Protesta e LSM-së: Hristijan, merr pagë minimale për të parë sa e vështirë është për punëtorët
Lidhja e Sindikatave të Maqedonisë (LSM) sot ka dalë në protestë pasi qeveria nuk ka pranuar kërkesat e tyre për pagë minimale prej 500 euro. Në protestë, anëtarët e sindikatës i thanë kryeministrit Hristijan Mickoski, ministrave, deputetëve dhe zyrtarëve të tjerë që të marrin pagë minimale për një vit për të parë se si e […]
Lidhja e Sindikatave të Maqedonisë (LSM) sot ka dalë në protestë pasi qeveria nuk ka pranuar kërkesat e tyre për pagë minimale prej 500 euro. Në protestë, anëtarët e sindikatës i thanë kryeministrit Hristijan Mickoski, ministrave, deputetëve dhe zyrtarëve të tjerë që të marrin pagë minimale për një vit për të parë se si e kanë gjendjen punëtorët, transmeton Portalb.mk.
Protesta erdhi pasi javën e kaluar Qeveria miratoi informacionin se paga minimale do të rritet për 1800 denarë neto, sipas LSM-së ky vendom është i kundërligjshëm.
Protesta do të fillojë në ora 12:05, ku 300 anëtarë të udhëheqjes së lartë të LSM dhe sindikatave të LSM-së do të hapin seancën publike para Shtëpisë së Punëtorëve, e cila do të vazhdojë para Kuvendit, Odës Ekonomike dhe do të përfundojë para Qeverisë.
Sipas kreut të LSM-së, Sllobodan Trendafilov, sindikalistët do të shprehin pakënaqësinë e tyre me pagat e ulëta dhe do të kërkojnë që paga minimale t[ jetë 500 euro.
Sindikalistët fillimisht hapën seancën publike para godinës së LSM-së dhe më pas u drejtuan drejt Kuvendit. Aty kanë kërkuar që deputetët të marrin vendim për rritjen e pagës minimale në 500 euro dhe rritjen e pagave tjera të punëtorëve për 100 euro.
Kryetari i LSM-së, Sllobodan Trendafilov tha se rroga e punëtorit është e mjerueshme, dhe se e funksionarëve është rritur për 79 përqind.
“Ju nuk e meritoni atë rrogë, meqë nuk vendosni për ne, ne do të vendosim për ju dhe po marrim vendim që deputetët të kenë pagë minimale derisa ta rritni pagën minimale në 500 euro” tha Trendafilov.
Më pas seanca ka vazhduar para Odës Ekonomike, ku punëdhënësve u kanë thënë që punëtorët të rrisin pagat, sepse çdo vit 10 mijë të rinj largohen nga vendi dhe kërkojnë punë jashtë vendit.
Protesta përfundoi para Qeverisë, ku andafilov i propozoi kryeministrit Hristijan Mickoski që edhe ai të jetë me pagë minimale.
“Hristijani dhe Sllobodani duhet të jenë me pagë minimale. Ejani të jetoni si ne, ndjeni të paktën një vit se sa e vështirë është për punëtorët. Ndaloni sulmet ndaj sindikalistëve, kështu nuk drejtohet demokracia”, tha Trendafilov.
Nga ana tjetër, ministri i Ekonomisë dhe Punës, Besar Durmishi ka thënë se nëse nuk do të kishin shpallur pagën minimale deri më 31 mars, i gjithë vendi do të ishte bllokuar.
“Pas vendimit të Qeverisë, unë si ministër i Ekonomisë dhe Punës e kam shpallur pagën minimale. Nuk ka pëlqim nga Këshilli Ekonomik dhe Social sepse nuk ka përfaqësim nga sindikatat. Por, sipas ligjit që është në fuqi dhe i nënshkruar si nga sindikatat, ashtu edhe nga punëdhënësit, jam i detyruar, qoftë edhe me vendim të Qeverisë, të shpallim pagën minimale para 31 marsit.Mesatarja dhe pagat e tjera llogariten më pas nga paga minimale, po të mos e kishim publikuar deri më 31 mars, i gjithë vendi dhe të gjitha institucionet do të ishin bllokuar dhe sektori privat nuk do të kishte mundësi të llogariste pagat për punëtorët e tyre”, tha Durmishi.
Për protestën e LSM-së ai theksoi se jetojmë në demokraci dhe secili ka të drejtë të dalë në rrugë dhe të shprehë revoltën e tij.
“Paga minimale sipas ligjit ekzistues apo metodologjisë për të cilën janë dakorduar të gjitha palët është 400 euro dhe neto paga është rritur për 1800 denarë”, tha Durmishi.
Kërkesat e sindikalistëve për rritjen e pagës mbështeten edhe nga LSDM-ja.
Ndërkaq VMRO-DPMNE ka akuzuar krerët e LSM-së se aktrojnë dhe shfaqin hipokrizi.
Ndryshe, Qeveria vendosi që paga minimale për vitin 2025 të rritet për 2.685 denarë bruto, ose për 1.812 denarë neto. Paraprakisht sindikatat dolën me propozim për përcaktimin e pagës minimale në përputhje me ligjin, por edhe marrjen e vendimit me të cilin do të rritet paga minimale për 6.000 denarë shtesë.
