Largimet dhe ardhjet e reja te Milani

Sezoni i ri është në horizont dhe me hapjen zyrtare të afatit kalimtar veror, AC Milan i ka kthyer sytë nga ndërtimi i skuadrës që do të tentojë rikthimin në majat e futbollit italian – këtë herë, pa ngarkesën e garave evropiane.

Pavarësisht mungesës së të ardhurave nga Europa, kuqezinjtë nuk planifikojnë të qëndrojnë pasivë në treg. Përkundrazi, me një qasje të kujdesshme por të vendosur, drejtuesit sportivë Igli Tare dhe Massimiliano Allegri janë në qendër të një operacioni që synon të sjellë balancë mes nevojave teknike dhe burimeve financiare në dispozicion, transmeton ORAinfo.

Objektivat kryesorë të merkatos

Një qendërsulmues i nivelit të lartë

Milani ka ndarë një buxhet prej 40-45 milionë eurosh për të sjellë një “bomber” që mund të zëvendësojë Olivier Giroud. Disa nga emrat që kryesojnë listën janë:

Mateo Retegui – sulmues i fuqishëm dhe me instinkt finalizimi.

Aleksandar Mitrovic – garanci për gola, por me kërkesa të larta financiare.

Dusan Vlahovic – mbetet në listë, por preferencat e lojtarit mund ta komplikojnë pistën.

Përforcime në mesfushë
Pas përfshirjes së mundshme të Samuele Ricci dhe Luka Modric, Milani synon të shtojë edhe Ardon Jashari, talenti i ri i kombëtares së Zvicrës. Futbollisti dëshiron kalimin në “San Siro”, por ekziston ende një diferencë prej 10 milionë eurosh mes ofertës dhe kërkesës.

Dy mbrojtës krahu

Guela Douè dhe Martim Fernandes janë emrat për krahun e djathtë, me të parin që shihet si më realist për shkak të klauzolës më të ulët.

Në të majtë, Maxim De Cuyper mbetet alternativë në rast të ndonjë largimi të Theo Hernandez.

Prurje të tjera të mundshme

Në varësi të lëvizjeve në dalje, Milani mund të shtojë edhe një mbrojtës qendror (në rast largimi të Malick Thiaw) dhe një anësor ofensiv, por këto nuk janë prioritet absolut.

Koha për të pastruar skuadrën

Përveç afrimeve, klubi ka për qëllim të shkarkojë disa emra për të ulur numrin e lojtarëve, veçanërisht në mungesë të angazhimeve evropiane.

Tommaso Pobega dhe Noah Okafor, që kthehen nga huazimi, mund të shiten për të gjeneruar deri në 40 milionë euro.

Yunus Musah është një tjetër emër që mund të sjellë të ardhura të konsiderueshme, pasi disa klube angleze kanë shfaqur interes – me një vlerësim të mundshëm rreth 25-30 milionë euro.

Milan nuk po e sheh verën si periudhë të heshtjes, por si një mundësi për të rindërtuar. Me një strategji të balancuar mes investimeve të zgjuara dhe menaxhimit të kujdesshëm financiar, kuqezinjtë synojnë të rikthehen fuqishëm në garën për titull në Serie A. /ORAinfo/