Kryeministri Mickoski në takim me opozitarin Filipçen janë dakorduar për të krijuar grupe pune
Kryeministri Hristijan Mickoski dhe lideri i LSDM-së opozitare, Venko Filipçe ishin në takim në Qeverinë e RMV-së. Filipçe tha se në takim është rënë dakord, në parim të formohen organe apo grupe punuese të përbashkëta që do të punojnë në zbatimin e agjendës reformuese, shkruan Portalb.mk. Në një deklaratë për mediat, lideri i LSDM-së, Venko Filipçe […]
Kryeministri Hristijan Mickoski dhe lideri i LSDM-së opozitare, Venko Filipçe ishin në takim në Qeverinë e RMV-së. Filipçe tha se në takim është rënë dakord, në parim të formohen organe apo grupe punuese të përbashkëta që do të punojnë në zbatimin e agjendës reformuese, shkruan Portalb.mk.
Në një deklaratë për mediat, lideri i LSDM-së, Venko Filipçe pas takimit tha se ka pasur takim të mirë dhe konstruktiv me kryeministrin.
“Është e qartë se ai ka marrë mesazhin, kërkesën e qytetarëve për një formë të punës së përbashkët në fushat që janë të rëndësishme për përmirësimin e cilësisë së jetës sonë”, tha Filipçe pas takimit.
Në takim është rënë dakord, në parim të formohen organe apo grupe punuese të përbashkëta që do të punojnë në zbatimin e agjendës reformuese, njoftoi Filipçe. Fokusi fillestar do të jetë në ligjet që lidhen me gjyqësorin, energjinë dhe projektet strategjike të kujdesit shëndetësor, të cilat duhet të arrijnë në Parlament.
“Në periudhën e ardhshme do të nominoj disa ekspertë nga fusha e drejtësisë dhe energjetikës, të cilët do të përfshihen në përgatitjen e këtyre zgjidhjeve ligjore”, theksoi Filipçe, duke shtuar se ky është fillimi i një procesi në të cilin do të duhet të zhvillohet metodologjia e bashkëpunimit.
Kryetari i LSDM-së theksoi se në të ardhmen pret që edhe partitë tjera politike t’i bashkohen këtij modeli të bashkëpunimit, duke theksuar se “duhet të dërgojmë mesazh bashkimi për të mirën e vendit”.
Në takim, Filipçe dhe Mickoski kanë biseduar edhe për amendamentet kushtetuese lidhur me integrimet evropiane, ku sipas Filipçes, ka qëndrime të ndryshme.
“Kjo na mbetet të flasim më tej”, tha ai.
Hapi tjetër pas takimit duhet të jetë emërimi i ekspertëve në fusha kyçe dhe më pas krijimi i një modeli paraprak bashkëpunimi që do t’u ofrohet partive të tjera politike.
Para takimit, kryeministri Hristijan Mickoski në një postim të shkurtër në Facebook shkruajti: “Është ky takim nga i cili dua të dihet se përgjegjësia, urtësia dhe ndershmëria janë më se të nevojshme për Maqedoninë”.
Para takimit Filipçe mohoi se takimi të ketë dimension etnik, siç akuzuan dy partitë opozitare shqiptare, Bashkimi Demokratik për Integrim (BDI) dhe Aleanca për Shqiptarët (ASH).
Në deklaratë për mediumet në Shtip, Mickoski dje (2 prill) tregoi gatishmëri për takim me Filipçen, i cili bëri thirrje për dialog politik dhe shoqëror. Sferat ku duhet qasje sistematike, sipas Filipçes, janë: arsimi, jurisprudenca, mjedisi jetësor, partizimi dhe politizimi.
“Nëse ka plan siç paralajmëruan, jam i gatshëm ta pranoj në takim kryetarin e LSDM-së ta arsyetojë planin, ta dëgjojmë planin sepse janë kohë serioze, unë jam njeri serioz, gjëra serioze janë në pyetje dhe e pakta që duhet të bëhet është estradë në skenë publike. Nëse me të vërtetë ka plan dhe dëshirë të ndihmohet, qëndroj në dispozicion në çdo kohë do ta risistemoj orarin tim, në mesnatë në mesnatë, pas mesnate, kur të thotë atëherë do ta dëgjoj planin e tij dhe të shoh nëse në atë plan mund të zgjidhet diçka”, deklaroi Mickoski.
Ai me këtë rast tha se nevojiten reforma thelbësore në drejtësi dhe miratimi i agjendës reformuese me konsensus të gjerë.
“Bëj thirrje për një një formë të dialogut politik dhe shoqëror, që do të mundësojë përcaktimin e një strategjie afatgjatë për zhvillimin e vendit. Nevojitet të ndërtohet një sistem që do të funksionojë në dekadat e ardhshme, pavarësisht se cila parti është në pushtet, me udhëzime të qarta në fushat kyçe të jetës shoqërore”, tha Filipçe.
Rikujtojmë se për këtë takim kanë reaguar partitë opozitare shqiptare.
“Shprehim shqetësimin tonë të thellë për dominimin gjithnjë e më të theksuar mono-etnik që Qeveria ka demonstruar gjatë vitit të parë të qeverisjes së saj, ndërsa tani, tashmë në skenën publike, përfshin edhe opozitën etnike maqedonase në këtë prirje të saj”, reagojnë nga BDI-ja.
Ata takimin Mickoski – Filipçe e vlerësojnë si një “flirt i hapur”.
“Republikës së Maqedonisë së Veriut i nevojitet një dialog i mirëfilltë politik, por jo në takime intime mesnate, por në një format politik dinjitoz, me përfaqësim të qartë të të gjithë qytetarëve, ku të hapen çështjet themelore me rëndësi për vendin”, reaguan nga BDI-ja.
Aleanca për Shqiptarët (ASH) e udhëhequr nga Ziadin Sela, kanë vlerësur se LSDM-ja e udhëhequr nga Filipçe po sillet si degë e VMRO-DPMNE-së, duke e vlerësuar takimin “monoetnik për Maqedoninë përsëri e jona”.
“Kryetari i VMRO-DMPNE Hristijan Mickvski do të takohet me Kryetarin e degës më të madhe të VMRO-DPMNE-së Venko Filipçe! Pasi u zgjodh kryetar i LSDM-së takimin e parë e kishte me Kryetaren e shtetit znj.Siljanovska-Davkova!”, deklaruan nga ASH-ja, duke përkujtuar se Filipçe ishte etiketuar nga VMRO-ja si “ministër i vdekjes”.
Në lidhje me këtë takim të planifikuar ka reaguar edhe partia maqedonase ZNAM, e cila është në koalicion qeveritar me VMRO-DPMNE-në. Ata deklarojnë se Filipçe dhe LSDM-ja nuk kanë kredibilitet politik, as legjitimet të ofrojnë koncepte për Maqedoninë në këtë moment.
