viti 1997 dhe më pas u zhvendos në Shkup, Maqedoni, në vitin 1998 si asistente speciale e dërguarit për krizën në Kosovë, Ambasadorit Christopher R. Hill.

Nga viti 2006 deri në 2008, ajo shërbeu si diplomate e lartë, e njohur si shefe e misionit në Prishtinë, kryeqytetin e Kosovës, dhe krijoi lidhje me kosovarët që planifikonin pavarësinë e tyre. Pasi Kosova u shkëput nga Serbia, Presidenti George Ë. Bush e emëroi atë ambasadore në atë shtet të ri të pavarur”, thuhet në këtë artikull.

“Kam dëshmuar traumën e luftës dhe fuqinë e përfshirjes së SHBA-së në sjelljen e paqes në rajon dhe mbajtjen e asaj paqeje,” tha ajo në seancën e saj të konfirmimit në Senat në qershor 2008.

Presidenti Biden shprehu ngushëllimet për vdekjen e saj në një letër drejtuar vëllait të saj, të hënën.

“Puna e saj për të themeluar praninë zyrtare të ambasadës sonë në Prishtinë ndihmoi në zhvillimin e një demokracie të fortë, të qëndrueshme dhe të suksesshme dhe paqe më të gjerë në rajon,” tha ai, duke shtuar se si zëvendës-president ishte informuar nga Kaidanow në Kosovë.

Në një deklaratë në rrjetin social X, Presidentja e Kosovës Vjosa Osmani e quajti atë “një udhëheqëse të guximshme dhe të patrembur që luajti një rol të thellë në shumë ngjarje kritike dhe historike para dhe pas shpalljes së pavarësisë së Kosovës.”

Tina Susan Kaidanow lindi më 3 qershor 1965 në Filadelfia nga prindërit Esther dhe Howard Kaidanow dhe u rrit në qarkun Baltimore, Maryland.

Ajo mori diploma bachelor dhe master në shkencat politike nga Universiteti i Pensilvanisë dhe një tjetër master në shkencat politike nga Universiteti Columbia, ku gjithashtu përfundoi një certifikatë në studime ruse nga Instituti Harriman.