Ukrainën/ Raketat ruse vrasin mbi 15 persona, 90 të tjerë janë plagosur

Rusia nisi një valë sulmesh me dronë dhe raketa në të gjithë Ukrainën, duke vrarë të paktën 15 persona dhe duke plagosur të paktën 90 të tjerë. Kështu bëjnë me dije zyrtarët ukrainas.

Një djalë 12-vjeçar ishte midis katër viktimave në kryeqytet, dhe tre persona u vranë në Dnipro në juglindje.

Përtej kufirit, dy fëmijë, të moshës pesë dhe 14 vjeç, u vranë në një sulm me dronë ukrainas në rajonin Krasnodar Krai të Rusisë, tha guvernatori i saj Veniamin Kondratyev në Telegram.

Sulmet vijnë pas një armëpushimi të shkurtër që u zhvillua gjatë festimeve të Pashkëve Ortodokse në fundjavë, gjatë të cilit të dyja palët akuzuan njëra-tjetrën për qindra shkelje.

Kryebashkiaku i Kievit, Vitali Klitschko, shkroi në Telegram se, përveç vdekjeve në kryeqytet, ekipet e shpëtimit kishin nxjerrë një nënë dhe një fëmijë nga rrënojat e një ndërtese banimi 16-katëshe që u shemb në lagjen qendrore Podilsky të Kievit.

Në veri të kryeqytetit, katër punonjës të urgjencës mjekësore ishin midis të plagosurve si pasojë e bombardimeve të përsëritura.

Në një sulm në qytetin qendror të Dnipros, tre persona u vranë dhe dhjetëra të tjerë u plagosën, shkroi në Telegram Oleksandr Ganzha, kreu i administratës rajonale. Fotot e postuara në internet treguan ndërtesa në flakë në qytet.

Diku tjetër, sulmet me raketa dhe dronë në qytetin portual jugor të Odesës vranë tetë persona, shkroi në Telegram kreu i administratës ushtarake të qytetit Sergiy Lysak.

Dhe në Kharkiv, një sulm me dron plagosi një grua 77-vjeçare dhe një burrë 66-vjeçar, tha një zyrtar.

Ministri i Jashtëm i Ukrainës, Andrii Sybiha, tha: “Sulme të tilla nuk mund të normalizohen. Këto janë krime lufte që duhet të ndalen dhe autorët e tyre të mbahen përgjegjës.”

Ai u bëri thirrje vendeve të tjera të “ndërmarrin veprime të menjëhershme” duke lëshuar sanksione kundër Rusisë ose duke ofruar paketa mbështetjeje për Ukrainën. “Të gjitha vendimet e nevojshme për të rritur presionin mbi agresorin duhet të zhbllokohen tani,” shkroi Sybiha në X të enjten.

Lufta në Ukrainë tani është në vitin e saj të pestë dhe ka pasur disa raunde bisedimesh paqeje, me SHBA-në që vepron si ndërmjetës. Megjithatë, procesi është bllokuar që kur Presidenti i SHBA-së Donald Trump e zhvendosi fokusin e tij në luftën në Lindjen e Mesme. Ajo që Ukraina ka propozuar vazhdimisht është një armëpushim i plotë dhe i qëndrueshëm si hap i parë drejt negociatave për një fund të qëndrueshëm të pushtimit rus.