Kontrolle në repartet e mishit nëpër supermarkete, pronarët u gjobitën me 82 mijë euro

Inspektorët e ushqimit nga Agjencia e Ushqimit dhe Veterinarisë (AUV) kanë shqiptuar 29 gjoba në vlerë prej 82 mijë eurosh gjatë kontrolleve që kanë kryer në repartet e ushqimeve dhe kasapëve, si dhe në kasapitë që prodhojnë preparate të mishit të freskët, të vendosura në supermarkete, diskonto dhe hipermarkete, transmeton Portalb.mk.

Në dy ditë janë kryer 124 kontrolle të jashtëzakonshme në marketet e mëdha që kanë rrjete supermarketesh, diskonto dhe hipermarkete. Synimi i kontrolleve ishte të kontrollohej nëse operatorët janë të regjistruar në AUV, dhe në çfarë mase plotësohen kërkesat e përgjithshme dhe specifike të higjienës ushqimore, me theks në kryerjen e kontrolleve në repartet e ushqimeve dhe kasapeve, si dhe në kasapitë që prodhojnë preparate të mishit të freskët.

“Kontrolloheshte përmbushja e procedurave për pastrimin dhe dezinfektimin e pajisjeve, enëve të punës dhe parandalimin e kontaminimit të kryqëzuar, furnizimin me ujë të sigurt, posedimin e librave sanitar dhe certifikatave për formimin profesional të punonjësve pranë operatorëve, ruajtjen dhe ruajtjen e ushqimit, origjinën e tij, gjurmueshmërinë (verifikimin e dokumenteve tregtare), si dhe përputhshmërinë me regjimin e temperaturës për ushqimin nga pranimi deri ne frigorifer”, thuhet në njoftim.

Mbajtja e shënimeve për HACCP dhe praktikat e mira të prodhimit dhe higjienës, etiketimi i ushqimeve, planet e kampionimit të vetë operatorëve, zbatimi i operacioneve të paketimit/ripaketimit, dezinfektimi, kontrolli i dëmtuesve dhe kontrollet e jashtëzakonshme mbuluan gjithashtu magazinat e operatorëve.

“Tek 15 operatorë janë konstatuar kushte jo të kënaqshme higjeno-teknike në objekt, në 12 janë gjetur ushqime me afat të skaduar dhe te 5 ushqime pa gjurmueshmëri, me ambalazh të dëmtuar dhe të padeklaruar. Tre nga operatorët e kontrolluar nuk kanë kryer kontrolle të detyrueshme shëndetësore për punonjësit, 10 nuk kanë mbajtur evidencë për HACCP, higjienën e mirë dhe praktikat e mira të prodhimit. Tek 4 operatorë u gjetën produkte të etiketuara në mënyrë të papërshtatshme, ndërsa një objekt nuk ishte i regjistruar. 22.3 ton ushqime të pasigurta u shkatërruan, pjesa më e madhe e të cilave ishte mish”, thuhet në njoftimin e AUV-së.