Ujqërit po kthehen në Evropë, por jo në Ballkan

Një studim i ri i bazuar në monitorimin në 34 vende tregon se popullsia e ujqërve në Evropë është rritur në 21.500, që është 58% më shumë se dhjetë vjet më parë, shkruan Dojçe Vele (DW).

Evropa është shtëpia e mbi 21.500 ujqërve (Canis lupus), të cilët gjenden në numër në rritje në disa vende evropiane. Por me rritjen e numrit të ujqërve në Evropë, numri i tyre në Ballkan po zvogëlohet. Prani veçanërisht e reduktuar e ujqërve është vërejtur në Maqedoninë e Veriut, Bosnjë dhe Hercegovinë dhe Mal të Zi, ndërsa situata në Kosovë nuk dihet.

Kjo tregohet në studimin e fundit të publikuar nga një ekip studiuesish më 25 shkurt 2025. Ai thekson se në disa vende, popullsia e ujqërve po rritet me ritëm të jashtëzakonshëm. Për shembull, në Gjermani, ujqërit u rritën nga një tufë në vitin 2000 në 184 tufa dhe 47 çifte në 2022.

Ekipi hulumtues e bazoi vlerësimin e tij në raportet e monitorimit dhe vlerësimet e ekspertëve në 34 vende. Ata zbuluan se deri në vitin 2022, të paktën 21,500 ujqër kishin populluar Evropën, nga të cilët 19,000 u gjetën në Bashkimin Evropian (BE). Kjo, sipas studiuesve, është një rritje prej 58 përqind nga 12,000 që vlerësoheshin 10 vjet më parë.

“Në shumicën e vendeve, popullsia e ujqërve ka vazhduar të rritet dhe tani gjenden në të gjitha vendet, përveç vendeve më të vogla të Evropës kontinentale. Disa vende – Bullgaria, Greqia, Gjermania, Italia, Polonia, Spanja dhe Rumania – tani kanë më shumë se 1000. Për arsye të ndryshme, duke përfshirë objektivat e menaxhimit (d.m.th. kufijtë e popullsisë) ose rikolonizimin relativisht të fundit të specieve pas një mungese të gjatë, disa vende kanë më pak se 100 (Austri, Belgjikë, Danimarkë, Hungari, Luksemburg, Norvegji dhe Holandë). Tre mikroshtetet e Monakos, San Marinos dhe Vatikanit mbeten të vetmet vende në Evropën kontinentale që nuk kanë përjetuar rikolonizimin e ujqërve”, thuhet në studim.

Gjatë dekadës së fundit, numri i ujqërve është rritur në 19 vende (Austri, Belgjikë, Bullgari, Republikën Çeke, Danimarkë, Finlandë, Francë, Gjermani, Greqi, Hungari, Itali, Lituani, Holandë, Poloni, Sllovaki, Republikën Sllovake, Slloveni, Suedi, Zvicër dhe një pjesë të Turqisë).

Në tetë vende, prania e ujqërve mbetet e qëndrueshme – Shqipëri, Kroaci, Luksemburg, Norvegji, Portugali, Rumani, Spanjë, Ukrainë, ka luhatje në tre vende (Estoni, Letoni, Serbi). Popullatë e vogël dhe e izoluar në Spanjën jugore është e vetmja popullatë e ujqërve evropianë që është zhdukur vitet e fundit.

Në BE, ujqërit ndajnë peizazhin me miliona njëthundrakë të egër, 279 milion bagëti dhe 449 milion njerëz. Ujku mbrohet rreptësisht, por paraqet rrezik edhe për kafshët shtëpiake. Ata vrasin afërsisht 56,000 kafshë shtëpiake në BE çdo vit. Kompensimi i dëmit kushton 17 milionë euro në vit për vendet evropiane.

Ujku, sipas Konventës së Bernës për Ruajtjen e Llojeve të Egra Evropiane dhe Habitateve Natyrore, deri më tani është konsideruar si një nga speciet e egra që nuk duhet të shqetësohet, kapet, vritet apo tregtohet. Në dhjetor të vitit të kaluar, vendet nënshkruese të Konventës së Bernës ulën statusin e ruajtjes së ujkut nga “i mbrojtur rreptësisht” në “i mbrojtur”.