Sot në Gjykatën e Apelit u mbajt seancë publike për rastin “Durmo Turs” në Llaskarcë
Në Gjykatën e Apelit në Shkup u mbajt seancë publike për rastin tragjik të vitit 2019 në Llaskarcë, ku autobusi i “Durmo Tursit”, në linjën Shkup-Gostivar, doli nga rruga dhe si pasojë humbën jetën 16 udhëtarë dhe 38 mbetën të lënduar. Në seancën publike të Gjykatës së Apelit për më shumë se tre orë u […]


Në Gjykatën e Apelit në Shkup u mbajt seancë publike për rastin tragjik të vitit 2019 në Llaskarcë, ku autobusi i “Durmo Tursit”, në linjën Shkup-Gostivar, doli nga rruga dhe si pasojë humbën jetën 16 udhëtarë dhe 38 mbetën të lënduar. Në seancën publike të Gjykatës së Apelit për më shumë se tre orë u lexua aktvendimi i shkallës së parë për këtë rast, raporton RTM.
Në Gjykatën e Apelit, Prokuroria ka dorëzuar ankesa për 4 të akuzuar, pasi nuk është e kënaqur me lartësinë e dënimit, ndërsa është e kënaqur me dënimin e dhënë për shoferin e autobusit dhe të punësuarin e kontrollit teknik. Për këtë fatkeqësi, vendimi gjyqësor i shkallës së parë shpalli fajtorë të akuzuarit.
U shqiptuan 4 vite burg për të akuzuarin e parë, pronarin e kompanisë “Durmo Turs”, Durmish Beluli; 6 vite burg për Remzi Miftarin – përgjegjësin e Kompanisë; nga 5 vite burg për tre të punësuar të tjerë në kompani dhe me 14 vite burg u dënua shoferi i autobusit, Manoil Trifunovski. Sipas vendimit gjyqësor nga kontrolli teknik është lejuar të kalojë në komunikacion autobus, i cili ka pasur disa probleme teknike, përshirë edhe frenat, të cilat nuk kanë qenë funksionale në nivelin e paraparë.
Me vendimin e shkallës së parë, si familjarët e viktimave ashtu dhe familjarët e palës së akuzuar, nuk mbetën të kënaqur. Pas mbajtjes së seancës publike në Gjykatën e Apelit dhe shqyrtimit të ankesave, pritet të shpallet aktvendimi i shkallës së dytë nëse do të vërtetohen apo do të rriten dënimet për të akuzuarit. Procedura gjyqësore e shkallës së parë zgjati për më shumë se katër vite. Seanca publike në Gjykatën e Apelit do të vazhdojë edhe gjatë ditës së nesërme.
Kujtojmë që aksidenti ndodhi më 13 shkurt 2019 në autostradën Shkup – Tetovë në fshatin Llaskarcë, jetën e humbën 16 persona ndërsa 38 të tjerë u plagosën por shpëtuan. Autobusi i aksidentuar i “Durmo Turs”, ishte i linjës së rregullt Shkup-Gostivar, ndërkaq kompania transportuese vazhdon ende të bartë udhëtarë.