Vullnetarizmi duhet të njihet ligjërisht si përvojë pune gjatë punësimit në Maqedoninë e Veriut

Vullnetarizmi është një aspekt kyç i angazhimit qytetar në Maqedoni. Megjithatë, analiza e re e Organizatës për Dialog dhe Afirmim të Nxënësve të Shkollave të Mesme (ODANSHM) tregon se vetëm 34 nga 200 të rinj të anketuar (17%) janë plotësisht të njohur me rregulloret ligjore që lidhen me vullnetarizmin, dhe 11% tashmë e shohin këtë rregullore si promovim dhe mbështetje efektive të vullnetarizmit, raporton MOF.

Përveç kësaj, vetëm 13% janë të mendimit se sektori civil ofron zgjidhje dhe mundësi të mjaftueshme për vullnetarët, madje 64% thanë se kompanitë nuk e vlerësojnë vullnetarizmin, ndërsa për 67% të të anketuarve nuk ka burime të mjaftueshme në dispozicion për këtë lloj angazhimi.

Prandaj, ODANSHM rekomandon njohjen e ligjshme të vullnetarizmit si përvojë pune gjatë punësimit, por edhe mbajtjen e evidencave më efektive të vullnetarizmit, vullnetarëve dhe ofruesve të mundësive vullnetare.

“Të thellohet bashkëpunimi mes universiteteve, kompanive dhe institucioneve për të ofruar mundësi për këtë lloj angazhimi. Të inkurajohet vullnetarizmi mes studentëve dhe nxënësve të shkollave të mesme duke marrë pikë shtesë kur regjistrohen në kolegj për vullnetarizëm. Të vijojmë me zbatimin efektiv të kuadrit ligjor ekzistues për vullnetarizmin”, janë pjesë e propozimeve të ODANSHM.

Për më tepër, ata duan të rrisin ndërgjegjësimin e të rinjve për angazhimin vullnetar dhe të krijojnë një kulturë të promovimit të angazhimit vullnetar, si dhe të zhvillojnë masa për stimulimin dhe mbështetjen e vullnetarizmit në të gjitha segmentet shoqërore (organizata qytetare, institucione, arsim, etj).

“Republika e Maqedonisë së Veriut duhet t’i bashkohet iniciativave evropiane dhe botërore për të inkurajuar angazhimin vullnetar. Të inkurajojë kulturën e vullnetarizmit në sistemin arsimor. Të përmirësohen kapacitetet e institucioneve për të punuar me vullnetarë”, rekomandon ODANSHM.

Qëllimi i kësaj analize, theksojnë ata, është që përmes qëndrimeve dhe përvojave të vullnetarëve të rinj të vendoset baza për ndryshimin dhe përmirësimin e Ligjit për Vullnetarizmin.

“Për këtë qëllim, ODANSHM, përmes një projekti të mbështetur nga Ambasada Britanike në Shkup dhe Fondacioni Westminster për Demokraci, organizoi një fokus grup, të cilit 15 të rinj i dhanë drejtpërdrejt rekomandimet e tyre për vullnetarizmin dhe kornizën ligjore që e mbulon atë. Në fokus grup mori pjesë edhe përfaqësuesja e Kuvendit, deputetja Marija Petrushevska, e cila mori pjesë në diskutimin për përmirësimin e Ligjit për vullnetarizëm dhe dha idetë e saj për hapat e ardhshëm”, njofton ODANSHM.