Ganiu kujtoi “ngjarjet e Bit Pazarit”

Kryetari i komunës së Çairi, Visar Ganiu, ka kujtuar sot “ngjarjet e Bit Pazarit që ndodhën më 6 dhe 7 nëntor 1992, me çrast ka pritur familjarët e viktimave – Muhjedin Sjefullai, Arijanit Ibrahimi, Selman Memishi dhe Tina Geskoska – si dhe anëtarët e Këshillit Organizativ të “Ngjarjeve të Bit Pazarit”.

Më poshtë mund ta lexoni të plotë postimin e kryetarit të Çairit, Visar Ganiu

Kujtimi i ngjarjeve të Bit Pazarit, që ndodhën më 6 dhe 7 nëntor 1992, është një moment i rëndësishëm për qytetin tonë dhe për të gjithë ata që kanë vuajtur nga ato tragjedi. Sot, gjatë takimit me familjarët e viktimave – Muhjedin Sjefullai, Arijanit Ibrahimi, Selman Memishi dhe Tina Geskoska – si dhe me anëtarët e Këshillit Organizativ të “Ngjarjeve të Bit Pazarit”, u ndamë së bashku në reflektime të thella për dhimbjen që ata kanë përjetuar.

Familjarët shprehën ende dhimbjen e thellë për humbjet që kanë pasur, dhe gjithashtu theksuan rëndësinë e përkujdesjes për kujtimin e të dashurve të tyre. Këshilli Organizativ theksoi se këto ngjarje duhet të mbeten të gjalla në kujtesën e qytetit tonë, jo vetëm si një kujtim i dhimbshëm, por si një mësim për të ardhmen.

Për të ruajtur këtë kujtim dhe për të nderuar viktimat, së shpejti do të vendoset një pllakë përkujtimore që do të shërbejë si simbol i respektit dhe nderimit për ata që humbën jetën. Po ashtu, është duke u punuar për botimin e një monografie që do të dokumentojë ngjarjet e 6 dhe 7 nëntorit të vitit 1992, për t’i dhënë një pasqyrë më të plotë dhe të drejtë këtyre ngjarjeve në historinë tonë.

Si kryetar i Komunës, angazhimi ynë është që të ruajmë dhe nderojmë kujtimin e viktimave, duke siguruar që historia e tyre të mbetet pjesë e identitetit tonë dhe të përçojë mesazhe paqeje dhe bashkëjetese ndër-etnike për brezat e ardhshëm.