Operatori hungarez “4iG” ka dërguar letër në Agjencinë për Komunikime Elektronike të RMV-së për sigurimin e radio-frekuencave
Grupi hungarez i telekomunikacionit “4iG”, përmes filialit të tij të sapo themeluar në vend “One Macedonia Telecommunications”, ka dorëzuar zyrtarisht letër në Agjencinë për Komunikime Elektronike (AKE), duke shprehur interesimin e saj për sigurimin e frekuencave radio në dispozicion si pjesë e planit për të hyrë në tregun e telekomunikacionit në Maqedoninë e Veriut si […]
Grupi hungarez i telekomunikacionit “4iG”, përmes filialit të tij të sapo themeluar në vend “One Macedonia Telecommunications”, ka dorëzuar zyrtarisht letër në Agjencinë për Komunikime Elektronike (AKE), duke shprehur interesimin e saj për sigurimin e frekuencave radio në dispozicion si pjesë e planit për të hyrë në tregun e telekomunikacionit në Maqedoninë e Veriut si operator i ri celular, transmeton Portalb.mk.
Ky hap, siç njoftohet nga grupi, përfaqëson një moment historik të rëndësishëm në planet e 4G, të cilat synojnë të kontribuojnë në modernizimin e infrastrukturës së telekomunikacionit në vend dhe të rrisin konkurrencën në këtë sektor.
Kompania, thonë ata, do të bashkëpunojë me AKE-n në muajt në vijim për disponueshmërinë e radiofrekuencave, si dhe për të siguruar respektimin e kuadrit rregullator dhe vazhdimin e strategjisë afatgjatë të zhvillimit në rajon.
Kompania lëshoi gjithashtu një deklaratë nga drejtori i strategjive celulare dhe 5G në grupin 4G, Pal Zarandi.
“Jemi të lumtur që kemi filluar zyrtarisht të hyjmë në tregun e telekomunikacionit në Maqedoninë e Veriut”, thotë Zarandi.
Drejtori shton se ata kanë njohur potencialin e tregut dhe janë të bindur se përvoja e tyre në vendet fqinje, si Shqipëria dhe Mali i Zi, i vendos ata në një pozicion për të ofruar shërbime moderne për klientët dhe bizneset në vend.
“Sa herë që vendosim të hyjmë në një treg të ri, është thelbësore të kemi mbështetje nga mjedisi rregullator dhe të kuptojmë më mirë kushtet lokale”, thotë Zarandi, duke shtuar se ata kanë punësuar ekspertë vendas dhe ndërkombëtarë për të bërë një analizë gjithëpërfshirëse të tregut në Maqedoninë e Veriut.
Në njoftim, kompania jep edhe një herë një pasqyrë të portofolit të tyre, duke vënë në dukje se është një nga kompanitë më të spikatura hungareze të telekomunikacionit, e cila punëson mbi 8000 profesionistë të kualifikuar dhe shërben mbi 10 milionë lidhje në rajonet ku është e pranishme.
Grupi, siç thuhet, është i përkushtuar të prezantojë teknologji të avancuara, si 5G, IoT dhe infrastruktura e drejtuar nga inteligjenca artificiale, e cila, shtoi ai, do t’i hapë rrugën Maqedonisë së Veriut që të bëhet një vend me një rrjet më të mirë dhe konkurrencë më të madhe.
“Kërkimi ynë i tregut ka treguar mundësi të mëdha për shkak të disponueshmërisë së brezave të frekuencave dhe sigurisht mbështetjes së mjedisit rregullator”, tha grupi, duke shtuar se disponueshmëria e frekuencave është thelbësore për ndërtimin e rrjetit.
Operatori hungarez i telekomunikacionit “4G” ka dorëzuar dokumente në Agjencinë për Komunikime Elektronike (AKE), duke shprehur zyrtarisht interes për t’u bërë operatori i tretë mobil në vend, njoftoi zëvendëskryeministri dhe ministri i Transportit, Aleksandar Nikolloski në një intervistë televizive javën e kaluar.
Kjo, siç tha zëvendëskryeministri, do të nënkuptojë fundin e duopolit të dy operatorëve aktualë celularë në vend dhe ulje të çmimeve të shërbimeve celulare.
Duke shpjeguar, Nikolloski tha se vendimi vjen pasi operatorët aktualë mobil në vend në periudhën e kaluar nuk kanë bërë asgjë për përmirësimin e kushteve dhe çmimeve për shërbimet që u ofrojnë qytetarëve.
Në fillim të shtatorit, kryeministri Hristijan Mickoski, duke sqaruar nënshkrimin e memorandumit të bashkëpunimit të Qeverisë me operatorin telekomunikues “4iG”, tha se duhet të ketë tender për operatorin e ri të tretë mobil dhe do të shpallet në periudhën në vijim.
Kujtojmë se në shtator u nënshkrua Memorandumi për mirëkuptim dhe interesim të ndërsjellë të Maqedonisë së Veriut dhe kompanisë hungareze “4IG” për liberalizimin e rrjetit të telekomunikacionit.
Kryeministri Hristijan Mickoski deklaroi se Memorandumi për mirëkuptim i nënshkruar mes kompanisë hungareze “4IG” dhe Qeverisë së Republikës së Maqedonisë së Veriut nuk është obligativ dhe paraqet vetëm një formë të shprehjes së interesit, të cilin mund ta shprehin edhe kompani të tjera që dëshirojnë të konkurrojnë në procedurën e tenderimit. Ende nuk është marrë vendim se kur dhe nëse do të shpallet tender për një operator të tretë celular.
