Rasti i Vedat Ademit: Ministri Taravari dhe drejtori i mjekësisë ligjore me deklarata të ndryshme për rezultatet e obduksionit

As opinioni, por as familjarët e të ndjerit Vedat Ademi, i cili ndërroi jetë në spitalin e Përgjithshëm të Kumanovës, ende nuk janë njoftuar me rezultatet e obduksionit që pritet të ndihmojnë në zbardhjen e këtij rasti për të cilin familja e akuzon mjekun kujdestar se Vedatit iu dha terapi e gabuar. Edhe pse ministri i Shëndetësisë, Arben Taravari tha se gjitha materialet janë dërguar, nga Prokuroria për Portalb.mk konfirmuan se e kanë marrë vetëm raportin e komisionit të posaçëm të ngritur përmes Inspektoratit Shtetëror Sanitar Shëndetësor. Të njejtën e konfirmoi edhe drejtori i Mjekësisë Ligjore, i cili për Portalb.mk tha se ende nuk ka rezultate nga obduksioni, as para një jave e as tani.

Përderisa Ministri i Shëndetësisë, Arben Taravari në pyetjen e Portalb.mk tha sot se është dërguar në Prokurori edhe materiali i Mjekësisë Ligjore për rastin e të ndjerit Vedat Ademi, nga ky institucion mohuan këtë gjë.

“Komplet materiali edhe i Mjekësisë Ligjore është dërguar në prokurori para një jave”, deklaroi Taravari në konferencën për media.

Por, Portalb.mk e kontaktoi drejtorin e Mjekësisë Ligjore, Aleksandar Stankov i cili theksoi se nuk kanë dërguar asnjë raport sepse janë duke u bërë disa analiza shtesë.

“Ende po punohet, ka edhe analiza shtesë që duhet të bëhen. Deri tani janë realizuar disa prej tyre, por duhet të bëjmë edhe analiza toksikologjike dhe mikrobilogjike. Nëse paraqitet nevoja, do të bëhen edhe analiza të tjera. Pritet që gjithçka të përfundojë këtë muaj, ndoshta edhe më shpejtë. Të gjitha gjetjet do të dërgohen në Prokurorinë Themelore në Kumanovë”, tha Stankov.

Të njejtën e konfirmoi edhe Prokuroria.

“Kemi marrë vetëm raportin e komisionit të posaçëm të ngritur përmes Inspektoratit Shtetëror Sanitar Shëndetësor, jo atë të Mjeksësisë Ligjore” tha zëdhënësja e Prokurorisë, Biljana Arsovska për Portalb.mk.

Ajo tha se ende janë në mbledhje të dëshmive materiale, sipas të cilave të dyshuarit mund të akuzohen për njërën apo të dy veprat penale: “Mjekim i pandërgjegjshëm i të sëmurëve” dhe tjetra “Vepra të rënda kundër shëndetit të njerëzve”. Por, deri në ngritjen e një akuze, prokuroria është në pritje të raportit të autopsisë.

Sead Ademi vëllai i të ndjerit Vedat Ademi për Portalb.mk theksoi se fakti që zgjatet aq shumë dyshon se procesi i zbardhjes së rezultateve do të jetë i drejtë.

“Kanë kaluar 17 ditë dhe ne ende jemi duke pritur për rezultatet e obduksionit të të vëllait. Edhe pse thonë se ende janë duke mbledhur prova për zbardhjen e rastit, mirëpo nuk më duket normale se si ka mundësi që të vonohen kaq shumë. Dyshojmë se rezultatet nuk do të dalin ashtu siç janë…”, tha Ademi.

Taravari tha gjithashtu se se ministria i ka propozuar Odës së Mjekëve t’ia merr licencën mjekut i cili ka qenë atë natë kujdestar, por kjo gjë ende nuk ka ndodhur.

Kujtojmë se 32 vjeçari Vedat Ademi nga Kumanova ka ndërruar jetë në Spitalin e Përgjithshëm të Kumanovës më 17 mars. Ai paraprakisht kishte ardhur për kontroll pasi është ankuar për probleme me stomakun. Portalb.mk bisedoi me Amet Ademin babain e 32-vjeçarit të ndjerë Vedat Ademi dhe Sead Ademin vëllaun e të ndjerit, ata thonë se i është dhënë ilaç ndaj të cilit ishte alergjik, dhe se për këtë fajësojnë mjekun i cili ishte kujdestar, Zoran Gjeorgjievski.

Drejtori i Spitalit, Stefan Trajanovski pranoi se i është dhënë terapi, por se në vend të përmirësimit ai ka pasur dhimbje në gjoks pas çka ka ndërruar jetë. Policia konfirmoi rastin, dhe deklaroi se pas urdhrit të prokurorit, trupi i pajetë është dorëzuar për obduksion dhe ende priten rezultatet. Më 19 mars Ministri i Shëndetësisë, Arben Taravari e shkarkoi drejtorin Stefan Trajanovski, në vend të tij u caktua Sasho Stoshevski. Pas obduksionit pritet të qartësohet përgjegjësia e mjekut kujdestar.

• LEXO: Letër publike nga familjarët e të ndjerit Vedat Ademi
• LEXO: Rasti i Vedatit: Është shkarkuar drejtori i Spitalit të Kumanovës, për mjekun ende nuk ka procedurë, Taravari: s’jam polic e prokuror (VIDEO)
• LEXO:  32 vjeçari Vedat Ademi ka ndërruar jetë në spitalin e Kumanovës, familjarët thonë se i është dhënë terapi që i shkaktoi reagim alergjik
• LEXO: Kanë kaluar 9 ditë nga vdekja e Vedat Ademit nga Kumanova, ende nuk ka rezultate të obduksionit nga mjekësia ligjore
• LEXO: Taravari për vdekjen e Vedatit: Nëse konstatohet se ka pasur neglizhencë mjekësore, do të ketë sanksione