25 mijë euro për të mbrojtur vëllain – rasti i rëndë që po hetohet nga policia në Shkup

Shkup, 10 maj 2025 – Një ngjarje shqetësuese ka ndodhur në zonën e Bit Pazarit në Shkup, ku një nxënëse e shkollës fillore ka dhënë gjithsej 25.000 euro shokëve të klasës për të mbrojtur vëllain e saj të vogël nga sulmet fizike, shkruan Flaka.

Sipas njoftimit nga Ministria e Punëve të Brendshme (MPB), rasti është raportuar në orën 00:30 të datës 9 maj në SPB-Shkup, nga babai 52-vjeçar i vajzës. Ai ka deklaruar se vajza e tij e mitur, e cila ndjek mësimet në një shkollë fillore në këtë zonë, është kërcënuar për një kohë të gjatë nga dy bashkëmoshatarë se nëse nuk u jepte para, do ta sulmonin vëllain e saj të vogël, i cili vuan nga probleme shëndetësore.

E ndodhur nën presion të vazhdueshëm dhe frikësuar për vëllain, vajza ka marrë para nga shtëpia në disa raste, duke u dhënë shokëve të klasës një shumë totale prej 25.000 euro.

MPB njofton se janë ndërmarrë masa për zbardhjen e plotë të rastit dhe për të identifikuar të gjitha rrethanat që kanë çuar në këtë veprim alarmues. Rasti ka ngritur shqetësime serioze për sigurinë në shkolla dhe ndikimin e presioneve sociale tek fëmijët.

The post 25 mijë euro për të mbrojtur vëllain – rasti i rëndë që po hetohet nga policia në Shkup appeared first on Flaka, në çdo lajm... .