RMV, seanca përgatitore e Gjykatës Kushtetuese për Ligjin e Gjuhëve është planifikuar për më 19 qershor

Seanca përgatitore për Ligjin për Gjuhët është planifikuar për 19 qershor 2025, tha kryetari i Gjykatës Kushtetuese, Darko Kostadinovski, në një intervistë për magazinën televizive “Triling” të transmetuar në 24 Vesti më 2 maj 2025. Kryetari i Gjykatës Kushtetuese shpjegoi se për shkak të tragjedisë në Koçan, Gjykata e shtyu seancën një herë, dhe vlerësimet e tij janë se pas zgjedhjeve lokale në vjeshtë, do të ketë vendim nga Gjykata, transmeton Portalb.mk.

“Më 19 qershor, do të organizojmë seancë përgatitore, pas së cilës do të na duhen deri në dy muaj për të përgatitur një raport të ri dhe për të sublimuar të gjitha mendimet e të gjithë pjesëmarrësve. Vlerësimi im është se roli përfundimtar do të miratohet pas zgjedhjeve. Nëse tragjedia nuk do të kishte ndodhur, seanca përgatitore do të ishte përfunduar tashmë dhe vendimi do të kishte ardhur natyrshëm diku në qershor. Pas seancës përgatitore, do të na duhet një muaj, një muaj e gjysmë, dy, për të përgatitur një raport të ri, për të sublimuar të gjitha mendimet e të gjithë pjesëmarrësve… Nuk e di se kur do të shpallen zgjedhjet, shanset janë më realiste dhe do të ishte më objektive, sepse për vetë seancën, kur sapo u njoftua, pamë manipulime të rënda politike, politizim, etnizim, kritika të ashpra ndaj gjykatës kushtetuese”, tha Kostadinovski.

Kostadinovski vlerëson se vendi nuk ka problem me marrëdhëniet ndëretnike, por me keqpërdorimin e tyre.

“Në shoqërinë tonë ka tema që janë të papërshtatshme për shfrytëzim politik. Të tilla janë marrëdhëniet ndëretnike. Ato janë shumë të rëndësishme për një shoqëri si ajo maqedonase. Por, bindja ime e thellë është se në këtë fazë të zhvillimit të shoqërisë sonë nuk kemi problem me marrëdhëniet ndëretnike. Kemi një lloj tjetër problemi, dhe ai është abuzimi i marrëdhënieve ndëretnike për qëllime politike. Kjo është ajo që kemi parë gjatë gjithë periudhës së kaluar dhe pas procedurave në lidhje me “Balancuesin” dhe Ligjin për Gjuhët. Kemi një nevojë më urgjente. Pajtohem që marrëdhëniet ndëretnike janë një nga shtyllat e stabilitetit për vendin tonë. Por në këtë moment, bindja ime personale është se ekziston një themel edhe më i rëndësishëm për stabilitetin e vendit tonë. Ky është sundimi i ligjit. I vërtetë dhe i sinqertë, jo i rremë dhe jo deklarativ. Askush nuk duhet të ketë frikë nga veprimet tona. Asnjë e drejtë që çdo qytetar gëzon sipas Kushtetutës sonë nuk do të mohohet. Qëndrimet tona ligjore për çdo ligj do ta detyrojnë ligjvënësin të bëjë një ligj më të mirë”, theksoi Kostadinovski.

Kryetari i Gjykatës Kushtetuese iu drejtua qytetarëve dhe i nxiti të jenë të qetë dhe të mos besojnë në manipulime politike, sepse Gjykata Kushtetuese është ajo që mbron Kushtetutën.

“Në çfarë bazohet mosbesimi historik ndaj institucioneve të sistemit? Mungesës së sundimit të ligjit. Dhe çfarë është sundimi i ligjit? Është një gjendje kushtetutshmërie. Dhe gjendjen e kushtetutshmërisë kush e mbron? Gjykata Kushtetuese. Prandaj, askush, absolutisht askush, nuk duhet të ketë frikë nga veprimet tona, shoqëria nuk duhet të dridhet nga vendimi që do të marrim. Dhe nuk dua të debatoj me faktorët politikë, jam i vetëdijshëm për kulturën politike. Nuk do ta ndryshoj këtë, por dua t’u drejtohem qytetarëve. Dhe këtë e bëj vazhdimisht. Le të jenë të qetë. Asgjë e tmerrshme nuk do të ndodhë. Ne e kemi hequr “Balancuesin”, a ka ndodhur ndonjë gjë e tmerrshme? Jo. Ligji për Gjuhët? Asnjë e drejtë që çdo qytetar gëzon sipas Kushtetutës sonë nuk do t’i mohohet. Qytetarët mund të jenë të kënaqur me veprimet e Gjykatës Kushtetuese. Pse? Sepse gjetjet tona, qëndrimet ligjore për çdo ligj, do ta detyrojnë ligjvënësin të bëjë një ligj më të mirë se ai që ka bërë vetë”, theksoi Kostadinovski.

Lënda e Ligjit për Gjuhët në Kushtetuese u formua nga 13 nisma nga qytetarë, parti dhe shoqata të ndryshme në vitin 2019, por u aktivizua në tetor 2024, pasi në pushtet erdhi VMRO-VLEN.

Për këtë aktivizim reagoi BDI-ja opozitare e cila nga 8 deri më 11 dhjetor, bashkë me një turmë qytetarësh prezantoi nismën “Roja për Gjuhën” përpara objektit të Gjykatës Kushtetuese të Maqedonisë së Veriut.

Ligji për Zbatimin e Gjuhëve, në procedurë kuvendore ka hyrë më 5 shtator të vitit 2017-të, ndërkaq në fuqi ka hyrë në janar të vitit 2019-të.

Shtatë vjet pas miratimit të Ligjit të gjuhëve në atmosferë të tensionuar në Kuvendin e Maqedonisë së Veriut, me protesta dhe tentativa të panumërta të ish-presidentit Gjorgе Ivanov për ta bllokuar atë, në Gjykatën Kushtetuese më 11 dhjetori do të vendoset shfuqizimi i plotë ose i pjesshëm i këtij ligji. 

• LEXO: Përdorimi i shqipes në Maqedoninë e Veriut nën llupën e Kushtetueses: Çfarë të presim dhe ku gaboi politika për 20 vite?
• LEXO: Maqedoni, ja detajet çfarë përmban ligji për gjuhët (gjuhën shqipe)
• LEXO: Për avancim të gjuhës shqipe duhen ndryshime kushtetuese, por me VMRO-në s’ka dritë në fund të tunelit