Këshilli i Prokurorëve Publikë dha mendim negativ për shkarkimin e Kocevskit

Këshilli i Prokurorëve Publik ka dhënë mendim negativ për propozimin e Qeverisë për shkarkimin e prokurorit publik Kocevski. Gjashtë prej anëtarëve ishin “kundër” propozimit të qeverisë për shkarkim dhe tre u shprehën në favor të shkarkimit, transmeton Portalb.mk.

Mediat nuk kanë mundur të dëgjojnë argumentet nga diskutimi për shkak se është përjashtuar opinioni, me arsyetimin se do të diskutohet edhe për procedura disiplinore dhe për të mbrojtur integritetin dhe reputacionin e prokurorit të shtetit, por kanë thënë se publiku do të mund të lexojë argumentet nga procesverbali i seancës, i cili do të miratohet dhe publikohet në periudhën e ardhshme.

• LEXO: Këshilli i Prokurorëve Publikë diskuton me dyer të mbyllura shkarkimin e Kocevskit, vendosi ta përjashtojë publikun

Tre anëtarët që përkrahën propozimin e qeverisë për shkarkimin e Kocevskit janë Ardijan Demiri dhe Keti Petkova të zgjedhur nga Kuvendi si dhe Marijana Ilieska e zgjedhur nga prokurorët.

Në përputhje me dispozitat ligjore, në seancë nuk ishte i pranishëm prokurori i shtetit, i cili përndryshe është anëtar i Këshillit të Prokurorëve Publikë sipas detyrës zyrtare.

Ai i ka dërguar përgjigje me shkrim ndaj propozimit për shkarkimin nga qeveria. Qeveria njoftoi se do të ndërpresë procedurën për shkarkimin e Kocevskit për shkak të hetimit të tragjedisë së Koçanit, në mënyrë që siç tha, prokurorët t’i përkushtohen plotësisht.

Ndryshe, procedurën për shkarkimin e prokurorit publik të shtetit Ljupço Kocevski e ka iniciuar Qeveria në shkurt të këtij viti, pikërisht një vit pasi ai ka marrë këtë pozitë. Pas kalimit të seancës së qeverisë, propozimi për shkarkimin e Kocevskit mbërriti në Këshillin e Prokurorëve Publikë në fillim të marsit.

Propozimin për shkarkimin e tij Kocevski e ka marrë më 6 mars, dhjetë ditë para tragjedisë në Koçan.

• LEXO: Qeveria do ta ndërpresë procedurën për shkarkimin e Kocevskit, edhe Këshilli i Prokurorëve e shtyu seancën për këtë çështje