Kundërspin: Është e papërshtatshme dhe çnjerëzore të fajësohet grupi muzikor për tragjedinë e Koçanit

Nga respekti për të ndjerët dhe për ata që kanë jetën në rrezik, është e pavend dhe çnjerëzore që ministri Toshkovski t’ia drejtojë gishtin grupit muzikor, të paktën jo në këto momente të para pas tragjedisë. Edhe nëse është kështu, dhe kjo mbetet për t’u parë, çfarë për të metat e sistemit dhe korrupsionin brenda dhe rreth tij, për të cilin ministri ka dy ditë që flet? E për mangësi të mëdha ka folur edhe prokurori i shtetit Ljupço Kocevski, i cili ka thënë se ato janë aq të mëdha sa kanë shkaktuar “erozion të sistemit”, raporton Vërtetmatësi. Është e çuditshme që objekti prej më shumë se një dekade nuk është shndërruar nga industri e lehtë në objekt hotelerie, dhe ka marrë leje operimi nga Ministria e Ekonomisë si objekt hotelerie të lëshuar 15 vite më parë! A është edhe ky faji i grupit muzikor??

Ministri i Punëve të Brendshme, Pançe Toshkovski, në konferencën e sotme për media, duke folur për tragjedinë në Koçan ku humbën jetën 59 të rinj dhe mbetën të plagosur 162 persona, në një moment spinoi të vërtetën:

Lëndët piroteknike në diskotekën “Pulse” në Koçan i ka sjellë grupi “DNK”, por personi përgjegjës për përdorimin e tyre ka ndërruar jetë.

Pas përfundimit të inspektimit, Prokurorisë Publike do t’i dorëzohet raport, pas së cilës do të konstatohet se a është dashur të posedojnë certifikatë të caktuar për shfrytëzim.

 [Burimet: Grid.mk; Libertas – Data: 17.03.2025]

Kundërspin: Kjo deklaratë e ministrit Pançe Toshkovski, në të cilën ai fajëson grupin për tragjedinë në Koçan, është, më së paku, pa shije. Disa anëtarë të grupit (këngëtarja, vokalistët mbështetës, bashkëpunëtorë) humbën jetën nga zjarri që përfshiu diskotekën e improvizuar në Koçan, e disa po luftojnë për jetë. Në respekt të të ndjerëve dhe atyre që janë në rrezik, është e pavend dhe çnjerëzore që ministri të drejtojë gishtin nga grupi muzikor, të paktën jo në këto momente të para pas tragjedisë. Edhe nëse është kështu, dhe kjo mbetet për t’u parë, po çfarë bëjmë me të metat e sistemit dhe korrupsionin brenda dhe përmes tij, për të cilin ministri ka dy ditë që flet? E për mangësi të mëdha ka folur edhe prokurori i shtetit Ljupço Kocevski, i cili ka thënë se ato janë aq të mëdha sa kanë shkaktuar “erozion të sistemit”.

Objekti nuk kishte rrjet hidranti apo hidrant funksional. Nuk kishte mjaftueshëm aparate zjarri sipas hapësirës të objektit, pra ishin vetëm dy. Nuk ishin parashikuar dy dyer daljeje për evakuimin e njerëzve, por një derë metalike, e improvizuar në pjesën e pasme të ndërtesës, por ishte e mbyllur me dry dhe pa dorezë nga brenda dhe e veshur me karton gipsi dhe sfungjer për izolimin e zërit. Nuk kishte qasje për kamionët e zjarrfikësve nga asnjëra anë, në përputhje me rregulloret për mbrojtjen nga zjarret, shpërthimet dhe materialet e rrezikshme. Pjesa e brendshme e godinës ishte e veshur me karton gipsi, por jo me veti rezistente ndaj zjarrit. Nuk kishte tavan të ulur me rezistencë ndaj zjarrit të paktën 30 minuta. Nuk kishte dyer me rezistencë ndaj zjarrit të paktën 1 orë dhe as një sistem që do t’i paralajmëronte vizitorët se një zjarr kishte shpërthyer me një sinjal të fortë zanor. Diskoteka ishte e veshur në mënyrë të papërshtatshme me materiale izoluese të zërit dhe materiale të ndezshme. Në objektin në lartësinë 3 metra pa leje janë përdorur në mënyrë të paligjshme materiale piroteknike. Në vendngjarje ka qenë edhe Inspektorati Shtetëror i Ndërtimtarisë dhe Urbanizmit, i cili ka konstatuar se objekti ku ka ndodhur aksidenti është regjistruar si objekt i industrisë së lehtë me sipërfaqe 419 metra katrorë. Objekti nuk është shndërruar nga industria e lehtë në objekt hotelierie. Përkundër faktit se nuk ka pasur konvertim, ka marrë leje operimi nga Ministria e Ekonomisë si objekt hotelierik të lëshuar para 15 vitesh, njoftoi Kocevski vonë në mbrëmjen e 16 marsit.

Dhe ku është faji për të gjitha këto, për faktin se “gjithçka në shtet ishte e kalbur”? A është faji i grupit për gjithçka?

Për këtë me të drejtë ka reaguar bashkëshortja e këngëtarit të grupit DNK, Andrej Gjorgjieski, i cili humbi jetën nga zjarri në Koçan, pasi u kthye dy herë për t’i shpëtuar fëmijët dhe për t’i ndihmuar ata. E indinjuar nga informacionet e rreme, mes të cilave edhe ajo se “mjetet piroteknike janë sjellë nga grupi muzikor”, ajo ndër të tjera, ka shkruar në një postim në Facebook:

…. Ju lutem, MOS MBRONI DIKË QË DUHET TË JETË PRAPA HEKURAVE!

Por a do të kishte ndodhur aksidenti nëse muret nuk do të ishin prej materialesh lehtësisht të ndezshme, nëse ndërtesa do të kishte dalje emergjence aq sa të ishte e nevojshme, nëse nuk do të kishte një derë të mbyllur të improvizuar në pjesën e pasme të ndërtesës, pa dorezë nga brenda dhe të veshur me karton gipsi dhe sfungjer për izolimin e zërit, nëse do të kishte qasje për kamionët e zjarrfikësëve nga të dyja anët, në përputhje me masat kundër zjarrit, tavani të ishte me rezistencë ndaj zjarrit prej të paktën 30 minutash…. Shumë pikëpyetje të tjera varen mbi këtë histori të trishtë maqedonase, por ajo që është veçanërisht e habitshme është fakti se ndërtesa nuk është shndërruar nga industri e lehtë në një objekt hotelierie për më shumë se një dekadë. Dhe pavarësisht se nuk ka pasur ndryshim, ka marrë leje për të operuar si objekt hotelerie nga Ministria e Ekonomisë, e dhënë 15 vite më parë!

Dhe a është grupi muzikor fajtor për këtë?

Nuk kanë faj institucionet që e lejuan këtë dhe e toleruan për 15 vjet? Apo fajin e ka vetëm grupi muzikor dhe ndoshta ata që kanë lëshuar një leje pune të falsifikuar vitin e kaluar apo një vit më parë? Çfarë bëri sistemi për rreth dhjetë vitet e tjera, por edhe vitin e fundit, në të cilin e ashtuquajtura diskotekë funksiononte mjaft lirshëm? Apo askush nuk e ka parë këtë, qoftë në nivel lokal apo në nivel qendror? Është e çuditshme se si kjo “disko” ishte e padukshme në Koçan, sikur të ishte një qytet si Çikago, dhe jo një komunë me mezi 25 mijë banorë.

E për lëndët piroteknike – më saktë “spërkatësit” nga të cilët, sipas autoriteteve, kanë nisur shkëndijat e para, pas së cilës hapësira e papafingo dhe struktura e çatisë kanë marrë flakë. Cili është detyrimi dhe përgjegjësia e organizatorit për këtë? A u ka vënë në dukje përfaqësuesve të grupit se dhoma ka tavane të ulëta, a ka paraqitur në polici dhe a ka kërkuar leje për të përdorur mjete piroteknike?

Të gjitha këto dilema janë plotësisht legjitime dhe nuk ka arsye që ministri Toshkovski të zemërohet me gazetarët kur ata i kërkojnë përgjigje, pavarësisht nëse i pëlqejnë pyetjet apo jo.

Por duket se gjëja më e lehtë për të bërë tani është të fajësosh grupin dhe të ndjerët. E kjo është spin, por është edhe jo korrekte dhe çnjerëzore.