Pas shumë zvarritjeve filloi pastrimi i “xhunglës” dhe punimet për shtratin e “Shkumbinit” në Lagjen Dardania të Tetovës
Pas shumë zvarritjeve, viteve të lënë në harresë dhe shndërrimit në një “xhungël”, këto ditë kanë filluar punimet për rregullimin e shtratit të Lumit Shkumbin në Lagjen Dardania në Tetovë dhe pastrimin e deponisë brenda dhe rreth lumit, shkruan Portalb.mk. Komuna e Tetovës ka nisur punimet për rregullimin e shtratit të lumit Shkumbin në lagjen […]
Pas shumë zvarritjeve, viteve të lënë në harresë dhe shndërrimit në një “xhungël”, këto ditë kanë filluar punimet për rregullimin e shtratit të Lumit Shkumbin në Lagjen Dardania në Tetovë dhe pastrimin e deponisë brenda dhe rreth lumit, shkruan Portalb.mk.
Komuna e Tetovës ka nisur punimet për rregullimin e shtratit të lumit Shkumbin në lagjen Dardania dhe po realizohen në bazë të projektit, që përfshin shtrirjen nga rruga VS Bato deri te autostrada Tetovë-Shkup-Gostivar.
“Ky projekt realizohet me bashkëfinancim nga Qendra për Zhvillim Planor të Pollogut, me një kontribut prej 20,000,000 denarë dhe nga Komuna e Tetovës me 12,243,000 denarë dhe është pjesë e planit për mbrojtjen nga përmbytjet dhe përmirësimin e infrastrukturës së qytetit”, thonë për Portalb.mk nga Komuna e Tetovës.
Megjithatë nga ky institucion nuk tregojnë se kur do të përfundojnë punimet.
Pavarësisht se punimet për këtë pjesë ishin planifikuar të fillonin nga fillimi i muajit tetor, të njëjtat nuk filluan, punimet filluan në fillim të muajit nëntor.
Shtrati i Lumit Shkumbin në lagjen Dardania në Tetovë me vite është jashtëzakonisht i ndotur me mbeturina nga më të ndryshmet, duke krijuar edhe deponi.
Banorët e lagjes kanë qenë në frikë se lumi mund të del nga shtrati dhe të shkaktojë përmbytje sidomos këto ditë ku reshjet e shiut janë shtuar, ata me vite janë ankuar.
Ndërkaq Komuna e Tetovës ndër vite ka pastruar shtratin e lumit sa për “sy e faqe”, duke mos zgjidhur problemin me rregullimin e shtratit si në pjesën e sipërme mbi rrugën Industriale.
Për këtë problem Portalb.mk me vite të tëra raporton, ndërsa autoritetet vazhdimisht kanë premtuar zgjidhje, por duke mos zgjidhur problemin.
- LEXO: “Shkumbini” në lagjen Dardania pranë kolapsit, Komuna e Tetovës nuk e ka pastruar shtratin e lumit
- LEXO: Lumi “Shkumbin” tmerrësisht i ndotur, Inspektorati nuk ka shqiptuar asnjë gjobë, thotë se fotografon ndotësit
- LEXO: Shtretërit e lumenjve në Tetovë mbeten në gjendje të rëndë, pavarësisht pastrimeve për “sy e faqe”
- LEXO: Nuk ka zgjidhje për “katastrofën ekologjike” të Lumit “Shkumbin” në Tetovë
- LEXO: “Krim ekologjik” në Lumin Shkumbin, shtrat i ngushtuar dhe xhungël mbeturinash, Kasami ndryshoi fjalët
