Rigjykimi për zjarrin në Modular: Ekspertët paraqitën gjetjet e hetimit

Në Gjykatën e Tetovës sot vazhdoi rigjykimi për zjarrin në spitalin modular të Tetovës ku jetën e humbën 14 persona. Në seancën e sotme prokurorët publikë paraqitën provat, ndërsa nga prokuroria dhe mbrojtja e të akuzuarve u morën në pyetje ekspertët të cilët kanë bërë ekspertizë menjëherë pas zjarrit, shkruan Portalb.mk. Elektroinxhinieri Irfan Shaqiri foli […]

Prill 3, 2025 - 18:00
 0  5
Rigjykimi për zjarrin në Modular: Ekspertët paraqitën gjetjet e hetimit
Të akuzuarit për zjarrin në spitalin modular të Tetovës: Florin Besimi, Artan Etemi dhe përfaqësuesja e spitalit të Tetovës Adile Rexhepi (seanca e rigjykimit më 3 prill 2025). Foto: Fisnik Xhelili/Portalb.mk

Në Gjykatën e Tetovës sot vazhdoi rigjykimi për zjarrin në spitalin modular të Tetovës ku jetën e humbën 14 persona. Në seancën e sotme prokurorët publikë paraqitën provat, ndërsa nga prokuroria dhe mbrojtja e të akuzuarve u morën në pyetje ekspertët të cilët kanë bërë ekspertizë menjëherë pas zjarrit, shkruan Portalb.mk.

Elektroinxhinieri Irfan Shaqiri foli për instalimin e rrymës elektrike, ku tha se instalimi është bërë nga dy të punësuar të pakualifikuar të Spitalit të Tetovës, ku siç tha, kyçja e rrymës nga trafoja kryesore deri në objektin e spitalit modular është bërë pa asnjë standard. 

“Në komunikim me ta lidhur me përcaktimin e llojit të përçuesit nuk kanë ofruar dokument. Ata kanë thënë se llogaritjet janë bërë në bazë të një bisede me elektricistë të lartë të cilët u kanë thënë se çfarë kabllo të përdorin nga trafostacioni që të ketë rrymë në objekt”, tha Shaqiri. 

Në pyetjen e avokatëve nëse është dakord me deklaratën se instalimi është bërë në kundërshtim me standardet, ai u përgjigj se po. 

Eksperti i Ministrisë së Punëve të Brendshme në Sektorin e Forenzikës, Rubin Boshkovski i cili ka bërë ekspertizë mjeko-ligjore theksoi se gjatë ekspertizës kanë konstatuar se kablloja vazhduese ka pësuar dëmtim 

“Temperatura e lartë ka sjellë djegien e izolimit të kabllove dhe krijimin e flakës”, theksoi Boshkovski. 

Për atë se nëse janë vërejtur aparate kundër zjarrit gjatë ekspertizës, Boshkovski tha se ato nuk janë regjistruar në vetë spitalin. 

Në seancë dëshmoi edhe profesoresha Anita Grozdanova nga Fakulteti i Teknologjisë dhe Metalurgjisë, e cila egzaminoi materialet që përbëjnë spitalin modular. 

“Materialet për ndërtimin e kontejnerit të parafabrikuar i plotësojnë kërkesat sipas specifikimeve të Ministrisë së Shëndetësisë dhe janë analizuar sipas procedurave”, tha Grozdanova. 

Avokatët e të akuzuarve për zjarrin në spitalin modular në Tetovë (seanca e rigjykimit më 3 prill 2025). Foto: Fisnik Xhelili/Portalb.mk
Avokatët e të akuzuarve për zjarrin në spitalin modular në Tetovë (seanca e rigjykimit më 3 prill 2025). Foto: Fisnik Xhelili/Portalb.mk

Sveto Cvetkovski, nga Fakulteti i Teknologjisë dhe Metalurgjisë, i cili shqyrtoi metalet e përdorura në ndërtimin e objekteve të spitale modulare, theksoi se materialet metalike janë sipas specifikimeve të mandatuara nga Ministria e Shëndetësisë. 

Profesorët universitar Vllatko Stoillkov dhe Vlladimir Dimçev nga Fakulteti i Elektroteknikës dhe Teknologjive Informative në “Universitetin e Shën Kiril dhe Metodi”, përgatitën ekspertizën dhe mendimin në formë të shkruar nëse spitalet modulare janë ndërtuar sipas specifikimeve të projektit në përputhje me kërkesat e autoritetit kontraktues. 

“Sipas rekomandimeve të Bankës Botërore, në Maqedoni ka pasur katër objekte standarde, ndërsa në Tetovë është ndërtuar objekt standard me emërtim CE, në dhomat e këtyre objekteve ka pasur një prizë elektrike për një shtrat dhe një prizë të oksigjenit”, tha Stoillkov. 

Avokatët kërkuan që të dëgjohen edhe ekspertët nga Gjermania të cilët përgatitën ekspertizë, por gjykatësi theksoi se sipas udhëzimeve të gjykatës më të lartë të apelit, kërkesa e mbrojtjes refuzohet. 

Gjatë seancës u parashtruan pyetje edhe për mungesën e aparateve për shuarjen e zjarrit. 

Edhe në këtë seancë pati mospajtime midis avokatëve, prokurorëve dhe gjykatësit.

Seanca u ndërpre pasi zgjati diku mbi pesë orë e gjysmë, deri pak para përfundimit të orarit të punës në ora 4.

Gjykatësi Rexhep Musa i caktoi edhe terminet për tre seancat e radhës. Më 8, 22 dhe 28 prill me fillim në ora 09:30. 

Seancën e radhës pritet të lexohen provat me shkrim nga mbrojtja. 

Në ndërkohë për rihapjen e hetimit për këtë rast është deklaruar sot edhe ish ministri i Shëndetësisë dhe lideri i LSDM-së, Venko Filipçe. 

Ai tha se nuk ka frikë nga përgjegjësia nëse rihapet rasti se si u dogj spitali modular në Tetovë, si dhe rasti i ndërtimit të tyre. Ai dha mbështetjen e tij për tu bërë kjo. 

“Pas atij rasti kam dhënë dorëheqje për arsye morale. Nëse më pyesni mua personalisht, nuk kam frikë nga asgjë. Nëse dikush mendon se duhet hapur ndonjë rast, unë e mbështes”, tha Filipçe. 

Para se të fillojë seanca e sotme, familjarët kërkuan që të hapet hetim i ri për shkaqet e zjarrit dhe fajtorët e vërtetë të dalin para drejtësisë. 

Në këtë rast akuzohen ish drejtori mjekësor i spitalit Florin Besimi, ish drejtori Ekonomik Artan Etemi dhe Spitali i Tetovës si person juridik. 

Besimi dhe Etemi, akuzohen për veprën penale “Krime të rënda kundër sigurisë publike”, ndërsa ISHP Spitali Klinik i Tetovës për veprën penale “shkaktim i rrezikut të përgjithshëm”. 

Rasti rigjykohet pasi Gjykata e Apelit të Gostivarit e ka kthyer lëndën në Gjykatën Themelore në Tetovë.

Megjithatë, të akuzuarit nuk akuzohen për shkaqet e zjarrit por për vepra tjera penale. 

Kujtojmë që javën e kaluar në Tetovë u mbajt protestë për shkak të mos sjelljes së drejtësisë për këtë rast.

Deri më tani janë mbajtur pesë seanca të rigjykimit 

18 mars 2025 prokuroria ka paraqitur titujt e provave dhe prezantoi video dëshmitë, për të cilat pati kundërshtime nga avokatët, të akuzuarit thanë se nuk ndjehen fajtorë.

Më 15 janar 2025 seanca u anulua pasi gjykatësi Jordan Vellkovski ishte në pushim mjekësor.

Më 5 nëntor 2024 seanca u shty për shkak të mungesës së gjyqtarit Jordan Vellkovski. 

Më 25 shtator 2024 seanca nuk u mbajt për shkak të mungesës së avokatit të njërit prej të akuzuarve. 

Më 26 qershor 2024 seanca u shty për shkak të mungesës së përfaqësuesve të Spitalit Klinik të Tetovës. 

Pse erdhi deri te rigjykimi?

Pas gjykimit të parë në Gjykatën e Tetovës i cili përfundoi në qershor 2023, ku në bankën e të akuzuarve ishin ish drejtori mjekësor i Spitalit të Tetovës dhe ish drejtori ekonomik, mjeku përgjegjës për qendrën e Kovidit dhe Spitali i Tetovës, Gjykata e Apelit në Gostivar në maj 2024 vendosi që ta kthejë nga fillimi procedurën ndaj drejtorëve, pasi aktgjykimi i parë ka qenë i paqartë.

Prokuroria ka kërkuar që drejtorëve tu jepen dënime më të ashpra, ndërsa aktgjykimi lirues për mjekun të anulohet dhe lënda të kthehet në rigjykim.

Në rigjykim është kthyer një pjesë e lëndës kundër dy ish drejtorëve të spitalit të Tetovës. Ndërsa aktgjykimin lirues për mjekun Boban Vuçevski e konfirmoi edhe Gjykata e Apelit në Gostivar.

Nga Gjykata e Apelit në aktgjykim kanë theksuar se Gjykata e Tetovës “nuk ka vepruar me kujdesin e duhur që të mund t’i vërtetojë me siguri të gjitha faktet juridike relevante”.

“Aktgjykimi është i paqartë, i pakuptueshëm dhe i papërshtatshëm për shqyrtim”, thuhet në atkgjykimin e Apelit.

Gjykimi i parë, jo për shkaqet e zjarrit

Në lidhje me zjarrin në modular pati një proces të gjatë gjyqësor me disa seanca, megjithatë askush nuk u thirr në përgjegjësi për shkaqet e zjarrit, por për vepra të tjera penale.

Me 1 vit e 6 muaj burg me kusht u dënuan ish drejtori mjekësor i Spitalit të Tetovës dhe ish drejtori ekonomik, kjo domethënë se ata nuk do të burgosen nëse për 3 vjet nuk kryejnë vepër të re penale. Mjeku përgjegjës për qendrën e Kovidit u lirua nga akuza. Ndërkaq, Spitali i Tetovës mori dënim prej 1 milion denarësh.

Drejtorët u dënuan në shkallën e parë sepse në spitalin modular nuk ka pasur aparate për fikjen e zjarrit, ndërsa mjeku u lirua nga përgjegjësia sepse në spitalin për Kovid-19 kishte futur njerëz nga jashtë.

Prokuroria ngriti aktakuzë për shkak se nuk ka pasur aparate për shuarjen e zjarrit, por jo edhe për shkaqet e zjarrit.

Për mos thirrjen në përgjegjësi për shkaqet e zjarrit, Portalb.mk ka raportuar vazhdimisht.

Asgjë e re nga Prokuroria për Krim të Organizuar dhe Korrupsion

Ende nuk ka vendim nga Prokuroria Publike për hetimin e dytë i cili zhvillohet për zjarrin në spitalin modular, pavarësisht se ka kaluar më shumë se një vjet që kur në gusht 2023 deklaruan se Prokuroria për Ndjekjen e Krimit të Organizuar dhe Korrupsionit është duke zhvilluar hetim tjetër për këtë tragjedi. Ky rast sipas Prokurorisë është në fazën e para marrjes së vendimit. Ndërkaq nga Prokuroria në dhjetor 2024 njoftuan se ende nuk kanë arritur të sigurojnë dokumentacionin shtesë.

Dokumentari i IRL-së, nxori në pah “të palarat”

Dokumentari “Vrasje në Tetovë”, të cilin IRL e publikoi në gusht 2023 tregon për një sërë lëshimesh gjatë ndërtimit të spitalit modular që sollën deri tek shpërthimi i zjarrit, edhe pse autoritetet u përpoqën ta përshkruajnë atë si një aksident të shkaktuar nga një lidhje e shkurtër e kabllos vazhduese.

Lëshime u konstatuan edhe në specifikimin teknik, në ndërtim, por edhe më pas në hetim. Në vend se si ndërtim, spitali është evidentuar si pajisje urbane, për të cilën nuk ka nevojë të respektohet ligji për ndërtim.

Shumë protesta për drejtësi

Në lidhje me mos sjelljen e drejtësisë për zjarrin e modularit dhe pas dokumentarit të IRL-së, familjarët dhe qytetarët kanë organizuar disa protesta.

Në protesta u kërkua të hapet procesi gjyqësor për shkaqet e zjarrit, rishqyrtim dhe shqyrtim të vendimeve nga hetimi paraprak në Gjykatën e Tetovës.

Familjarët e viktimave janë shprehur se nëse rasti përfundon këtu, do të shkojnë edhe në Gjykatën e Strazburgut apo e njohur ndryshe si Gjykata Evropiane për të Drejtat e Njeriut.

Çfarë ndodhi?

Me 8 shtator 2021 në spitalin modular të Tetovës ku trajtoheshin pacientët me Kovid-19 ra një Zjarri i tmerrshëm dhe që mori me vete 14 jetë të pacientëve, por edhe të anëtarëve të familjeve që ndodheshin brenda. 14 persona u shpëtuan përpara se objekti të digjej plotësisht.

Shkaku i zjarrit i atribuohet kabllos së djegur ku shkëndija bëri që zjarri të përhapet dhe brenda pak minutash i gjithë spitali mori flakë.