Sali Berisha thirrje Monika Kryemadhit: Informo shqiptarët për peshkun e madh!

Kryetari i Partisë Demokratike, Sali Berisha ka mbajtur fjalën mbrëmjen e sotme nga banesa e tij para mbështetësve demokratë.

Ndër të tjera, Berisha u ndal te dosja e Ilir Metës dhe Monika Kryemadhit në SPAK, por gjithashtu nuk la pa përmendur edhe çështjen e inceneratorëve të Elbasanit, seancën që u mbajt sot për ish-ministrin e mjedisit, Lefter Koka.

Berisha e përgëzoi Lefter Kokën për dëshminë që dha sot, ndërsa i bëri thirrje Monika Kryemadhit që të rrëfej se kush është ‘peshku i madh’.

Pjesë nga fjala e Berishës:

Të dashur miq, sot personi të cilin e kemi quajtur gjithnjë ‘ladro utile’, hajdut i dobishëm, Lefter Kokës i erdhën dy pare mend. Iu rikthye edhe guximi.

Sot, në sallën e gjyqit, ai deklaroi se nuk jam unë autori i djegësve, se ‘peshku i madh’ është në telefonin e zonjës Kryemadhi.

Miq, Lefter Koka deklaroi me përgjegjësi para gjyqit se ‘peshku i madh’ është vetëm një dhe e ka emrin Edi Rama. Ndaj dhe këtu para jush, i bëj thirrje zonjës Kryemadhi, e cila deklaroi se Edi Rama ka urdhëruar Dumanin të fshijë të gjthë komunikimet e saj me Edi Ramën, t’ju bëjë të ditur shqiptarëve, të informojë shqiptarët për ‘peshkun e madh’, të informojë shqiptarët me ç’rast i dorëzove Edi Ramës 460 mijë euro.
Të informojë shqiptarët gjithçka di për këtë kryehajdut të të gjitha kohërave.

Unë e kuptoj se çdo deklaratë që bëni, e bllokon mercenar Altin Dumani, që është shndërruar në galloshen e Edi Ramës.
Por, çdo politikan dhe çdo qytetar ka detyrim madhor t’u rrëfejë të vërtetën qytetarëve të tyre.

Dhe kur prokuroria është shndërruar në organ kriminal, është shndërruar në organizatë kriminale, atëherë është detyrë që ajo të zëvendësohet me prokurorinë publike, me denoncimin publik, me gjyqin publik ndaj shqiptarëve.