Kosova pritet të bëjë gërmime në disa lokacione në Serbi, të dyshuara si varreza masive
Gërmimet e fundit që u zhvilluan në Kosovë për të pagjeturit po vazhdojnë ende në Podujevë. Gjatë kësaj periudhe ekipi për të kryer gërmimet kishte një rikthim në zonën veriore të Kosovës, por që ato përfunduan pa rezultate. Ndërsa gërmimet e ardhshme, pas Podujevës, pritet të vazhdojnë në disa lokacione duke përfshirë kufirin e Malit […]
![Kosova pritet të bëjë gërmime në disa lokacione në Serbi, të dyshuara si varreza masive](https://orainfo.net/wp-content/uploads/2024/07/664192-kosova-pritet-te-beje-germime-ne-disa-lokacione-ne-serbi-te-dyshuara-si-varreza-masive.jpg)
![kosova-pritet-te-beje-germime-ne-disa-lokacione-ne-serbi,-te-dyshuara-si-varreza-masive](https://orainfo.net/wp-content/uploads/2024/07/664192-kosova-pritet-te-beje-germime-ne-disa-lokacione-ne-serbi-te-dyshuara-si-varreza-masive.jpg)
Gërmimet e fundit që u zhvilluan në Kosovë për të pagjeturit po vazhdojnë ende në Podujevë. Gjatë kësaj periudhe ekipi për të kryer gërmimet kishte një rikthim në zonën veriore të Kosovës, por që ato përfunduan pa rezultate.
Ndërsa gërmimet e ardhshme, pas Podujevës, pritet të vazhdojnë në disa lokacione duke përfshirë kufirin e Malit të zi, në afërsi të Krushës.
Kryesuesi i Komisionit Qeveritar për Personat e Zhdukur, Andin Hoti, thotë për FrontOnline se presin që brenda këtij vitit të trajtohen së paku dy lokacione të dyshuara si varreza masive në Serbi, por pa treguar se për cilat lokacione bëhet fjalë.
Ndërsa Bajram Qerkini, përfaqësues i Shoqatës së Familjarëve të Personave të Pagjetur, kritikoi punën e Qeverisë “Kurti” lidhur me personat e pagjetur, duke thënë se krejt çka ata kanë bërë ishte veç t’i siguronin karriget dhe arsyetuar pagat që i marrin.
Hoti: Presim që brenda këtij vitit të trajtohen së paku dy lokacione të dyshuara si varreza masive në Serbi
Kryesuesi i Komisionit Qeveritar për Personat e Zhdukur, Andin Hoti thotë për “Front Online” se janë kryer gërmime në zonën e veriut të Kosovës por pa rezultate.
Hoti thotë se aktualisht gërmimet po kryhen në Podujevë gjersa shton se do të vazhdojnë në afërsi të Koshares
“Po, aktualisht ekipi është në Podujevë. Para këtij gërmimi, jemi rikthyer në zonën e veriut të Kosoves dhe kemi pas disa ditë gërmime, por fatkeqësisht pa rezultat. Në raport me gërmimet e reja, ne i kemi në plan edhe disa lokacione, pas përfundimit të Podujevës, siç është kufiri me Malin e Zi, në afërsi të Koshares, dhe të tjera”, theksoi ai.
Andin Hoti tregon se sa i përket dialogut për çështjen e të pagjeturve, janë në pritje të formimit të Komisionit të përbashkët që duhet të formohet nga Bashkimi Evropian, por ende nuk ka asnjë gjë konkrete.
“Komisioni i përbashkët ende nuk është themeluar, dhe për këtë kam pasur shumë polemika të ashpra në Bruksel me z. Lajçak, të cilët fatkeqsisht nuk po e trajtojnë si prioritet”.
Ai poashtu thotë se nuk kanë marrë ende përgjigje nga Serbia lidhur me kërkesën e Kosovës për informacione dhe arkivat.
“Unë nuk mund ta vlerësoj punën e Qeverisë, ndërkaq në raport me personat e zhdukur, ne funksionojmë në bazë të ligjit, në bazë të informatave që pranojmë, dhe me rëndësi të veçantë në bazë të informatave që pranojmë nga Serbia, si akteri i vetëm i këtyre krimeve. Në raport me këto, dhe ne vazhdën e kërkesave tona për informacione dhe arkivat, të cilat tashmë janë të njoftura publikisht, nuk kemi pranuar asnjë përgjigje të vetme nga Serbia”, theksoi tutje ai.
Hoti thotë se brenda këtij vitit pret që të trajtohen së paku dy lokacione të dyshuara si varreza masive në Serbi.
“Megjithatë, pas një presioni të vazhdueshëm, po shpresojmë që brenda këtij vitit të trajtohen së paku dy lokacione të dyshuara si varreza masive në Serbi. (Fatkeqsisht emrat e lokacioneve nuk mund t’i them, deri sa të pranohen nga Beogradi)”, tha ai për Front Online.
Qerkini: Puna e Qeverisë “Kurti” për çështjen e të pagjeturve është zero, veç po i arsyetojnë pagat që i marrin
Bajram Qerkini, përfaqësues i Shoqatës së Familjarëve të Personave të Pagjetur ka bërë të ditur për Front Online se së shpejti do të fillojnë disa vlerësime të lokacioneve që dyshohet për mbetje të të pagjeturve në Serbi e Kosovë.
Qerkini ka shprehur pakënaqësi pasi nuk do të ketë gërmime, por vetëm vlerësim të gjetjeve.
“Informatat që i kemi ata do të fillojnë me gërmime këto ditë në tri lokacione në Serbi dhe tri në Kosovë. Nuk e di a janë dakorduar a janë marr vesh me Komisionin e Serbisë dhe Kosovës se do të fillohet të punohet me përmirësimin e kohës në tri lokacione të Kosovës dhe tri të Serbisë. Nuk jam i kënaqur se nuk janë gërmime por vlerësime”, u shpreh Qerkini.
Qerkini ka kritikuar punën e Qeverisë karshi të pagjeturve.
Ai thotë se pushteti ka punuar vetëm për ti arsyetuar pagat që i marrin.
“Zero jemi të kënaqur me Qeverinë krejt çka ka bërë veç me i siguruar karrikat dhe me e arsyetuar pagat që i marrin. Disa vlerësime kanë qenë por nuk ka pasur gjetje të trupave”, theksoi Qerkini.
Gërmimet e fundit para Podujevës, ishin bërë në Therandë dhe Prizren.
/FrontOnline/